សារព័ត៌មាន នគរវត្ត តែងតែនាំមុខគេជានិច្ច
ក្លិប DC United បានចុះហត្ថលេខាលើខ្សែប្រយុទ្ធសញ្ជាតិបែលហ្ស៊ិក Christian Benteke ពីក្លិប Crystal Palace នៅអង់គ្លេស។ កីឡាករវ័យ៣១ឆ្នាំរូបនេះបានចូលរួមជាមួយក្រុម Major League Soccer ដែលជាលីកកំពូលអាមេរិកក្នុងកិច្ចសន្យារយៈពេល២ឆ្នាំកន្លះ ដោយក្លិបមានជម្រើសកិច្ចសន្យារហូតដល់ឆ្នាំ២០២៥។
ខ្សែប្រយុទ្ធ Christian Benteke បានចំណាយពេល១០រដូវកាលចុងក្រោយនៅ Premier League ជាមួយក្រុម Aston Villa, Liverpool និង Crystal Palace ជាកន្លែងដែលគាត់មានកុងត្រាមួយឆ្នាំទៀត។
គ្រូបង្វឹកក្លិប DC United លោក Wayne Rooney បាននិយាយថា”Christian ជាកីឡាករកំពូលម្នាក់ដែលលេងក្នុងកម្រិតខ្ពស់បំផុតជាយូរមកហើយ។ បទពិសោធន៍ និងសមត្ថភាពរបស់គាត់ក្នុងការស៊ុតបញ្ចូលទី និងជួយក្រុមនឹងមានតម្លៃមិនអាចកាត់ថ្លៃបាន។ វាពិតជារំភើបសម្រាប់ក្រុម និងខ្លួនខ្ញុំក្នុងការនាំគាត់ចូល។ គាត់នឹងធ្វើឱ្យមានការផ្លាស់ប្តូរយ៉ាងខ្លាំង” ។
Benteke ស៊ុតបញ្ចូលទីបាន៨៦គ្រាប់ពីការបង្ហាញខ្លួន២៨០ប្រកួតនៅ Premier League ចាប់តាំងពីចូលរួមជាមួយ Aston Villa ពីក្លិប Genk កាលពីឆ្នាំ២០១២។ ចំនួនសរុបដ៏ល្អបំផុតរបស់គាត់ក្នុងរដូវកាល Premier League តែមួយគឺ១៩គ្រាប់ក្នុងឆ្នាំ២០១២–២០១៣ ហើយគាត់រកបាន៣២.៥លានផោនពេលផ្ទេរទៅ Liverpool ក្នុងឆ្នាំ២០១៥។
បន្ទាប់មកក្លិប Crystal Palace បានចំណាយក្នុងកំណត់ត្រាក្លិបចំនួន២៧លានផោនដើម្បីចុះហត្ថលេខាលើ Benteke នៅរដូវក្តៅបន្ទាប់ ហើយគាត់បានបន្តតំណាងឱ្យប្រទេសបែលហ្ស៊ិកដោយស៊ុតបញ្ចូលទី១៨គ្រាប់ក្នុង៤៥ប្រកួតសម្រាប់ប្រកួតអន្តរជាតិ។
លោក Rooney បានត្រឡប់មក DC United វិញក្នុងនាមជាគ្រូបង្វឹកកាលពីខែមុន ហើយបានចុះហត្ថលេខាលើខ្សែបម្រើស្លាបសញ្ជាតិចាម៉ីកាRavel Morrison ដែលធ្លាប់បានលេងក្រោមការដឹកនាំគាត់កាលនៅក្លិបDerby County កាលពីរដូវកាលមុន។
លោក Dave Kasper ប្រធានផ្នែកប្រតិបត្តិការបាល់ទាត់របស់ក្លិប DCUnited បាននិយាយថា “ការដែលអាចនាំយកកីឡាករលំដាប់ពិភពលោកម្នាក់ដែលមានសមត្ថភាពរបស់ Christian Benteke គឺជាសក្ខីភាពដ៏ធំមួយចំពោះអ្វីដែលកំពុងកើតឡើងនៅពីក្រោយក្លិប និងសមត្ថភាពរបស់យើងក្នុងការទាក់ទាញទេពកោសល្យកំពូលទូទាំងពិភពលោក” ។
លោកបញ្ជាក់ថា “យើងមានភាពសកម្មយ៉ាងខ្លាំងនៅក្នុងទីផ្សារដោះដូរកីឡាករ ដោយបាននាំយកកីឡាករចំនួន៦នាក់ ហើយចាប់តាំងពីការតែងតាំងរបស់លោក Wayne Rooney ជាគ្រូបង្វឹករបស់យើង យើងជឿថា យើងបានបោះជំហានសំខាន់ៗក្នុងការដាក់បញ្ចូលបញ្ជីឈ្មោះដែលទាំងពីរអាចជំរុញឱ្យបញ្ចប់រដូវកាលនេះឱ្យរឹងមាំ និងកសាងមូលដ្ឋានគ្រឹះសម្រាប់ពួកយើងឆ្ពោះទៅមុខ” ៕
ដោយ៖ ភារៈ(រូបភាព ៖ BBC Sport)
