រថយន្តហុីយ៉ាន់ដាយដឹកទំនិញសង្ស័យអ្នកបើកងងុយដេកបានបើកទៅបុកផ្ទះអ្នកភូមិ២គ្រួសារផ្អើលទាំងរំលងអធ្រាត្រ

ខេត្តស្វាយរៀង ៖ បុរសម្នាក់សង្ស័យ ងងុយដេកបានបើករថយន្តហ៊ីយ៉ាន់ដាយ ដឹកទំនិញរេចង្កូតទៅបុកចូលផ្ទះអ្នកភូមិ២គ្រួសារផ្អើលទាំងរំលងអធ្រាត្រតែសំណាងដែរដែលមិនមានអ្នករងគ្រោះថ្នាក់។

   ហេតុការណ៏នេះបានកើតឡើងកាលពីវេលាម៉ោង២និង៥០នាទីរំលងអធ្រាត្រឈានចូលថ្ងៃទី២៣ខែមីនាឆ្នាំ២០២២ នៅផ្លូវលេខ១ ស្ថិតត្រង់ចន្លោះគីឡូម៉ែត្រលេខ១៣៥និង១៣៦ ក្នុងភូមិប្រសូត្រ១ ឃុំកណ្ដៀងរាយ ស្រុកស្វាយទាប ខេត្តស្វាយរៀង ។

   យោងតាមសមត្ថកិច្ចនគរបាលស្រុកបានឱ្យដឹងថា អ្នកបើករថយន្ដបង្កហេតុមានឈ្មោះឌិន សំណាង អាយុ២០ឆ្នាំ មុខរបរបេីកបរ រស់នៅភូមិជាឫស្សី ឃុំចម្លង ស្រុកស្វាយជ្រំ ខេត្តស្វាយរៀង។

ចំណែកម្ចាស់ផ្ទះរងគ្រោះមានឈ្មោះ ប៉ែន និមល ភេទស្រី អាយុ៤៥ឆ្នាំ មុខរបរលក់ដូរ រស់នៅភូមិឃុំកើតហេតុខាងលេី។ ចំពោះសម្ភារខូចខាតរួមមានសំយាបមុខទំហំ៤ម៉ែត្រគុណ៥ម៉ែត្រកន្លះ, តុ២ធ្វេីអំពីឥដ្ឋការ៉ូ, ស្លាកស្រាបៀរនិងស្លាកបោកអ៊ុតប៉ុន្តែនៅក្នុងហេតុការណ៍នេះមិនមានអ្នករងរបួសទេ។

   ម្ចាស់ផ្ទះទី២មានឈ្មោះប៉ែន ប្លាទីន ភេទប្រុស អាយុ៥១ឆ្នាំ មុខរបរលាងរថយន្ត សម្ភារខូចខាតមានបង្គោលសសរធ្វេីអំពីដែក២ដេីម ហើយមិនមានអ្នករងរបួសទេ។

   តាមសាក្សីបានឱ្យដឹងថា មុនពេលកើតហេតុមានរថយន្តមួយគ្រឿងម៉ាកហុីយ៉ាន់ដាយ ពណ៌ស ពាក់ស្លាកលេខ ស្វាយរៀង៣A-១២៥៦បើកលើផ្លូវជាតិលេខ១ក្នុងទិសដៅពីកេីតទៅលិច  លុះមកដល់ចំណុចកើតហេតុខាងលើស្រាប់តែរេចង្កូតបុកចូលផ្ទះប្រជាពលរដ្ឋលាន់សូរដូចរន្ទះបង្កការភ្ញាក់ផ្អើលដល់ម្ចាស់ផ្ទះនិងអ្នកភូមិទាំងរំលងអធ្រាត្រ។

    ក្រោយមកសមត្ថកិច្ចបានមកដល់ធ្វើការវាស់វែងនិងអូសយកមធ្យោបាយធ្វើដំណើរមករក្សាទុកនៅអធិការដ្ឋាននគរបាលស្រុកស្វាយទាបដើម្បីដោះស្រាយជាមួយម្ចាស់ផ្ទះតាមផ្លូវច្បាប់៕

ដោយ៖យឹម សុថាន