សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បេីតាមការបញ្ជាក់ពីលោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (ស៉ីម៉ាក់) បាននៅលេីបណ្ដាញសង្គមហ្វេសប៊ុកផ្ទាល់ខ្លួននៅព្រឹកថ្ងៃពុធ ៧កើត ខែផល្គុន ឆ្នាំឆ្លូវ ត្រីស័ក ព.ស២៥៦៥ ត្រូវនឹងថ្ងៃទី០៩ ខែមីនា ឆ្នាំ២០២២នេះថា៖ នៅទីបញ្ជាការស៊ីម៉ាក់ភ្នំពេញ លោក និងលោក Rune Dale Andresen ប្រធានអង្គការNPAប្រចាំកម្ពុជា បានចុះហត្ថលខាលើកិច្ចព្រមព្រៀងកិច្ចសហប្រតិបត្តិការរវាង អង្គការNPA និងមជ្ឈមណ្ឌលសកម្មភាពកំចាត់មីនកម្ពុជាលេីជំនួយហិរញ្ញប្បទានឥតសំណងរបស់រដ្ឋាភិបាលសហរដ្ឋអាមេរិកចំនួន៦,៣៥៥,៧២០ដុល្លារ តាមរយ:អង្គការNPA គាំទ្រអង្គភាពសុីម៉ាក់បោសសំអាតតំបន់រងផលប៉ះពាល់គ្រាប់បែកចង្កោម រយ:ពេល៤៥ខែ (១ មិនា ២០២២-វិច្ឆិកា ២០២៥)! ។
លោក ហេង រតនា បានគូសបញ្ជាក់ថា៖ ក្រសួងការបរទេសនៃរដ្ឋាភិបាលអាមេរិក បានសម្រេចផ្តល់ជំនួយហិរញ្ញប្បទានឥតសំណងចំនួន៦,៣៥៥,៧២០ដុល្លារសំរាប់រយ:ពេល៤៥ខែ (០១ មិនា២០២២ដល់ថ្ងៃទី៣០ វិច្ឆិកា ២០២៥) ដោយផ្តល់តាមរយ:អង្គការNPA សំរាប់គាំទ្រសកម្មភាពរបស់អង្គភាពសុីម៉ាក់ បោសសំអាតតំបន់រងផលប៉ះពាល់ដោយសារគ្រាប់បែកចង្កោម នៅខេត្តស្វាយរៀង, ព្រៃវែង ,កំពង់ចាម ,ត្បូងឃ្មុំ ,ក្រចេះ, រតន:គីរី និងខេត្តមណ្ឌលគីរី។ បរិមាណជំនួយនេះមានបរិមាណដូចបណ្តាលឆ្នាំកន្លងមកដែរ គ្រាន់តែជំនួយលេីកនេះមានរយ:ពេលវែង ៤៥ខែ ដែលកន្លងមកផ្តល់រយ:ពេលមួយឆ្នាំម្តងប៉ុណ្ណោះ។ ជំនួយនេះ ផ្តល់លទ្ធភាពឱ្យអង្គភាពសុីម៉ាក់អាចពង្រាយកំលាំងប្រតិបត្តិការចំនួនជាង២០០នាក់និងអាចរំដោះផ្ទៃដីតំបន់គ្រាប់បែកចង្កោមជាង១៣,២០០ហិចតា។
ជាមួយនេះដែរ ក្រសួងការបរទេសNorway ក៏បានសំរេចផ្តល់ថវិកាខ្នាតតូចចំនួន២គំរោង គឺគំរោងរំដោះខេត្តគ្មានគ្រាប់មីនដែលកំពុងប្រតិបត្តិការ និងគំរោងបោសសំអាតមីនតំបន់ព្រំដែនកម្ពុជា-ថៃ ដែលគំរោងទាំង២មានថវិកាចំនួន ៨៩,០៧៧ដុល្លាររយ:ពេល ៣ខែ៕
ដោយ៖ស តារា
