សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មានការភ្ញាក់ផ្អេីលជាខ្លាំង ពេលគេឃើញយុវជនម្នាក់ដែលជាបុគ្គលិកពេទ្យធ្មេញបានដេកស្លាប់នៅលើសាឡុង ហើយត្រូវបានសមត្ថកិច្ចមូលដ្ឋាន និងផ្នែកជំនាញចុះទៅពិនិត្យដល់កន្លែងកើតហេតុកាលពីវេលាម៉ោង១០និង៥នាទីព្រឹកថ្ងៃទី១០ ខែមីនា ឆ្នាំ២០២២ ស្ថិតនៅចំណុចពេទ្យធ្មេញ អុី មេក ផ្ទះលេខ១០៤ ក្នុងភូមិសំបួរ សង្កាត់ដង្កោ ខណ្ឌដង្កោ។
សពយុវជនរងគ្រោះមានឈ្មោះ វណ្ណ ថុនា អាយុ១៩ឆ្នាំ ជាបុគ្គលិកពេទ្យធ្មេញ ស្នាក់នៅកន្លែងកើតហេតុ មានស្រុកកំណើតនៅភូមិសែនពន្លង់ ឃុំសំរោងក្រោម ស្រុកបន្ទាយមាស ខេត្តកំពត។
យោងតាមប្រភពពីសាច់ញាតិជនរងគ្រោះបានឱ្យដឹងថា ជនរងគ្រោះជាកូនច្បង សព្វថ្ងៃនៅលីវ បានមកធ្វើការជាបុគ្គលិកពេទ្យធ្មេញខាងលេីច្រើនឆ្នាំហើយ។ នៅព្រឹកថ្ងៃកើតហេតុគ្រូពេទ្យធ្មេញមិនឃើញបុគ្គលិកបើកទ្វារក៏ចុះមកបើកទ្វារស្រាប់តែឃើញជនរងគ្រោះដេកលើសាឡុងក៏ស្រែកហៅតែមិនឆ្លើយតប ក៏បានយកដៃទៅអង្រួនទើបដឹងថាជនរងគ្រោះស្លាប់បាត់ទៅហើយ។ ភ្លាមៗនោះគ្រូពេទ្យធ្មេញក៏បានរាយការណ៍ជូនសមត្ថកិច្ចមូលដ្ឋានើម្បីឱ្យចុះមកពិនិត្យសពតែម្ដង។
ក្រោយពីទទួលបានព័ត៌មានថាមានមនុស្សស្លាប់នៅលើសាឡុងនៃគ្លីនិកពេទ្យធ្មេញមក សមត្ថកិច្ចមូលដ្ឋានបានចុះមកដល់ទីតាំងកើតហេតុ និងបានរាយការណ៍ទៅសមត្ថកិច្ចជំនាញខាងធ្វើកោសល្យវិច័យរបស់ស្នងការដ្ឋានរាជធានីភ្នំពេញដើម្បីចុះមកពិនិត្យសាកសព ។
បន្ទាប់ពីសមត្ថកិច្ចជំនាញធ្វើកោសល្យវិច្ច័យរួចរាល់ក៏បានបញ្ជាក់ថា សពជនរងគ្រោះបានស្លាប់ដោយសារគាំងបេះដូង មិនជាប់ពាក់ព័ន្ធនឹងករណីអ្វីផ្សេងនោះទេ រួចធ្វើកំណត់ហេតុប្រគល់សពជូនក្រុមគ្រួសារសាច់ញាតិដឹកយកទៅធ្វើបុណ្យទៅតាមប្រពៃណីនៅស្រុកកំណើត ៕
ដោយ ៖ ភារ៉ា ដង្កោ
