សារព័ត៌មាន នគរវត្ត តែងតែនាំមុខគេជានិច្ច
ខេត្តកំពត៖ បើតាមការបញ្ជាក់ពីយុវជនឈ្មោះ ជឿង ហុង ដែលសម្រាកព្យាបាលនៅគ្លីនិកឯកជនមួយនៅជាប់ច្រកទ្វារអន្តរជាតិព្រែកចាក ក្នុងស្រុកកំពង់ត្រាច បានប្រាប់ឱ្យដឹងនៅព្រឹកថ្ងៃទី៣១ ខែឧសភា ឆ្នាំ២០២២នេះថា៖ រូបគេបានរងរបួសជើងខាងស្ដាំដោយសារតែគ្រាប់កាំភ្លើងកងទាហានវៀតណាមបានបាញ់រះមកលើក្រុមពលករខ្មែរដែលកំពុងលីបារីម៉ាក«ហេរ៉ូ» ឆ្លងដែនចំនួន១៤នាក់ បណ្ដាលឱ្យពលករផ្សេងៗរត់ចែកជេីងគ្នា។
ប្រភពដដែលបន្តថា ករណីខាងលើនេះកើតឡើងកាលពីវេលាម៉ោង០៣ និង៣០នាទីទៀបភ្លឺ ឈានចូលដល់ថ្ងៃទី៣១ ខែឧសភា ឆ្នាំ២០២២ នៅចំណុចស្ពានមុខបង្គោលលេខ៣០៩ ក្នុងភូមិកោះចំការ ឃុំបឹងសាខាងត្បូង ស្រុកកំពង់ត្រាច ខេត្តកំពត ។
ជនរងគ្រោះបានឱ្យដឹងទៀតថា៖ មុនពេលកេីតហេតុរូបគេជាមួយអ្នកភូមិជាច្រើននាក់បានជញ្ជូនបារីឆ្លងដែនចូលទៅក្នុងប្រទេសវៀតណាមខ្លួន ក្នុងនោះខ្លួនក៏បានស្ពាយបារីចំនួន២កេស ស្មើនឹងមួយរយសុងដើរឆ្លងទឹកឆ្លងភក់ប្រហែលមួយគីឡូម៉ែត្រចូលទៅវៀតណាម ។ ភ្លាមនោះ គ្រាន់តែដើរដល់ត្រង់ចំណុចស្ពានបង្គោលម៉ែត្រលេខ៣០៩ ស្រាប់តែទាហានវៀតណាមបានស្រែក ប៉ុន្តែពួកគាត់មិនចេះភាសារវៀតណាមឡើយ។ តែអ្នកខ្លះទៀតបានដើរឆ្លងស្ពាន ស្រាប់តែវៀតណាមបានបាញ់មកលើខ្លួនតែម្ដង បណ្ដាលឱ្យត្រូវរបួសជើងម្ខាងតែម្តង។
ប្រភពដដែលបន្តថា នៅពេលដែលរូបគេត្រូវរបួស និងបានរត់ចេញពីកន្លែងគ្រោះថ្នាក់ ព្រមគឺអ្នកលីបារីផ្សេងៗទៀតជាង១០នាក់បានរត់បែកគ្នាអស់។ បន្ទាប់មករូបគេ ក៏បានដើរមកលាងឈាមនៅមិនឆ្ងាយពីកន្លែងកើតហេតុ ហើយមិនយូរប៉ុន្មានខ្លួនក៏បានដួលសន្លប់ទៅ តែហើយមានអ្នករួមដំណើរបីនាក់ទៀតបានសែងយកមកដល់ទូក រួចដឹកយកមកព្យាបាលនៅគ្លីនិកតែម្តង។
ជុំវិញករណីនេះដែរ លោកឧត្តមសេនីយ៍ត្រីម្នាក់ទទួលបន្ទុកកិច្ចការព្រំដែន នៅថ្ងៃនេះក៏បានចូលទៅសាកសួរជនរងគ្រោះនៅក្នុងមន្ទីរពេទ្យ ដេីម្បីសាកសួរព័ត៌មានលម្អិតផងដែរ និងបានបញ្ជាក់ថា៖ ករណីទាហានវៀតណាមបាញ់រះនោះសង្ស័យជាគ្រាប់កាំភ្លើងកែច្នៃ៕
ដោយ៖សហការី
