សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល ៖ បេីយោងតាមប្រភពព័ត៌មានពីអគ្គស្នងការនគរបាលជាតិ បានឱ្យដឹងនៅព្រឹកថ្ងៃសៅរ៍ទី០៤ ខែមិថុនា ឆ្នាំ២០២២នេះថា៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល មានកិត្តិយសសូមធ្វើការឆ្លើយតបបំភ្លឺជូនសាធារណជន ចំពោះគណនីហេ្វសប៊ុកឈ្មោះ (អក្សរ ន៚) ដែលបានបង្ហោះផ្សព្វផ្សាយអមដោយរូបភាពជនរងគ្រោះ នៅថ្ងៃទី០២ ខែមិថុនា ឆ្នាំ២០២២ មានខ្លឹមសារថា៖ សង្ឃឹមតិចណាស់ និងបានខមិន ថា អធិការស្រុកមុខកំពូល លោក ឯក លន់ និយាយថា មិនមែនជាស្នាមកាប់ទេ ។ សូមមិនយល់ ! ចំណែកឯមន្ត្រីនគរបាលយុត្តិធម៌ស្រុកមុខកំពូល និងមន្ត្រីផ្សេងទៀតនិយាយថា មកពីមិនរត់ទើបគេវៃ ។ សូមគាំងមតិ !
ក្រោយពីទទួលបានព័ត៌មាននេះភ្លាម លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានបញ្ជាឱ្យលោកអធិការនគរបាលស្រុកមុខកំពូល ចំណាត់ការឆ្លើយតបបំភ្លឺករណីខាងលើ ។
ជាលទ្ធផល ៖ -ករណីហិង្សាដោយចេតនាមានស្ថានទម្ងន់ទោស កើតហេតុនៅថ្ងៃទី២៦.០៥.២០២២ វេលាម៉ោង១៧.៣០នាទី នៅចំណុចទ្វារទឹកបឹងតាសែន ស្ថិតក្នុងភូមិសាមគ្គី ឃុំព្រែកដំបង ស្រុកមុខកំពូល ខេត្តកណ្ដាល ។
ក្រោយពីកម្លាំងសមត្ថកិច្ចបានទទួលព័ត៌មាននៅវេលាម៉ោង ១៧.៤៥នាទី ភ្លាមនោះកម្លាំងប៉ុស្តិ៍នគរបាលរដ្ឋបាលព្រែកដំបង និងកម្លាំងជំនាញស្រុក បានចុះទៅដល់កន្លែងកើតហេតុ ហើយក៏បានឃាត់ខ្លួនជនសង្ស័យឈ្មោះ ម៉ៅ បញ្ញា ហៅតឿ ភេទប្រុស អាយុ២៧ឆ្នាំ បានចំនួន០១នាក់ ក្នុងពេលនោះក៏ឃើញជនរងគ្រោះចំនួន០៣នាក់ ឈ្មោះ ប៉ិច ក្រឹម ឈ្មោះ គង់ គួន និង ឈ្មោះ ទួនផាន់នី រងរបួសធ្ងន់ ហើយក្រុមគ្រួសារបានយកជនរងគ្រោះទាំង០៣នាក់ ទៅព្យាបាលរបួសនៅមន្ទីរពេទ្យភ្នំពេញ។
ក្រោយធ្វើការស្រាវជ្រាវ កម្លាំងប៉ុស្តិ៍ និងកម្លាំងជំនាញស្រុក បានបន្តឃាត់ខ្លួនជនសង្ស័យឈ្មោះ ម៉ៅ វុទ្ធី ភេទប្រុស អាយុ៣៤ឆ្នាំបានចំនួន០១នាក់ទៀត ចំណែកបក្ខពួកជនសង្ស័យចំនួន០៣នាក់ទៀត បានរត់គេចខ្លួន ។
ករណីនេះកម្លាំងជំនាញ បានកសាងសំណុំរឿង បញ្ជូនជនសង្ស័យចំនួន០២នាក់ ទៅអយ្យការអមសាលាដំបូងខេត្តកណ្តាល តាមនីតិវិធី រួចរាល់ហើយ ។ ដោយឡែក លោកវរសេនីយ៍ឯក ឯក លន់ អធិការនគរបាលស្រុកមុខកំពូល សូមបដិសេធ មិនបានបញ្ជាក់ថា មិនមែនជាស្នាមកាប់ ហើយមន្ត្រីជំនាញក៏មិនបាននិយាយថា មកពីមិនរត់ទើបគេវៃ ដូចម្ចាស់គណនីហ្វេសប៊ុកឈ្មោះ (អក្សរ ន៚) បានលើកឡើងនោះឡើយ ។
អាស្រ័យហេតុនេះ សូមសាធារណជន មេត្តាជ្រាប និងកុំមានការភាន់ច្រឡំ ៕
ដោយ៖សហការី
