សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ សិស្សសាលា២នាក់បាននាំគ្នាអង្គុយលេង ក្បែរមាត់ស្ទឹងសែន ខណៈពេលឈប់លេង បាននាំគ្នាចុះតាមជណ្តើរមាត់ស្ទឹងសែនលាងដៃ ដោយមិនបានប្រុងប្រយ័ត្ន រអិលជើងធ្លាក់ចូលទឹកស្ទឹងទាំង ២នាក់ តែបានអ្នកក្បែរៗឃើញក៏ជួយសង្គ្រោះទាន់ពេលបានកុមារីម្នាក់ តែម្នាក់ទៀតកំពុងបាត់ខ្លួន។
ហេតុការណ៍នេះ កើតឡើងវេលាម៉ោងប្រហែល ១២ ៖ ១៤នាទី ថ្ងៃទី១៨ ខែកក្កដា ឆ្នាំ២០២២នេះ ស្ថិតនៅចំណុចម្តុំពោងទឹក ក្នុងសង្កាត់កំពង់ធំ ក្រុងស្ទឹងសែន ខេត្តកំពង់ធំ ។
យោងតាមប្រភពនៅកន្លែងកើតហេតុបានឱ្យដឹងថា ក្មេងស្រី ២នាក់ដែលគេស្គាល់ថាជាសិស្សសាលាក្រុងស្ទឹងសែន បានចុះលាងដៃនៅមាត់ទឹកដោយសារនៅចំណុចនោះមានទឹកហូរខ្លាំងបណ្ដាលឲ្យក្មេងទាំងស្រីទាំង ២នាក់នោះបានលង់ទឹកនៅតាមដងស្ទឹងសែននេះ ។
លោក គឹម សុខមករា អធិការក្រុងស្ទឹងសែន បានឱ្យដឹងថាក្មេងស្រីរងគ្រោះទាំង២នាក់នោះ ៖
១/ ឈ្មោះ រ៉ុម វណ្ណដារី អាយុប្រហែល ៩ឆ្នាំ រៀនថ្នាក់ទី៤ នៅសាលាបឋមសិក្សាកំពង់ធំ ដែលមាន ម្តាយ ឈ្មោះ ហ៊ាន វេងដែន រស់នៅភូមិកំពង់ធំ សង្កាត់កំពង់រទេះ ក្រុងស្ទឹងសែន ត្រូវបានប្រជាពលរដ្ឋជួយសង្គ្រោះបាន។
ដោយឡែក ក្មេងស្រីទី ២ មានឈ្មោះ ធឿន សុខរក្សា អាយុប្រហែល១០ឆ្នាំ រស់នៅភូមិទី១ សង្កាត់កំពង់ធំ ដែលមានឪពុកឈ្មោះ ហុង ថុល និងម្ដាយឈ្មោះ ខេង គឹមលាន (គ្រូបង្រៀន) បានបាត់ខ្លួនលិចក្នុងទឹករកមិនទាន់ឃើញ ខណៈនេះដែរកម្លាំងអធិការក្រុងស្ទឹងសែនកំពុងបើកកាណូតរុករក។
ជាមួយគ្នានេះដែរលោក គឹម សុខមករា អធិការក្រុងស្ទឹងសែនសូមអំពាវនាវឲ្យបងប្អូនប្រជាពលរដ្ឋទាំងអស់ ដែលនៅតាមដងស្ទឹងសែន ត្រូវមានការប្រុងប្រយ័ត្ន ពីព្រោះទឹកស្ទឹងសែនកំពុងតែឡើងដូច្នេះសូមបងប្អូនមានការប្រុងប្រយ័ត្នចំពោះកូនដែលនៅតូចឱ្យបានខ្ពស់ចំពោះពួកគាត់។
គួរបញ្ជាក់ផងដែរខណៈពេលនេះអាជ្ញាធរ សមត្ថកិច្ច និងក្រុមគ្រួសារសាច់ញាតិកំពុង ញាប់ដៃ ញាប់ជើងក្នុងការស្វែងរក ក្មេងស្រីដែលបាត់ខ្លួន ចំណែកកុមារីម្នាក់ទៀតកំពុងជួយសង្គ្រោះបន្ទាន់នៅមន្ទីរពេទ្យខេត្ត ៕
ដោយ៖ សហការី(កំពង់ធំ)
