សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មេការសំណង់ម្នាក់នៅរសៀលថ្ងៃទី១៨ ខែឧសភា ឆ្នាំ២០២២ ត្រូវបានកម្លាំងសមត្ថកិច្ចកងរាជអាវុធហត្ថរាជធានីភ្នំពេញចាប់បញ្ជូនទៅតុលាការពាក់ពន្ធពីបទ«មិនបំពេញកាតព្វកិច្ច ចំពោះឧបករណ៍ដែលអាចជួញដូរបាន» ពោលគឺទិញសម្ភារគ្រឿងសំណង់ហើយមិនសងលុយគេ ។
ជនសង្ស័យរូបនេះមានឈ្មោះ ម៉ង់ សាម៉ន ភេទប្រុស អាយុ៤៣ឆ្នាំ មុខរបរអ្នកម៉ៅការសំណង់ មានទីលំនៅផ្ទះលេខ១២០ ផ្លូវលេខ២៨ ស្ថិតក្នុងសង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
អង្គហេតុនៃការចាប់បញ្ជូនខ្លួនមេការសំណង់ម្នាក់នេះបញ្ជូនទៅតុលាការ សំណុំរឿងនេះត្រូវដើមបណ្តឹងគេប្តឹងថា កាលពីអំឡុងឆ្នាំ២០១៨ ឈ្មោះ ម៉ង់ សាម៉ន ជាអ្នកម៉ៅការសំណង់បានទៅទាក់ទងទិញគ្រឿងសំណង់របស់ដើមបណ្តឹងជាបន្តបន្ទាប់ សរុបទឹកប្រាក់ចំនួន ៦ ៧០០ដុល្លារអាមេរិក ដែលការទិញគ្រឿងសំណង់នោះមេការមិនទាន់បានទូទាត់ប្រាក់ឲ្យម្ចាស់បំណុលភ្លាមៗទេ ចេះតែសុំពន្យារពេលម្តងហើយម្តងទៀត ។
រហូតមកដល់អំឡុងខែកញ្ញា ឆ្នាំ២០២១ ដើមបណ្តឹងបានណាត់ជួបមេការ (ម៉ង់ សាម៉ន) ដើម្បីសួរនាំលុយជំពាក់ថ្លៃគ្រឿងសំណង់នោះ។ ពេលជួបគ្នាមេការសំណង់បានចេញមូលប្បទានបត្រ(សែក) មួយសន្លឹកដែលមានទឹកប្រាក់៧ ៦០០ ដុល្លារអាមេរិកឱ្យទៅដើមបណ្តឹងសម្រាប់យកទៅបើកនៅធនាគារ ABA ថ្ងៃទី២៥ ខែកញ្ញា ឆ្នាំ២០២១ ។
លុះដល់ថ្ងៃកំណត់ ដើមបណ្តឹងបានយកមូលប្បទានបត្រនោះទៅបើកប្រាក់ពីធនាគារ ស្រាប់តែខាងធនាគារបញ្ជាក់មកវិញថា សែកនេះគ្មានសាច់ប្រាក់ទេ គឺជាសែកស្អុយ ហើយចាប់ពីពេលនោះមក មេការសំណង់ឈ្មោះ ម៉ង់ សាម៉ន ក៏បានគេចវេះពីម្ចាស់បំណុលមិនព្រមរកការដោះស្រាយនោះទេ ទើបបានដើមបណ្តឹងប្តឹងសមត្ថកិច្ចឱ្យជួយចាត់ការតាមផ្លូវច្បាប់តែម្តង ៕
ដោយ ៖ រ៉ារ៉ា
