សារព័ត៌មាន នគរវត្ត តែងតែនាំមុខគេជានិច្ច
ខេត្តកំពត ៖ លោក បណ្ឌិត ម៉ៅ ធនិន អភិបាលខេត្តកំពត អញ្ជើញជាអធិបតីក្នុងពិធីប្រកាសបិទផ្សាយជាសាធារណៈនូវឯកសារនៃការវិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធ ក្នុងភូមិទូកមាស។
សូមបញ្ជាក់ថា, ថ្ងៃសុក្រ ទី០១ ខែកក្កដា ឆ្នាំ២០២២ លោក បណ្ឌិត ម៉ៅ ធនិន អភិបាល នៃគណៈអភិបាលខេត្តកំពត និងលោក ជឹង ផល្លា ប្រធានក្រុមប្រឹក្សាខេត្តកំពត បានអញ្ជើញជាអធិបតី ក្នុងពិធីប្រកាសបិទផ្សាយជាសាធារណៈ នូវឯកសារនៃការវិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធ ក្នុងភូមិទូកមាស ឃុំទូកមាសខាងលិច ស្រុកបន្ទាយមាស ខេត្តកំពត។
អញ្ជើញចូលរួម ក្នុងពិធីនាព្រឹកនេះរួមមាន លោក លោកស្រី សមាជិកក្រុមប្រឹក្សាខេត្ត លោក លោកស្រី អភិបាលរងខេត្ត លោក លោកស្រី នាយក នាយករង រដ្ឋបាលសាលាខេត្ត លោក ឧត្តមសេនីយ៍ទោ លោកឧត្តមសេនីយ៍ត្រី នៃកម្លាំងប្រដាប់អាវុធទាំង៣ប្រភេទ លោក លោកស្រី ប្រធានមន្ទីរអង្គភាពជុំវិញខេត្ត លោកអភិបាល អភិបាលរងស្រុក លោក លោកស្រីនាយក នាយករងទីចាត់ការ ប្រធាន អនុប្រធានអង្គភាពចំណុះសាលាខេត្ត ព្រមទាំងបងប្អូនប្រជាពលរដ្ឋប្រមាណ៣០០នាក់។
សូមជម្រាបថា នៅស្រុកបន្ទាយមាស បានចាប់ដំណើរការធ្វើការចុះបញ្ជីដីធ្លីមានលក្ខណៈជាប្រព័ន្ធចាប់ពីថ្ងៃទី០៧ ខែមីនា ឆ្នាំ ២០០៩ គិតមកដល់បច្ចុប្បន្នមានរយៈពេល ១៣ឆ្នាំ ហើយដែលទទួលបានលទ្ធផលដោយបានចុះបញ្ជីរួចបានចំនួន៦២ ភូមិ បានត្រៀមបិទផ្សាយទិន្នន័យជាសាធារណៈចំនួន ០៦ ភូមិ បានកំពុងរៀបចំបិទផ្សាយបន្តចំនួន០៣ ភូមិ កំពុងចុះបញ្ជី ចំនួន០១ ភូមិ។
ចំពោះភូមិទូកមាស មានផ្ទៃដីសរុបចំនួន៤៦១ហិកតា ក្នុងនោះដីលំនៅឋាន១១៥ ហិកតា និងដីកសិកម្ម ៣៤៦ហិកតាមានក្បាលដីសរុបចំនួន១២៣៤ក្បាលដី ស្មើនឹង២៩៨ គ្រួសារដែលត្រូវធ្វើការប្រកាសបិទផ្សាយ ទិន្នន័យជាសាធារណៈនៅថ្ងៃនេះ ៕
ដោយ ៖ សហការី
