សារព័ត៌មាន នគរវត្ត តែងតែនាំមុខគេជានិច្ច
កីឡាករអន្តរជាតិហុល្លង់ Arnaut Danjuma ត្រូវបានចាប់អារម្មណ៍ដោយក្លិបយក្សនៅអង់គ្លេស Liverpool ដែលកីឡាកររូបនេះបានបង្ហាញខ្លួនដំបូង នៅក្នុងប្រទេសអេស្ប៉ាញ ហើយក៏អាចជំនួសកន្លែង Sadio Mane នៅទឹកដី Anfield ផងដែរ។ ក្លិប Liverpool ចាប់អារម្មណ៍ក្នុងការចុះហត្ថលេខាលើតារាឆ្នើមរបស់ Villarreal រូបនេះ ប៉ុន្តែទំនងជាមិនទាន់ដេញថ្លៃភ្លាមៗសម្រាប់គាត់នៅរដូវក្តៅនេះនោះទេ។
កីឡាករជម្រើសជាតិហុល្លង់រូបនេះបានបង្ហាញទម្រង់លេងយ៉ាងល្អក្នុងប្រទេសអេស្ប៉ាញចាប់តាំងពីផ្ទេរពីក្លិប Bournemouth កាលពីឆ្នាំមុន។Danjuma បានស៊ុតបញ្ចូលទីបាន១៣គ្រាប់ក្នុងការបង្ហាញខ្លួន២៨ដងនៅ La Liga និង Champions League នៅរដូវកាលនេះ ដោយបានបញ្ជូនបាល់ឱ្យមិត្តរួមក្រុមស៊ុតចំនួន៤ដង។
ទម្រង់លេងដ៏ល្អរបស់កីឡាករវ័យ២៥ឆ្នាំសម្រាប់ក្រុមអេស្ប៉ាញរូបនេះបានទាក់ទាញចំណាប់អារម្មណ៍របស់ក្លិបហង្សក្រហម Liverpool។សារព័ត៌មាន GOAL និង Spox បានឲ្យដឹងថា ក្លិបហង្សក្រហមមើលឃើញ Danjuma ជាអ្នកស្នងតំណែងរបស់ Sadio Mane ដែលអាចចាកចេញនៅរដូវក្តៅឆ្នាំ២០២៣ ប្រសិនបើគាត់មិនបន្តកិច្ចសន្យាបច្ចុប្បន្នរបស់គាត់។
ប្រសិនបើ Mane បញ្ចប់ការចាកចេញពីក្លិបនៅឆ្នាំក្រោយ ក្លិបអាចនឹងដាក់ដេញថ្លៃដើម្បីនាំយក Danjuma មកចូលរួម។ Danjuma បានក្លាយជាតារាសម្រាប់ក្រុម Villarreal និងជាអ្នកស៊ុតបញ្ចូលទីច្រើនជាងគេរបស់ក្លិបនៅ La Liga ហើយក៏ជាកីឡាករឆ្នើមបំផុតរបស់ក្រុមនៅក្នុងក្របខ័ណ្ឌ Champions League នៅរដូវកាលនេះផងដែរ។
សមត្ថភាព និងភាពខ្លាំងក្នុងទម្រង់លេងរបស់គាត់ពិតជាគួរឲ្យចាប់អារម្មណ៍ ហើយគាត់មានបទពិសោធន៍រួចទៅហើយនៅក្នុងប្រទេសអង់គ្លេស ដោយបានចំណាយពេល២រដូវកាលជាមួយក្លិប Bournemouth។ Danjuma បាននិយាយនៅសប្តាហ៍នេះថា “ខ្ញុំជឿថាគាត់គឺជាកីឡាករកំពូលម្នាក់នៅក្នុងតំណែងរបស់គាត់នៅពេលនេះ វាពិតជាយុត្តិធម៌ និងការពិតក្នុងការនិយាយថា ខ្ញុំជាខ្សែបម្រើស្លាបដ៏ល្អបំផុតនៅក្នុងពិភពលោក”។
ខ្សែបម្រើស្លាបរូបនេះថែមទាំងទទួលបានការសរសើរពីគ្រូបង្វឹកក្លិប Bayern Munich លោក Julian Nagelsmann ក្នុងសប្តាហ៍នេះផងដែរ។ ក្រុម Villarreal បានយកឈ្នះក្រុមរបស់លោក Nagelsmann ក្នុងការប្រកួតវគ្គ៨ក្រុមចុងក្រោយ Champions League ជើងទី១ កាលពីថ្ងៃទី៧ ហើយបុរសសញ្ជាតិអាឡឺម៉ង់ Nagelsmann ត្រូវបានសួរថា តើនរណាជាអ្នកគំរាមកំហែងធំបំផុតចំពោះក្រុមរបស់គាត់? លោក Nagelsmann បានឆ្លើយតបថា “គាត់ (Danjuma) ជាខ្សែប្រយុទ្ធដ៏គ្រោះថ្នាក់ដែលតែងតែអាចត្រូវបានគេដាក់លេងនៅស្លាបឆ្វេង។ គាត់មានល្បឿនដ៏ល្អ ចលនាល្អ និងអាចប្រៀបធៀបទៅនឹងកីឡាករកំពូលរបស់អឺរ៉ុប” ៕
ដោយ៖ ភារៈ(រូបភាព ៖ goal.com)
