សារព័ត៌មាន នគរវត្ត តែងតែនាំមុខគេជានិច្ច
ប្រទេសជប៉ុន ៖ ស្ថានឯកអគ្គរាជទូតព្រះរាជាណាចក្រកម្ពុជាប្រចាំប្រទេសជប៉ុន ដឹកនាំដោយ លោក ទុយ រី ឯកអគ្គរាជទូតវិសាមញ្ញនិងពេញសមត្ថភាព អមដំណើរដោយមន្ត្រីនៃស្ថានទូត និងពុទ្ធបរិស័ទជាច្រើននាក់ បានអញ្ជើញចូលរួមក្នុងពិធីបុណ្យកាន់បិណ្ឌវេនទី១ នៅវត្តខ្មែរសាមគ្គីស្ថិតនៅតំបន់អៃហ្កាវ៉ា ខេត្តហ្កាណាកាវ៉ា ប្រទេសជប៉ុន ។
សូមបញ្ជាក់ថា, ពិធីនេះបានធ្វើឡើងនៅព្រឹកថ្ងៃអាទិត្យ ១រោច ខែភទ្របទ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១១ ខែកញ្ញា ឆ្នាំ២០២២ ដែលជាវេនកាន់បិណ្ឌទី១ ស្របពេលដែលប្រជាពលរដ្ឋពុទ្ធសាសនិកជនទូទាំងប្រទេសកម្ពុជា កំពុងចូលរួមសប្បាយរីករាយប្រកបដោយសទ្ធាជ្រះថ្លានៅក្នុងពិធីនះផងដែរ ។
លោក ឯកអគ្គរាជទូតនិងមន្ត្រីនៃស្ថានទូត បាននាំយកនូវទេយ្យទាន គ្រឿងឧបភោគបរិភោគ និងថវិកាមួយចំនួនទៅវេរប្រគេនព្រះសង្ឃដើម្បីឧទ្ទិសកុសលផលបុណ្យដល់ដួងវិញ្ញាណក្ខន្ធជីដូនជីតា បុព្វការីជន ញាតិការទាំង៧សន្តាន ដែលបានចែកឋានទៅកាន់បរលោក។
សូមបញ្ជាក់ទៀតថា, គ្រឿងទេយ្យទាន និងទេយ្យវត្ថុដែលយកទៅប្រគេនព្រះសង្ឃរួមមាន អង្ករ ស្ករស ទឹកត្រី ទឹកសុីអុីវ ត្រីខ ទឹកក្រូច ទឹកបរិសុទ្ធ និងបច្ច័យមួយចំនួនទៅវេប្រគេនព្រះសង្ឃគង់នៅវត្តខ្មែរសាមគ្គី ប្រទេសជប៉ុន។
នៅក្នុងឱកាសនោះផងដែរ លោក ឯកអគ្គរាជទូត បានជួបសំណេះសំណាល និងសួរសុខទុក្ខបងប្អូនខ្មែរដែលកំពុងរស់នៅប្រទេសជប៉ុន និងជម្រាបអំពីទំនាក់ទំនងកិច្ចសហប្រតិបត្តិការល្អ កាន់តែជិតស្និទ្ធរវាងកម្ពុជា ជប៉ុន ព្រមទាំងមានការអភិវឌ្ឍន៍គ្រប់វិស័យនៅប្រទេសកម្ពុជា ឯកឧត្តមបានបញ្ជាក់ថា ទាំងអស់នេះគឺជាការខិតខំប្រឹងប្រែងរបស់រាជរដ្ឋាភិបាលកម្ពុជា ដឹកនាំដោយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងគុណតម្លៃនៃសន្តិភាព ដែលបានមកដោយលំបាក ឯកឧត្តមក៏បានរំព្ញកឲ្យប្រជាពលរដ្ឋខ្មែររស់នៅប្រទេសជប៉ុនទាំងអស់ រួមគ្នាបន្តថែរក្សាការពារសន្តិភាពនៅកម្ពុជាឱ្យបានកាន់តែរឹងមាំថែមទៀត៕
ដោយ ៖ សិលា
