សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងការិយាល័យនគរបាលសណ្តាប់ធ្នាប់ នៃស្នងការដ្ឋាននគរបាលរាជធានីភ្នំពេញ ចុះរៀបចំសណ្តាប់ធ្នាប់នៅមុខមជ្ឈមណ្ឌលជាតិផ្តល់ឈាម ផ្លូវលេខ២៧១ បន្ទាប់ពីប្រជាពលរដ្ឋរាយការណ៍ ទាក់ទងទៅនឹងបញ្ហាកកស្ទះចរាចរណ៍រៀងរាល់ថ្ងៃ។
បេីយោងតាមប្រភពព័ត៍មានពីក្រុមការងារព័ត៌មាន និងប្រតិកម្មហ័សនៃស្នងការដ្ឋាននគរបាលរាជធានីភ្នំពេញ បានឱ្យដឹងថា នៅព្រឹកថ្ងៃទី០៩ ខែមីនា ឆ្នាំ២០២២ កម្លាំងជំនាញរបស់ការិយាល័យនគរបាលសណ្តាប់ធ្នាប់រាជធានីភ្នំពេញ បានចុះរៀបចំសណ្តាប់ធ្នាប់នៅមុខមជ្ឈមណ្ឌលជាតិផ្តល់ឈាម ចំពោះការឈប់ចតរបស់ឡាំប្រឺតា ដែលបង្កឲ្យមានការកកស្ទះចរាចរណ៍ បាត់បង់សណ្តាប់ធ្នាប់សាធារណៈ និងពិបាកដល់ប្រជាពលរដ្ឋក្នុងការធ្វើដំណើរទៅវិញទៅមក។
សូមជម្រាបថា បច្ចុប្បន្ននេះយេីងសង្កេតឃេីញថា ប្រជាពលរដ្ឋមួយចំនួននៅតែល្មេីសច្បាប់ និងមិនគោរពផ្លាកសញ្ញាចរាចរណ៍ ប៉ុន្តែចំពោះអ្នកល្មេីសច្បាប់ចរាចរណ៍ទាំងនោះ ត្រូវបានសមត្ថកិច្ចជំនាញ ចុះអនុវត្តវិធានការ ដោយចាប់យកមកធ្វេីការផាកពិន័យផងដែរ។ ជាក់ស្ដែងកម្លាំងសមត្ថកិច្ចនគរបាលរាជធានីភ្នំពេញ និងកម្លាំងជំនាញរបស់អធិការដ្ឋាននគរបាលចំនួន១៤ខណ្ឌ បានចុះយុទ្ធនាការរៀបសណ្តាប់ធ្នាប់សាធារណៈ ក្នុងមូលដ្ឋានរៀងរាល់ថ្ងៃ ដើម្បីកាត់បន្ថយការកកស្ទះចរាចរណ៍។
គួររម្លឹកថា កន្លងទៅទាក់ទងទៅនឹងបញ្ហាកកស្ទះចរាចរណ៍ នៅផ្លូវលេខ២៧១ មុខមន្ទីរពេទ្យមិត្តភាព-ខ្មែរសូវៀត និងស្ពានចំរើនផល ត្រូវបានកម្លាំងការិយាល័យនគរបាលសណ្តាប់ធ្នាប់រាជធានីភ្នំពេញ ដឹកនាំដោយលោកវរសេនីយ៍ឯក អេម សម្បត្តិ នាយការិយាល័យ បានចុះរៀបចំសណ្តាប់ធ្នាប់ និងធ្វើការផ្សព្វផ្សាយអប់រំណែនាំបងប្អូនអាជីវករ ដោយឲ្យទ្បើងលក់ផុតពីទ្រូងថ្នល់បណ្តោះអាសន្ន ១ភាគ៣ នៃចិញ្ចើមថ្នល់ ដើម្បីកាត់បន្ថយការកកស្ទះចរាចរណ៍ រក្សាសណ្តាប់ធ្នាប់សាធារណៈ និងងាយស្រួលដល់ប្រជាពលរដ្ឋក្នុងការធ្វើដំណើរទៅវិញទៅមក៕
ដោយ៖ស តារា
