សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មន្ត្រីស៊ើបអង្កេតនៃសាខា ក.ប.ប. ខេត្តបាត់ដំបង ខេត្តព្រះសីហនុ ខេត្តស្វាយរៀង ខេត្តកណ្តាល និងខេត្តសៀមរាប សហការជាមួយមន្ទីរពាណិជ្ជកម្មខេត្ត បាននាំយកនូវរថយន្តមន្ទីរពិសោធន៍ចល័តផ្នែកប្រេងឥន្ធនៈ បន្តនិរន្តរភាពនៃកិច្ចការអ្នកប្រើប្រាស់វិស័យប្រេងឥន្ធនៈនៅក្នុងដែនសមត្ថកិច្ចរបស់ខ្លួន គោលបំណងធានាឱ្យបាននូវការរកស៊ីប្រកបដោយសុចរិតភាពនិងស្មោះត្រង់។ នេះបេីយោងតាមប្រភពព័ត៍មានពីអគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) បានឱ្យដឹងនៅរសៀលថ្ងៃសុក្រទី០៦ ខែឧសភា ឆ្នាំ២០២២។
ជាក់ស្តែងចាប់ពីថ្ងៃទី២ ដល់ថ្ងៃទី៤ ខែឧសភា ឆ្នាំ២០២២ មន្ត្រីជំនាញបានចុះប្រតិបត្តិការត្រួតពិនិត្យតាមស្ថានីយ និងដេប៉ូប្រេងឥន្ធនៈបានសរុបចំនួន ៤៧ទីតាំង។
យោងតាមលទ្ធផលនៃការត្រួតពិនិត្យយ៉ាងយកចិត្តទុកដាក់ មន្ត្រីយើងបានពិនិត្យឃើញភាពមិនអនុលោមលើដេប៉ូចំនួន ១១ទីតាំង ដែលតាមរយៈការពន្យល់ពីទិដ្ឋភាពច្បាប់ ម្ចាស់ដេប៉ូទាំងនោះព្រមទទួលស្គាល់នូវកំហុស និងទទួលការពិន័យអន្តរការណ៍ពីមន្ត្រីជំនាញ ដើម្បីកែប្រែនូវកំហុសឆ្គង។
ជាមួយគ្នានោះ អគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) ក៏បានបន្ថែមថា៖ដេប៉ូប្រេងឥន្ធនៈចំនួន ៩ទីតាំងផ្សេងទៀត ត្រូវបានមន្រ្តីជំនាញធ្វើការពិន័យទៅតាមនីតិវិធីក្រោយរកឃើញថាមិនមានអនុលោមភាព។ ការចាត់វិធានការច្បាប់គឺធ្វើឡើងខណៈពេលដែលមន្រ្តីជំនាញ ក.ប.ប. ចុះត្រួតពិនិត្យប្រេងឥន្ធនៈនៅតាមបណ្ដាស្ថានីយ និងដេប៉ូស្ថិតក្នុងខេត្តកំពង់ចាម ខេត្តឧត្តរមានជ័យ ខេត្តស្វាយរៀង ខេត្តកណ្ដាល និងរាជធានីភ្នំពេញនាថ្ងៃទី៥ ខែឧសភា ឆ្នាំ២០២២ម្សិលមិញនេះ។ គោលបំណងនៃការត្រួតពិនិត្យគឺដើម្បីការពារផលប្រយោជន៍ជូនអ្នកប្រើប្រាស់ ក៏ដូចជាទប់ស្កាត់នូវអំពើមិនសុចរិតក្នុងវិស័យប្រេងឥន្ធនៈ។
ជាក់ស្ដែងតាមលទ្ធផលត្រួតពិនិត្យរបស់មន្រ្តីជំនាញ គឺបានរកឃើញដេប៉ូប្រេងឥន្ធនៈចំនួន ៩ទីតាំងមិនមានអនុលោមភាព ក្នុងចំណោមស្ថានីយ និងដេប៉ូចំនួន ៣១ទីតាំងដែលបានត្រួតពិនិត្យសរុប៕
ដោយ៖សហការី
