សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង ៖ យ៉ាងហោចណាស់ក៏មានសត្វគោចំនួន៥ក្បាលក្នុងចំណោម៧ក្បាលបានងាប់ស្តូកស្តឹងនៅលើផ្លូវជាតិលេខ៣១៤D បង្ករឱ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះមកជួយសម្រួលចរាចរណ៍ និងស្វែងរកម្ចាស់គោខណៈដែលមានរថយន្តមិនស្គាល់ម៉ាកបើកបុក។
ហេតុការណ៍នេះបានកើតឡើងកាលពីវេលាម៉ោង៩ និង៤៥នាទីយប់ថ្ងៃទី២៩ ខែឧសភា ឆ្នាំ២០២២ នៅលើផ្លូវជាតិលេខ៣១៤D ត្រង់ចំណុចមុខផ្សារកំពង់រោទ៍ ស្ថិតនៅក្នុងភូមិស្វាយអាណាត ឃុំញរ ស្រុកកំពង់រោទ៍ ខេត្តស្វាយរៀង។
សមត្ថកិច្ចនគរបាលបានឱ្យដឹងថា នៅមុនពេលកើតហេតុ មានរថយន្តមួយគ្រឿងមិនស្គាល់អត្តសញ្ញាណ បានធ្វើដំណើរពីទិសខាងត្បូងទៅទិសខាងជើងដោយបានបោះពួយយ៉ាងលឿន លុះមកដល់ចំណុចកើតហេតុខាងលើ ក៏បានបុករះសត្វគោចំនួន៧ក្បាលដែលកំពុងតែដេកនៅលើផ្លូវជាតិ បណ្ដាលឱ្យសត្វគោចំនួន៥ក្បាលបានងាប់ភ្លាមៗ នៅនឹងកន្លែងកើតហេតុ បង្កការភ្ញាក់ផ្អើលដល់អ្នកភូមិទាំងយប់។
ប្រភពបានឱ្យដឹងទៀតថា ក្នុងចំណោមសត្វគោទាំង៥ក្បាលដែលបានងាប់នោះ គឺមានសត្វគោ៤ក្បាលជារបស់ឈ្មោះ ឆេន សុវណ្ណី ភេទស្រី អាយុ៤៨ឆ្នាំ និងសត្វគោ១ក្បាលទៀតជារបស់ឈ្មោះ ភោគ វល័ក្ខ ភេទស្រី អាយុ៤៥ឆ្នាំ ដោយ អ្នកទាំងពីរមានទីលំនៅនៅភូមិស្វាយអាណាត ឃុំញរ ស្រុកកំពង់រោទ៍ ខេត្តស្វាយរៀង ៕
ដោយ៖ យឹម សុថាន
