សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ការនាំអង្ករចេញទៅក្រៅប្រទេសមានការធ្លាក់ចុះបន្តិចបន្តួចដោយសារបញ្ហាវិបត្តិសង្រ្គាមរវាងរុស្ស៊ីនិងអ៊ុយក្រែន។ឧបសគ្គនោះគឺការឡើងថ្លៃនៃសេវាដឹកជញ្ជូន។ យ៉ាងណាក៏ដោយសហព័ន្ធស្រូវអង្ករកម្ពុជារំពឹងថាអ្វីនឹៗងប្រសើរឡើងវិញនៅឆមាសទី ២ ឆ្នាំនេះ។ដូច្នេះមានន័យថាអ្វីៗនឹងប្រសើរឡើងនៅរង្វង់ចុងឆ្នាំ ២០២២នេះ។
ប្រធានសហព័ន្ធស្រូវអង្ករកម្ពុជា រំពឹងការនាំចេញអង្ករនៅចុងឆ្នាំនេះ នឹងមានកំណើនកើនឡើងខ្ពស់ អាចនឹងសម្រេចតាមផែនការ ខណៈតម្លៃប្រេងត្រូវបានព្យាករណ៍នឹងបន្តធ្លាក់ចុះ ស្របពេលកម្ពុជាកំពុងពង្រីកទីផ្សារថ្មីៗបន្ថែម។ ដោយសារតែការពង្រីកបាននៅទីផ្សារថ្មីៗនៅអឺរ៉ុបនោះហើយដែលគេរំពឹងថាការនាំចេញអង្ករកម្ពុជានឹងមានការកើនឡើងឡើងបើទោះបីជាមានឧបសគ្គបន្តិចបន្តួចក៏ដោយ។
លោក សុង សារ៉ន ប្រធានសហព័ន្ធស្រូវអង្ករកម្ពុជាបានថ្លែងថា ក្នុងដំណាក់កាលកន្លងមកនេះ ការជួញដូរការ នាំចេញទីផ្សារអង្ករ និងចំណីអាហារមានការប្រែប្រួល ដោយសារវិបត្តិសង្រ្គាមរុស្សី-អ៊ុយក្រែន ជាក់ស្តែង១នៅ ឆមាសកន្លងមកនេះ មានការជួបបញ្ហាប្រឈមនឹងការដឹកជញ្ជូន ដោយសារការហក់ឡើងខ្ពស់ថ្លៃដឹកជញ្ជូន។
លោកឧកញ៉ាសុង សារ៉ន បន្តថា ជុំវិញការនាំចេញអង្ករនេះ សហព័ន្ធស្រូវអង្ករកម្ពុជា រំពឹងថា ចាប់ពីខែនេះ រហូតដល់ខែ ធ្នូ ឆ្នាំ២០២២ ការនាំចេញអង្កររបស់កម្ពុជា នឹងមានកំណើនងើបឡើងវិញ អាចឆ្លើយតបតាមផែនការកំណត់របស់សហព័ន្ធ ខណៈដែលទីផ្សារប្រទេសនីមួយៗមានតម្រូវការ លើប្រភេទអង្ករមួយចំនួនរបស់កម្ពុជាបន្ថែម ។ អ្វីដែលពិសេសជាងនេះទៅទៀតនោះគឺប្រទេសជាច្រើនទៀតបានកម្មង់ទិញប្រទេសកម្ពុជាយើង។
ចំណែកទាក់ទងផែនការរបស់សហព័ន្ធស្រូវអង្ករកម្ពុជាវិញ, នៅក្នុងឆ្នាំ ២០២២ នេះ សហព័ន្ធស្រូវអង្ករ បានកំណត់ផែនការសកម្មភាពនៃការនាំចេញអង្ករឲ្យបានចន្លោះពី ៧៥ ទៅ ៨០ ម៉ឺនតោន ដែលចាត់ទុកជាការបើកទំព័រថ្មីក្នុងឆ្នាំ ២០២២ ជាឆ្នាំស្តារស្ថានភាពឱ្យមានកំណើន បន្ទាប់ពីកម្ពុជាបានជួបឧបសគ្គមួយចំនួន នៃការនាំចេញអង្ករនាពេលកន្លងមក ៕
ដោយ៖ សូរិយា
