សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ យោងតាមរបាយការណ៍របស់នគរបាលស្រុកភ្នំស្រួច នៃស្នងការដ្ឋាននគរបាលខេត្តកំពង់ស្ពឺ បានឱ្យដឹងនៅព្រឹកថ្ងៃសុក្រទី០៦ ខែឧសភា ឆ្នាំ២០២២នះថា៖ ជនសង្ស័យពីរនាក់ ខណៈនាំគ្នាដេីរលួចដែកបង្គោលរបាំងផ្លូវល្បឿនលឿន ត្រង់ចំណុច ភូមិបន្ទាប់ ឃុំមហាសាំង ស្រុកភ្នំស្រួច ត្រូវកម្លាំងនគរបាលឃាត់ខ្លួនកាលពីវេលាម៉ោង ៦និង៣០នាទីល្ងាចថ្ងៃទី៥ ខែឧសភាម្សិលមិញនេះ។
របាយការណ៍ដដែល បានបន្តថា ជនសង្ស័យ២នាក់នោះរួមមាន៖ទី១.ឈ្មោះ សេង តឿន អាយុ២៤ឆ្នាំ និងទី២.ឈ្មោះ កួយ តិចគៀ អាយុ២២ឆ្នាំ ពួកគេរស់នៅភូមិបន្ទាប់ ឃុំមហាសាំង ស្រុកភ្នំស្រួច ខេត្តកំពង់ស្ពឺ។
ប្រភពដដែលបន្តថា មុនពេលកើតហេតុជនសង្ស័យទាំង២នាក់នេះ បានធ្វើសកម្មភាពលួចដកយកបង្គោលដែក របាំងលើផ្លូវល្បឿនលឿនចំនួន ២៦ បង្គោល ត្រង់ចំណុចទីតាំងខាងលើ ភ្លាមនោះក៏ជួបកម្លាំងល្បាតប្រទះឃេីញក៏ចាប់ឃាត់ខ្លួនតែម្តង។ ចំណែកវត្ថុតាងដកហូតបានមានបង្គោលដែកចំនួន ២៦ បង្គោល និងម៉ូតូសណ្តោងរ៉ឺម៉កមួយគ្រឿង។
បច្ចុប្បន្នជនសង្ស័យរួមទាំងវត្ថុតាង ត្រូវបានសមត្ថកិច្ចបញ្ជូនមកស្នងការដ្ឋាននគរបាលខេត្តកំពង់ស្ពឺ ដើម្បីកសាងសំណុំរឿងចាត់ការតាមច្បាប់៕
ដោយ៖សហការី
