សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បេីយោងតាមប្រភពព័ត៌មានពីក្រសួងសាធារណការ និងដឹកជញ្ជូន នៅព្រឹកថ្ងៃសៅរ៍ទី២៧ ខែសីហា ឆ្នាំ២០២២នេះ បានបង្ហាញពីសិទ្ធិអាទិភាពនៅផ្លូវប្រសព្វ មានផ្លាកសញ្ញាចរាចរណ៍ ” ផ្តល់សិទ្ធិអាទិភាពឱ្យគេ ” និងផ្លាកសញ្ញា ” ផ្លូវសំខាន់មានសិទ្ធិ ” តើអ្នកបើកបរត្រូវផ្តល់សិទ្ធិឲ្យយានយន្តណាមួយទៅមុន?
ក្រសួងសាធារណការ បានឱ្យដឹងថា អ្នកបើកបរត្រូវស្វែងយល់ពីសិទ្ធិអាទិភាពនៅលើផ្លូវប្រសព្វ និងមានស្មារតីយកចិត្តទុកដាក់ក្នុងការបើកបរ ជៀសវាងការបង្កគ្រោះថ្នាក់ និងការកកស្ទះនៅពេលធ្វើចរាចរណ៍លើផ្លូវសាធារណៈ។
ក្រសួងសាធារណការ ក៏បានបង្ហាញពីផ្លាកសញ្ញាគ្រោះថ្នាក់៖ “ ផ្លូវមានទួល ,ផ្លូវទឹករលក និងមានកុមារឆ្លងកាត់ “។ ផ្លាកសញ្ញាគ្រោះថ្នាក់ ដែលមាននៅលើដងផ្លូវសាធារណៈ គឺដាក់បង្ហាញសម្រាប់ពញ្ញាក់អារម្មណ៍ដល់អ្នកបើកបរបានដឹង មានការប្រុងប្រយ័ត្នពិសេសថែមទៀត ដើម្បីជៀសវាងគ្រោះថ្នាក់ដែលអាចកើតមានជាយថាហេតុ និងត្រូវបន្ថយល្បឿន និងអនុវត្តតាមខ្លឹមសារ នៃសញ្ញានេះជាដាច់ខាត។
គួរបញ្ជាក់ដែរថា បច្ចុប្បន្ននេះ កម្លាំងនគរបាលទូទាំងប្រទេសកម្ពុជា ដេីម្បីកាត់បន្ថយការគ្រោះថ្នាក់ចរាចរណ៍ណាមួយដែលអាចកើតមានឡើងជាយថាហេតុ ក៏បានចុះផ្សព្វផ្សាយនៅតាមសាលារៀននានា បានយល់ដឹងបន្ថែមពីច្បាប់ចរាចរណ៍ផ្លូវគោក និងបានប្រគល់សៀវភៅច្បាប់ស្តីពីចរាចរណ៍ និងរូបសញ្ញាចរាចរណ៍ផ្លូវគោក ជូនដល់សិស្សានុសិស្ស លោកគ្រូ-អ្នកគ្រូ និងបានណែនាំអំពីផ្លាកសញ្ញាចរាចរណ៍ផ្លូវគោកសំខាន់ៗ មួុយចំនួន៕
ដោយ៖សហការី
