សារព័ត៌មាន នគរវត្ត តែងតែនាំមុខគេជានិច្ច
ខេត្តរតនគិរី៖ កម្មករបីនាក់ត្រូវចរន្តភ្លើងអគ្គីសនីឆក់បណ្ដាលឱ្យរងរបួសយ៉ាងធ្ងន់ធ្ងរខណៈដែលពួកគេបានដូរខ្សែភ្លើងពីបង្គោលចាស់ផ្លាស់មកដាក់ទៅលើបង្គោលថ្មីដែលមានការធ្វេសប្រហែសមិនបានកាច់បារ៉ែតផ្តាច់ចរន្ត។
ហេតុការណ៍កម្មករឆក់ចរន្តភ្លើងនោះបានកើតឡើងនៅព្រឹកថ្ងៃទី៣ខែកញ្ញាឆ្នាំ២០២២ស្ថិតក្នុងភូមិ៧មករា សង្កាត់ឡាបានសៀក ក្រុងបានលុង ខេត្តរតនគិរីនៅតាមបណ្ដោយផ្លូវជាតិលេខ៧៨។
កម្មកររងគ្រោះទាំងបីនាក់នោះមាន ៖
ទី១.ឈ្មោះ ភេត ភុត ភេទប្រុសជនជាតិខ្មែរអាយុ១៩ឆ្នាំ។
ទី២.ឈ្មោះ សាក់ មេឃ ភេទប្រុសជនជាតិខ្មែរអាយុ២០ឆ្នាំ។
ទី៣.ឈ្មោះ ភាព សុផង់ ភេទប្រុសជនជាតិខ្មែរអាយុ១៨ឆ្នាំ។
ពួកគេទាំង៣នាក់មានទីលំនៅភូមអភិវឌ្ឍន៍សង្កាត់ឡាបានសៀកក្រុងបានលុងខេត្ដរតនគិរី។
បច្ចុប្បន្នកំពុងធ្វើការសង្គ្រោះបន្ទាន់ពីក្រុមគ្រូពេទ្យបង្អែកខេត្តរតនគិរីពីរនាក់នៅភ្នំពេញម្នាក់។
ប្រភពបានឱ្យដឹងថាមុនកើតហេតុមានកម្មករមួយក្រុមបានទៅខួងដីដាំបង្គោលភ្លើងថ្មី នៅឯបបង្គោលចាស់ហើយពួកគេបាននាំគ្នាឡើងទៅដោះខ្សែភ្លើងចេញពីបង្គោលចាស់ដើម្បីដាក់ពាក់ទៅលើបង្គោលថ្មី ប្រហែលជាខុសបច្ចេកទេសមិនបានកាច់បារ៉ែតផ្តាច់ចរន្ដភ្លើងអគ្គិសនីក៏ត្រូវឆក់ពួកគេទាំងបីនាក់នោះតែម្ដង។
ក្នុងពេលកើតហេតុការណ៍នោះគេឃើញមានកម្លាំងនគបាលមូលដ្ឋានបានចុះជួយអន្ដរាគមន៍ហើយហៅឡានពេទ្យមកដឹកទៅកាន់មន្ទីរទាន់ពេលភ្លាមៗដែរ។
លោកកោះ ប៉ូឡូ អនុប្រធានមន្ទីរពេទ្យបង្អែកខេត្ដរតនគិរីបានប្រាប់ថាជនរងគ្រោះទាំងបីនាក់ដែលខ្សែភ្លើងឆក់ពួកគេមានសភាពធ្ងន់ធ្ងរហើយកំពុងតែសង្រ្គោះបន្ទាន់ផងដែរ។
ក្នុងចំណោមបីនាក់មានម្នាក់ត្រូវបញ្ជូនទៅភ្នំពេញព្រោះរងរបួសធ្ងន់លើស្បែកលើដងខ្លួនខ្លោចស្ទើរពេញទាំងអស់។
ប្រភពពីមន្រ្តីអគ្គិសនីខេត្ដថាកម្មករបីនាក់ដែលខ្សែភ្លើងឆក់នោះមិនមែនជាបុគ្គលិករបស់អង្គភាពអគ្គិសនីឡើយគឺជាកម្មកររបស់ក្រុមហ៊ុនEBSដែលដេញថ្លៃបានហើយទទួលសាងសង់បង្គោលភ្លើងក្នុងខេត្ដរតនគិរីនោះ ៕
ដោយ ៖ ជីវ័ន្ត
