សារព័ត៌មាន នគរវត្ត តែងតែនាំមុខគេជានិច្ច
ខេត្តកោះកុង៖ ជនស៉ីវិល២នាក់ ក្នុងចំណោមបក្ខពួក៤នាក់ ត្រូវបានកម្លាំងកងរាជអាវុធហត្ថ និងបុគ្គលិកអង្គការសម្ព័នមិត្តសត្វព្រៃ ឃាត់ខ្លួនពាក់ព័ន្ធនឹងការបាញ់សម្លាប់សត្វព្រៃដោយខុសច្បាប់ក្នុងតំបន់ការពារធម្មជាតិនៅស្រុកថ្មបាំង កាលពីយប់ថ្ងៃទី៦ ខែកញ្ញា ឆ្នាំ២០២២ នៅភូមិទឹកល្អក់ឃុំ ជីផាតស្រុកថ្មបាំង ខណៈបក្ខពួកពីរនាក់ផ្សេងទៀតកំពុងរត់គេចខ្លួន។ នេះបេីយោងតាមប្រភពព័ត៌មានពីរបាយការណ៍របស់ស្នងការដ្ឋាននគរបាលខេត្តកោះកុង បានឱ្យដឹងនៅព្រឹកថ្ងៃពុធទី០៧ ខែកញ្ញា ឆ្នាំ២០២២។
របាយការណ៍ដដែលបន្តថា បុរសទាំង២នាក់នេះ៖ ទី១.ឈ្មោះ ស្រី វាសនា អាយុ ៣៥ឆ្នាំ មានមុខរបរ ជាបុគ្គលិកក្រុមហ៊ុន មានទីលំនៅ ភូមិអូរដឹម សង្កាក់ចោមចៅ ខណ្ឌពោធិ៍សែនជ័យ រាជធានីភ្នំពេញ និងទី២.ឈ្មោះ ហុង រ័ត្នមុនី អាយុ២៩ឆ្នាំ មានទីលំនៅសង្កាត់ទឹកល្អក់១ ខណ្ឌទួលគោក រាជធានីភ្នំពេញ។
ចំណែកវត្ថុតាងដែរបានដកហូតរួមមាន៖ រថយន្តម៉ាក ហ្វតពណ៌ត្រេអុី ពាក់ផ្លាកលេខ២-៤៧៩៣ ខេមរ:ភូមិន្ទ២ ចំនួនមួយគ្រឿង , សត្វប្រើសមួយក្បាល, សំពោចមួយក្បាល, សាច់សត្វមួយស្បោងតូច, អាវុធចំនួនប្រាំដើម (វែង០២ដើម ខ្លី០៣ដើម )និងគ្រាប់ចំនួន៥៩គ្រាប់ ។
ប៉ុន្តែជុំវិញករណីខាងលេីនេះ សមត្ថកិច្ចនគរបាលខេត្តកោះកុង មិនបានបញ្ជាក់អំពីអត្តសញ្ញាណជនសង្ស័យជាកងកម្លាំងនៅអង្គភាពនោះទេ ក្នុងពេលពួកគេបានបើកបរថយន្តផ្លាកលេខ ខ.ម ចូលទៅតំបន់ការពារធម្មជាតិជួរភ្នំក្រវាញខាងត្បូង ដើម្បីបរបាញ់សត្វ។
ដោយឡែកអនុប្រធានមន្ទីរបរិស្ថានខេត្តកោះកុង លោក វ៉េត សុខនីម ក៏បានឱ្យដឹងដែរថា បច្ចុប្បន្ន ជនសង្ស័យទាំងពីរនាក់កំពុងឃុំខ្លួននៅក្នុងមន្ទីរបរិស្ថានខេត្តកោះកុង ដោយបន្តកសាងសំណុំរឿងបញ្ជូនទៅតុលាការ ចាត់ការតាមនីតិវិធីច្បាប់ ៕
ដោយ៖សហការី
