សារព័ត៌មាន នគរវត្ត តែងតែនាំមុខគេជានិច្ច
ក្លិបបិសាចក្រហម Manchester United បានរាយការណ៍ពីការខាតបង់ច្រើនជាងមុននៅក្នុងត្រីមាស៣ដោយសារប្រាក់ចំណូលពីការផ្សាយបានធ្លាក់ចុះ ហើយប្រាក់ឈ្នួលរបស់កីឡាករបានកើនឡើង ប៉ុន្មានថ្ងៃបន្ទាប់ពីក្លិប Premier League ខកខានមិនបានចូលលេងក្នុងក្របខ័ណ្ឌ Champions League អឺរ៉ុបនៅរដូវកាលក្រោយ។
ក្លិបបាល់ទាត់អង់គ្លេសមួយនេះទទួលបានកៅអីមួយក្នុង Europa League នៅរដូវកាលក្រោយ បន្ទាប់ពីបញ្ចប់យុទ្ធនាការលីកក្នុងស្រុកក្នុងចំណាត់ថ្នាក់ទី៦ដោយមាន៥៨ពិន្ទុ ដែលជាចំនួនទាបបំផុតរបស់ក្លិបនៅក្នុងយុគសម័យ Premier League ។
នាយកប្រតិបត្តិក្លិប Richard Arnold ដែលបានជំនួសតំណែងអនុប្រធានប្រតិបត្តិ Ed Woodward កាលពីដើមឆ្នាំនេះបាននិយាយថា “វាច្បាស់ណាស់ជារដូវកាលដ៏ខកចិត្តមួយសម្រាប់ក្រុមដំបូង។ ការងារកំពុងដំណើរការយ៉ាងល្អដើម្បីដោះស្រាយរឿងនេះ ដែលដឹកនាំដោយនាយកបាល់ទាត់របស់យើង លោក John Murtough និងអ្នកគ្រប់គ្រងថ្មីរបស់យើង Erik ten Hag”។
ក្លិប Old Trafford បាននាំយកលោក Ten Hag របស់ Ajax Amsterdam ជាគ្រូបង្វឹកថ្មីរបស់ពួកគេសម្រាប់រដូវកាលក្រោយ ដែលធ្វើឱ្យគ្រូបង្វឹកសញ្ជាតិហូឡង់ក្លាយជាអ្នកចាត់ការអចិន្ត្រៃយ៍ទី៥ដែលត្រូវបានតែងតាំងចាប់តាំងពីលោក Alex Ferguson បានបញ្ចប់ការគ្រប់គ្រងរយៈពេល២៦ឆ្នាំរបស់គាត់ក្នុងឆ្នាំ២០១៣។
ក្លិបដែលបានចុះបញ្ជីនៅញូវយ៉កបានរាយការណ៍ពីការខាតបង់សុទ្ធចំនួន២៧.៧លានផោន (៣៤.៩លានដុល្លារអាមេរិក) សម្រាប់រយៈពេល៣ខែដល់ថ្ងៃទី៣១ ខែមីនា ធៀបនឹងការខាតបង់ចំនួន១៨.១លានផោនកាលពីឆ្នាំមុន។
ទោះជាយ៉ាងណាក៏ដោយ ប្រាក់ចំណូលសរុបនៅក្លិបដែលជាកម្មសិទ្ធិរបស់គ្រួសារ Glazer ជនជាតិអាមេរិកបានកើនឡើង២៩ភាគរយដល់១៥៣លានផោនបន្ទាប់ពីការលក់ក្នុងថ្ងៃប្រកួតបានកើនឡើង២០ ដង ខណៈដែលកីឡដ្ឋាន Old Trafford បានស្វាគមន៍អ្នកគាំទ្រត្រលប់មកវិញដោយសមត្ថភាពពេញលេញបន្ទាប់ពីការរឹតបន្តឹងនៃ COVID-19 ។
ម្ចាស់ជើងឯក២០សម័យកាលរបស់អង់គ្លេសមិនបានឈ្នះពាន Premier League ចាប់តាំងពីការចាកចេញរបស់លោក Ferguson ខណៈដែលលើកចុងក្រោយក្រុមនេះបានឈ្នះជើងឯក Europa League ក្រោមការដឹកនាំរបស់លោក Jose Mourinho ក្នុងឆ្នាំ២០១៧។
ក្លិបដែលបានចុះហត្ថលេខាលើខ្សែប្រយុទ្ធព័រទុយហ្គាល់ Cristiano Ronaldo កាលពីឆ្នាំមុនបាននិយាយថា ប្រាក់ខែបានកើនឡើងជិត២០ភាគរយនៅក្នុងត្រីមាសដល់១០២លានផោន។ បំណុលសុទ្ធក៏បានកើនឡើង១១ភាគរយដល់ប្រហែល៤៩៦លានផោននៅចុងខែមីនា។ គ្រូបង្វឹកក្លិបបិសាចក្រហមថ្មីលោក Ten Hag បាននិយាយកាលពីដើមសប្តាហ៍នេះថា Ronaldo គឺជាផ្នែកនៃផែនការរបស់គាត់សម្រាប់ក្លិប ដោយរារាំងការរំពឹងទុកជុំវិញអនាគតរបស់ខ្សែប្រយុទ្ធវ័យ៣៧ឆ្នាំរូបនេះ ៕
ដោយ៖ ភារៈ(រូបភាព ៖ CNA)
