សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នៅរសៀលថ្ងៃទី១៩ ខែមេសា ឆ្នាំ២០២២ រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាអគ្គលេខាធិការក្រុមប្រឹក្សាសកម្មភាពជនពិការ លោក ឯម ច័ន្ទមករា បានលើកឡើងលើ facebook ផ្ទាល់ខ្លួនថា, ក្នុងនាមជាអ្នកទទួលបន្ទុកវិស័យពិការភាព ខ្ញុំសូមបញ្ជាក់ថា រាជរដ្ឋាភិបាល ឬក្រសួងពាក់ព័ន្ធវិស័យពិការភាពនៅមិនទាន់មានច្បាប់អនុញ្ញាតឱ្យប្រើស្លាកលេខរថយន្ត «ជនមានពិការភាព» ដូចមានក្នុងរូបភាពខាងក្រោមនេះទេ។
លោកបន្តថា, សូមម្ចាស់រថយន្តអញ្ជើញទៅធ្វើស្លាកលេខរថយន្តឱ្យបានត្រឹមត្រូវ ជៀសវាងការផាកពិន័យ រួចធ្វើការចោទប្រកាន់មកលើអង្គភាពពាក់ព័ន្ធ។ សូមចែកឱ្យដាច់រវាងស្លាកលេខរថយន្ត និងបណ្ណចំណតយានយន្តពិសេសសម្រាប់ជនមានពិការភាព។ លោកបានឃើញប្រភពរូបភាពពីបណ្តាញសង្គម។
ដោយឡែកលោក គង់ វិមាន អ្នកនាំពាក្យក្រសួងសាធារណការ និង ដឹកជញ្ជូន នៅរសៀលថ្ងៃទី ១៩ ខែ មេសា ឆ្នាំ ២០២២ បានបង្ហោះសារនៅលេីបណ្ដាញសង្គមហ្វេសប៊ុកផ្ទាល់ខ្លួនរបស់ ឯកឧត្ដម ដោយមានខ្លឹមសារថា ៖ ក្រសួងសាធារណការនិងដឹកជញ្ជូន មិនមានគោលការណ៏ឬច្បាប់ដោយឡែកណាមួយសម្រាប់ផ្តល់ផ្លាកលេខរបៀបនេះជូនជនមានពិការភាពទេ ។
នេះជាផ្លាកលេខក្លែងក្លាយ សូមសមត្ថកិច្ចតាមដងផ្លូវបើបានជួប សូមជួយចាត់វិធានការតាមផ្លូវច្បាប់ជាបន្ទាន់ផង ដើម្បីជៀសវាងការភាន់ច្រឡំ និងជួយទប់ស្កាត់រាល់អំពើល្មើសដែលតែងតែកើតមានដែលបង្កឡើងដោយបុគ្គលមួយចំនួនដូចម្ចាស់រថយន្តនេះជាដើម ៕ សូមអរគុណ
ដោយ ៖ សិលា
