សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានបើករថយន្តហុីយ៉ាន់ដាយគេចពីម៉ូតូរបស់យុវជនម្នាក់ដែលជិះម៉ូតូអត់ពាក់មួកសុវត្ថិភាពគេចពីសមត្ថកិច្ចដាក់គោលដៅចរាចរណ៍ បណ្ដាលឱ្យបួងចង្កូតឡើងលើចិញ្ចើមផ្លូវក្រឡាប់ផ្ងារជើងម្ខាង បង្កការភ្ញាក់ផ្អើលដល់អ្នកដំណើរកាលពីវេលាម៉ោង១១ និង១៥នាទីព្រឹកថ្ងៃទី ១៨ ខែឧសភា ឆ្នាំ២០២២ នៅតាមបណ្ដោយផ្លូវលេខ២១៧ ក្នុងភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។
យោងតាមប្រភពព័ត៌មានបានប្រាប់ឱ្យដឹងថា នៅមុនពេលកើតហេតុ សមត្ថកិច្ចចរាចរណ៍ខណ្ឌដង្កោបានដាក់គោលដៅដើម្បីអនុវត្តច្បាប់ចរាចរណ៍ចាប់អ្នកជិះម៉ូតូអត់ពាក់មួកសុវត្ថិភាពនិងអត់ដាក់កញ្ចក់មើលក្រោយ ពេលនោះក៏មានយុវជនម្នាក់ជិះម៉ូតូមួយគ្រឿងមិនចាំម៉ាក និងអត់ពាក់មួកសុវត្ថិភាពមកដល់ចំណុចគោលដៅ ហើយដោយឃើញសមត្ថកិច្ចដាក់គោលដៅនៅខាងមុខក៏បានជិះម៉ូតូបត់ត្រឡប់ក្រោយវិញ ស្របពេលនោះក៏មានបុរសម្នាក់បើករថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ 3F-2575 មកពីក្រោយក្នុងល្បឿនលឿនចាប់ហ្រ្វ័ងមិនទាន់ក៏បានបួងចង្កូតមកខាងស្ដាំបណ្ដាលឱ្យក្រឡាប់ផ្ងារជើងម្ខាង ព្រមទាំងប៉ះទៅលើម៉ូតូរបស់ប្រជាពលរដ្ឋ ៥ទៅ៦គ្រឿងទៀត តែមិនបានខូចខាតធ្ងន់ធ្ងរនោះទេ ហើយក៏មិនបណ្ដាលឱ្យមានអ្នកណាម្នាក់រងរបួសនោះដែរ ។
ក្រោយពេលកើតហេតុ សមត្ថកិច្ចប៉ុស្តិ៍នគរបាលរដ្ឋបាលដង្កោ បានចុះមកដល់កន្លែងកើតហេតុ និងបានរាយការណ៍ទៅសមត្ថកិច្ចជំនាញចរាចរណ៍ខណ្ឌដង្កោឱ្យចុះមកពិនិត្យតាមជំនាញ ។ ដោយមើលឃើញថារថយន្តមិនបានប៉ះពាល់ដល់សម្បត្តិរដ្ឋ ហើយក៏មិនបង្កឱ្យមានអ្នកណាម្នាក់រងរបួសនោះ ទើបសមត្ថកិច្ចអនុញ្ញាតឱ្យតំណាងរថយន្តមកដោះស្រាយជាមួយម្ចាស់ម៉ូតូរបស់ប្រជាពលរដ្ឋដែលរងការខូចខាតតិចតួចនិងឱ្យតំណាងរថយន្តហៅរថយន្តស្ទូចមកស្ទូចយករថយន្តទៅជួសជុលដោយខ្លួនឯង៕
ដោយ ៖ ភារ៉ា ដង្កោ
