សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បេីយោងតាមប្រភពព័ត៌មានពីក្រសួងបរិស្ថាន បានឱ្យដឹងនៅព្រឹកថ្ងៃសុក្រទី២៤ ខែមិថុនា ឆ្នាំ២០២២នេះថា៖ ស្វាព្រាម ឈ្មោះអង់គ្លេស៖ Indochinese Silvered Langur ឈ្មោះវិទ្យាសាស្រ្ត៖ Trachypithecus germaini។
ក្រសួងបរិស្ថាន បានបន្ថែមថា ក្បាល ដងខ្លួន និងផ្នែកកន្ទុយរបស់ស្វាព្រាមមានពណ៌ខ្មៅប្រផេះពាសពេញដងខ្លួន។ ផ្ទៃមុខមានពណ៌ខ្មៅគ្នានរង្វង់កងព័ទ្ធជុំវិញភ្នែក។ ផ្នែកច្រមុះ និងមាត់មានពណ៌ស ប្រផេះ និងមានដុះកញ្ចុំពុកមាត់វែងពណ៌សដុះព័ទ្ធជុំវិញផ្ទៃមុខស្ទើរតែលុបបាត់ត្រចៀក។
សម្បុរស្វាព្រាមប្រែប្រួលទៅតាមអាយុ និងភេទ។ សត្វប្រភេទនេះរស់នៅជាហ្វូងមានប្រមាណពី១០ ដល់៤០ក្បាល ឬច្រើនជាងនេះ នៅព្រៃតាមតំបន់ព្រៃស្រោង ព្រៃពាក់កណ្តាលស្រោង តំបន់ព្រៃលិចទឹក និងតំបន់ឆ្នេរព្រៃកោកាង។ ចំណីរបស់វារួមមាន ផ្លែឈើ និងផ្កាឈើ។
គេសង្កេតឃើញស្វាព្រាមមាននៅតំបន់ជួរភ្នំក្រវាញ តំបន់ជុំវិញបឹងទន្លេសាប ភូមិភាគខាងជើងបឹងទន្លេសាប និងនៅតាមព្រំប្រទល់កម្ពុជា វៀតណាម។ ស្វាព្រាមស្ថិតក្នុងក្រុមប្រភេទមានដោយបង្គួរនៅកម្ពុជា និងត្រូវបានចុះក្នុងបញ្ជីក្រហម IUCN ជាប្រភេទគំរាមកំហែង៕
ដោយ៖សហការី
