សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តស្ទូចម៉ាកហុីយ៉ាន់ដាយបានបេីកបុករថយន្តក្រឡុកសុីម៉ងត៍បញ្ឆិតចំពីមុខពេញទំហឹងបណ្ដាលឱ្យរងការខូចខាតទាំងសងខាងយ៉ាងដំណំ តែសំណាងដែរដែលគ្មានអ្នករងរបួសឬស្លាប់ ។ ហេតុការណ៍គ្រោះថ្នាក់ចរាចរណ៍ខាងលេីនេះបានកើតឡើងកាលពីវេលាម៉ោង៥ និង៤០នាទីទៀបភ្លឺថ្ងៃទី១៦ ខែមីនា ឆ្នាំ២០២២ ស្ថិតនៅតាមបណ្ដោយផ្លូវ៦០ម៉ែត្រ ក្នុងសង្កាត់ជើងឯក ខណ្ឌដង្កោ រាជធានីភ្នំពេញ ។
តាមប្រភពពីកន្លែងកើតហេតុបានឱ្យដឹងថា ដំបូងឡេីយរថយន្តស្ទូចម៉ាកហុីយ៉ាន់ដាយ ពណ៌ស ពាក់ស្លាកលេខភ្នំពេញ3F-6358បើកបរតាមបណ្ដោយផ្លូវ៦០ម៉ែត្រក្នុងទិសដៅពីជើងទៅត្បូង ខណៈមកដល់ចំណុចកើតហេតុសង្ស័យអ្នកបើកបរងោកមួយភាំងធ្វើឱ្យរេចង្កូតទៅឆ្វេងដៃជ្រុលទៅបុកបញ្ឆិតចំពីមុខរថយន្តក្រឡុកសុីម៉ងត៍ម៉ាក SANY
ពណ៌ស ពាក់ស្លាកលេខព្រះសីហនុ5A-0821 បើកបរដោយបុរសម្នាក់ធ្វើដំណើរបញ្ច្រាសទិសគ្នាពេញទំហឹង បណ្ដាលឱ្យរថយន្តស្ទូចដាច់កង់មុខនិងធុងប្រេងចេញពីរថយន្តហូរប្រេងពេញផ្លូវ ចំណែករថយន្តក្រឡុកសុីម៉ងត៍រងការខូចខាតយ៉ាងដំណំ តែ សំណាងល្អមិនមានអ្នករបួស។
ក្រោយកើតហេតុ សមត្ថកិច្ចមូលដ្ឋានបានមកដល់សហការជាមួយសមត្ថកិច្ចជំនាញចរាចរណ៍ប្រចាំខណ្ឌដង្កោ ធ្វេីការវាស់វែងស្ទូចយករថយន្តទាំង២គ្រឿងទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នានៅពេលក្រោយ៕
ដោយ ៖ ភារ៉ា ដង្កោ
