សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ ៖ អភិបាលខេត្តបន្ទាយមានជ័យ លោក អ៊ុំ រាត្រី បានឱ្យដឹងថា បើទោះបីមានភ្លៀងបន្តធ្លាក់ជារៀងរាល់ថ្ងៃ ប៉ុន្តែខេត្តបន្ទាយមានជ័យ មិនមានការប្រឈមនឹងជំនន់ទឹកភ្លៀងនៅឡើយទេ។ អាជ្ញាធរព្រួយ បារម្ភខ្លាចជំនន់ទឹកភ្លៀងធ្លាក់មកពីប្រទេសថៃដែលអាចធ្វើឲ្យជន់លិចដល់ភាគខ្លះនៅខេត្តបន្ទាយមានជ័យ។
នៅថ្ងៃទី១៣ ខែកញ្ញា ឆ្នាំ២០២២ លោក អ៊ុំ រាត្រី អភិបាលខេត្តបន្ទាយមានជ័យនិងសហការីកងកម្លាំងប្រដាប់អាវុធ បានចុះពិនិត្យស្ថានភាពទឹកជំនន់ដែលធ្លាក់មកពីប៉ែកខាងលិចនៃឃុំសឿ ស្ថិតក្នុងភូមិបល្ល័ង្គជ្រៃ ឃុំសឿ ស្រុកមង្គលបូរី។
លោកអភិបាលខេត្តបញ្ជាក់ថា គិតត្រឹមថ្ងៃនេះ ក្នុងភូមិសាស្ត្រខេត្តបន្ទាយមានជ័យ ពុំទាន់មានគ្រោះទឹក ជំនន់កើតឡើងនោះទេ មានតែស្ថានភាពទឹកហូរពីទីខ្ពស់មកកាន់តំបន់ទំនាបបឹង និងស្ទឹង ដែលបានធ្វើ ឱ្យស្ថានភាពមានការកើនឡើង កន្លែងខ្លះមានការជន់លិចផ្លូវ និងហូរកាត់ផ្លូវត្រង់ទីតាំងមុខទឹកនៅតំបន់ទំនាបតែប៉ុណ្ណោះ។
នៅក្នុងឱកាសនោះលោកអភិបាលខេត្តបានក្រើនរំលឹកដល់មន្ត្រីពាក់ព័ន្ធ និងអាជ្ញាធរមូលដ្ឋានត្រូវផ្តល់កិច្ចសហការក្តាប់ព័ត៌មាន និងរាយការណ៍ឲ្យបានទាន់ពេលវេលាចំពោះករណីស្ថានភាពទឹកក្នុងករណីមានការហក់ឡើងខ្លាំងជាការព្រួយបារម្ភណាមួយ៕
ដោយ៖ សូរិយា
