ព័ត៌មានទាន់ហេតុការណ៍៖

មោទនភាពជាតិខ្មែរ ! កម្ពុជាដណ្ដើមមេដាយមាសស៊ីហ្គេមដំបូង ដោយកីឡាករឃីកបុកស៊ីង ទូច រ៉ាឆាន់ ក្រោយយកឈ្នះកីឡាករថៃ ក្នុងវគ្គផ្ដាច់ព្រ័ត្រ

ចែករំលែក៖

ប្រទេសវៀតណាម ៖ មោទនភាពជាតិបំផុត ! ខណៈកីឡាករកម្ពុជាបានដណ្ដើមមេដាយមាសលើកដំបូង ក្នុងព្រឹត្តិការណ៍កីឡាស៊ីហ្គេម លើកទី៣១ ដោយកីឡាករឃីកបុកស៊ីង ទូច រ៉ាឆាន់ បន្ទាប់ពីយកឈ្នះកីឡាករថៃ Arunno Sivapan ដោយពិន្ទុដាច់ លើវិញ្ញាសារទម្ងន់ ៥៧គីឡូក្រាម ។ ជោគជ័យនេះត្រូវបានប្រជាពលរដ្ឋក្នុង និងក្រៅប្រទេសបង្ហោះលើបណ្តាញសង្គមហ្វេសប៊ុក គាំទ្រ ពីជ័យជម្នះនេះ របស់កីឡាករយកមេដាយមាសជូនជាតិ ។ 

សូមបញ្ជាក់ថា កម្ពុជានៅសល់បេក្ខភាពប្រកួតដណ្ដើមមេដាយមាស ៣រូបទៀត សម្រាប់ប្រភេទកីឡាឃីកបុកស៊ីង ដែលនឹងត្រូវប្រកួតនៅយប់នេះ រួមមានកីឡាករ លន់ បញ្ញា, កាន់ ម៉េង ហុង និងកីឡាករ ឈឿង ល្វៃ ។ 

 ជយោ! កីឡាករ ទូច រ៉ាឆាន់ ដណ្ដើម​បានមេដាយ​មាស​ លើកដំបូង  ក្នុង​ព្រឹត្តិ​ការណ៍​ស៊ីហ្គេម លើកទី៣១ នៅ​ទី​ក្រុង​ហាណូយ ក្រោយ​យក​ឈ្នះ​កីឡា​ករ​ថៃ Arunno Sivapan ដោយពិន្ទុ ក្នុងវគ្គផ្ដាច់ព្រ័ត្រ លើ​ប្រ​ភេទ​កីឡា​ឃីក​បុក​ស៊ីង ទម្ងន់ ៥៧គីឡូក្រាម 🥊🇰🇭 ។ 

 ជាមួយពាក្យស្លោកថា, យើងនាំគ្នាឆ្ពោះទៅស៊ីហ្គេម_អាស៊ានប៉ារ៉ាហ្គេម_ឆ្នាំ២០២៣ 

#កីឡារស់ក្នុងសន្ដិភាព SPORTS: LIVE IN PEACE

#teamcambodia 

#cambodiaairways 

#nagaworld

#seagameshanoi ។

ដោយឡែក លោក ស សុខា រដ្ឋលេខាធិការ ក្រសួងអប់រំយុវជននិងកីឡា បានថ្លែងថា, សូម​អបអរសាទរ​ដល់​កីឡាករកម្ពុជា ទូច រ៉ាឆាន់ ដណ្តើម​បាន​មេដាយ​មាស មុន​គេ​ក្នុង​ព្រឹត្តិការណ៍​កីឡាស៊ីហ្គេម​លើក​ទី៣១ នៅប្រទេសវៀតណាម ល្ងាច​ថ្ងៃ​សុក្រនេះ ក្នុង​ប្រភេទ​កីឡា​ឃីកបុកស៊ីង ទម្ងន់​ ៥៧គីឡូក្រាម ។

នេះជាមោទនភាពអស្ចារ្យថ្មីមួយទៀត សម្រាប់កម្ពុជា ដែលកីឡាករ ទូច រ៉ាឆាន់ ដណ្តើមមេដាយមាស ជូនជាតិមាតុភូមិនៃយើង ។

សូមជូនពរកីឡាករ ទូច រ៉ាឆាន់ ក៏ដូចជាកីឡាករ កីឡាការិនីកម្ពុជាទាំងអស់ ដែលទៅចូលរួមប្រកួតកីឡាស៊ីហ្គេម លើកទី៣១ នៅប្រទេសវៀតណាម ទទួលជោគជ័យគ្រប់ការប្រកួត ពិសេសដណ្តើមបានមេដាយជូនព្រះរាជាណាចក្រកម្ពុជា ជាបន្តបន្ទាប់ កុំបីខានឡើយ៕

ដោយ ៖ សិលា


ចែករំលែក៖