សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យ៥នាក់ ត្រូវបានកម្លាំងសមត្ថកិច្ចប៉ុស្តិ៍នគរបាលរដ្ឋបាលស្ទឹងមានជ័យទី៣ ធ្វើការស្រាវជ្រាវឃាត់ខ្លួននៅថ្ងៃទី២១ ខែកញ្ញា ឆ្នាំ២០២២ នៅចំណុចផ្លូវបេតុងភូមិឬស្សីទី២ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ បន្ទាប់ពីពួកគេធ្វើសកម្មភាពគាស់សោរទ្វារចូលលួចទ្រព្យសម្បត្តិក្នុងផ្ទះប្រជាពលរដ្ឋនាពេលកន្លងទៅ ។
លោកវរសេនីយ៍ត្រី ឯម ភារី នាយប៉ុស្តិ៍នគរបាលរដ្ឋបាលស្ទឹងមានជ័យទី៣ បានឲ្យដឹងថា ជនសង្ស័យ០៥នាក់ដែលឃាត់ខ្លួនបានរួមមាន ៖
ទី១ ឈ្មោះសេង គឹមហ៊ត អាយុ៣០ឆ្នាំ មុខរបរមិនពិតប្រាកដស្នាក់នៅភូមិឬស្សីទី២ សង្កាត់ស្ទឹងមានជ័យទី៣ ខណ្ឌមានជ័យ ។
ទី២ ឈ្មោះ រុណ អាយុ៣០ឆ្នាំមុខរបរមិនពិតប្រាកដស្នាក់នៅភូមិឫស្សី៣ សង្កាត់ស្ទឹងមានជ័យទី២ ខណ្ឌមានជ័យ ។
ទី៣ ឈ្មោះ វ៉ាន់ វាសនា អាយុ៣០ ឆ្នាំមុខរបរមិនពិតប្រាកដ ស្នាក់នៅភូមិដំណាក់ធំ២ សង្កាត់ស្ទឹងមានជ័យទី៣ ខណ្ឌមានជ័យ ។
ទី៤ ឈ្មោះ ញឹម មង្គល អាយុ៣០ឆ្នាំមុខរបរមិនពិតប្រាកដ ស្នាក់នៅភូមិដំណាក់ធំ៥ សង្កាត់ស្ទឹងមានជ័យទី៣ ខណ្ឌមានជ័យ។
ទី៥ ឈ្មោះ សៀង ហេង អាយុ៤០ឆ្នាំមុខរបររត់ម៉ូតូឌុប ស្នាក់នៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។
អ្នកទាំង៥នាក់មានផ្ទុកសារធាតុញៀនក្នុងខ្លួន។
ចំណែកជនរងគ្រោះមានឈ្មោះតាំង យ៉ុងយាង អាយុ ៣២ឆ្នាំ ស្នាក់នៅភូមិឫស្សីទី១ សង្កាត់ស្ទឹងមានជ័យទី៣ ខណ្ឌមានជ័យ។
តាមសម្ដីលោកវរៈសេនីយ៍ត្រី ឯម ភារី នាយប៉ុស្តិ៍នគរបាលរដ្ឋបាលស្ទឹងមានជ័យទី៣ បានប្រាប់ឲ្យដឹងទៀតថា កាលពីយប់ថ្ងៃទី១៩ ខែកញ្ញា ឆ្នាំ ២០២២ វេលាម៉ោង ៩ និង៣០នាទី ជនរងគ្រោះបានមកពីញ៉ាំអីនៅខាងក្រៅហើយបានយកម៉ូតូយ៉ាមហា ពណ៌ក្រហម ពាក់ស្លាកលេខ ភ្នពេញ 1HG -2356 ទុកនៅខាងក្រោមហេីយក៏ចាក់សោទ្វារត្រឹមត្រូវដូចរាល់ដង រួចជនរងគ្រោះបានឡើងទៅដេកនៅបន្ទប់ខាងលើ។
រហូតដល់ម៉ោង ១២ររំលងអធ្រាតឈានចូលថ្ងៃទី២០ ក៏មានជនសង្ស័យចំនួន០៥នាក់ បានមកធ្វើសកម្មភាពគាស់សោទ្វារផ្ទះចូលទៅលួចយកម៉ូតូនិងទ្រព្យសម្បត្តិមួយចំនួនហើយគេចខ្លួនបាត់អស់។
លុះដល់ព្រឹកឡើងខែឆ្នាំដដែល ជនរងគ្រោះក៏បានមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលស្ទឹងមានជ័យទី៣ ដើម្បីឲ្យសមត្ថកិច្ចធ្វើការស្រាវជ្រាវចាប់ជនសង្ស័យមកផ្ដន្ទាទោស។
បន្ទាប់ពីទទួលបានពាក្យបណ្ដឹងពីជនរងគ្រោះរួច កម្លាំងសមត្ថកិច្ចប៉ុស្តិ៍នគរបាលស្ទឹងមានជ័យទី៣ ក៏បានចុះទៅដល់ទីតាំងកន្លែងកើតហេតុ និងបានឆែកទៅមើលកាមេរ៉ាសុវត្ថិភាពក៏បានឃើញជនសង្ស័យមានគ្នា៥នាក់បានគាស់សោរទ្វារចូលទៅលួចម៉ូតូនិងទ្រព្យសម្បត្តិរបស់ជនរងគ្រោះពិតប្រាកដមែន។
រហូតដល់ថ្ងៃទី២១ ខែឆ្នាំដដែល សមត្ថកិច្ចក៏បានឃាត់ខ្លួនជនសង្ស័យម្នាក់ឈ្មោះសេង គឹមហ៊ត និងបានយកមកធ្វើការសួរនាំនៅប៉ុស្តិ៍នគរបាលស្ទឹងមានជ័យទី៣ រួចក៏បានបន្តឃាត់ខ្លួនបក្ខពួកជាបន្តបន្ទាប់ចំនួន០៤នាក់ទៀត រួមនិងវត្ថុតាងមួយចំនួន។
បច្ចុប្បន្ននេះ ជនសង្ស័យទាំង០៥នាក់ខាងលើត្រូវបានកម្លាំងសមត្ថកិច្ចប៉ុស្ដិ៍នគរបាលរដ្ឋបាលស្ទឹងមានជ័យទី ៣ កសាងសំណុំរឿងបញ្ជូនទៅកាន់អធិការដ្ឋាននគរបាលខណ្ឌមានជ័យ ដើម្បីចាត់ការបន្តតាមនីតិវិធី ៕
ដោយ ៖ ភារ៉ា ដង្កោ
