សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ រថយន្តស៊េរីទំនើបមួយគ្រឿងម៉ាកឡិចស៊ីស RX350 សង្ស័យគ្មានបង់ពន្ធនាំចូល ត្រូវបានកម្លាំងគយចល័តតំបន់៥ ប្រចាំខេត្តបន្ទាយមានជ័យ សហការជាមួយកម្លាំងចម្រុះ ចុះចាប់តាមដងផ្លូវសាធារណៈ នៅក្រុងប៉ោយប៉ែត។
បើតាមការបញ្ជាក់ពីមន្ត្រីគយចល័តតំបន់៥ បានឱ្យដឹងថា រថយន្តដែលមន្រ្តីជំនាញចុះចាប់នោះ ម៉ាក់ឡិចស៊ីស RX350 ពាក់ស្លាកលេខភ្នំពេញ 2AP 1389 បើក និងរួមដំណើរដោយនារីពីរនាក់ មកឈប់ចត នៅចំណុច ខាងលិចផ្សារអគ្គថ្មី (ប៉ោយប៉ែត) ស្ថិតនៅក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ កាលពីវេលាម៉ោង ១រសៀលថ្ងៃទី១៣ ខែមីនា ឆ្នាំ២០២២។
បច្ចុប្បន្នរថយន្តខាងលេីនេះ ត្រូវបាននាំយកមករក្សាទុក ជាបណ្តោះអាសន្ន នៅទីតាំងឈរជើងរបស់គយការិយាល័យ ស្រាវជ្រាវ និងបង្ក្រាបអំពើរត់ពន្ធតំបន់៥ ដើម្បីធ្វើកំណត់ហេតុល្មើសច្បាប់គយ ទៅតាមនីតិវិធី៕
ដោយ៖សហការី
