ព័ត៌មានទាន់ហេតុការណ៍៖

យានយន្ត ១៤៥គ្រឿង ត្រូវបានផាកពិន័យ,ខណៈ​ករណី​គ្រោះថ្នាក់​ចរាចរណ៍​ស្លាប់ ០៦នាក់ របួស ៥០នាក់នាថ្ងៃទី៣០ ខែកញ្ញានេះ!

ចែករំលែក៖

 

ភ្នំពេញ៖ បើតាមការបញ្ជាក់របស់លោក​ឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិ បានថ្លែង​នៅល្ងាចថ្ងៃ​សុក្រ​ទី​៣០​ ខែកញ្ញា​ ឆ្នាំ​២០២២នេះ​ថា៖​ កម្លាំងសមត្ថកិច្ច​នគរបាលទូទាំងប្រទេស​ បានត្រួតពិនិត្យ និងផាកពិន័យយានយន្តសរុបចំនួន ១៤៥គ្រឿងទៀត នៅថ្ងៃទី៣០ ខែកញ្ញានេះ ក្នុងនោះមានម៉ូតូ ៨២គ្រឿង និងរថយន្ត ៦៣គ្រឿង។

លោក​ឧត្តមសេនីយ៍ឯក ឆាយ គឹមខឿន បានថ្លែង​គូសបញ្ជាក់ថា​៖ គិតថ្ងៃទី៣០ ខែកញ្ញា ក្នុងឆ្នាំ២០២២នេះ នគរបាលចរាចរណ៍ទូទាំងប្រទេសបានត្រួតពិនិត្យ និងផាកពិន័យយានយន្តសរុបចំនួន ១១៧,៦៨៣គ្រឿង ក្នុងនោះមានម៉ូតូ ៩៤,៤១៩គ្រឿង និងរថយន្តគ្រប់ប្រភេទ ២៣,២៦៤គ្រឿង។

បទល្មើសដែលត្រូវបានកត់សម្គាល់សម្រាប់ម៉ូតូរួមមាន៖ មួក ទូរស័ព្ទ និងល្មើសសញ្ញាជាដើម។ ដោយឡែករថយន្តរួមមាន៖ ល្មើសសញ្ញា ទូរស័ព្ទ អត់ប័ណ្ណបើកបរ ខ្សែក្រវ៉ាត់ឆៀក និងអត់ស្លាកលេខជាដើម។

ជាមួយគ្នានេះ​ ករណី​គ្រោះ​ថ្នាក់​ចរាចរណ៍នៅទូទាំងប្រទេសកម្ពុជា​ នាថ្ងៃទី៣០ ខែកញ្ញា ឆ្នាំ២០២២នេះដែរ បានកើតឡើងចំនួន ០៤លើក ក្នុងនោះស្លាប់ចំនួន ០៦នាក់ របួសចំនួន ៥០នាក់ (របួសធ្ងន់ ០២នាក់)។ រយៈពេល២៧៣ថ្ងៃមានករណីគ្រោះថ្នាក់ចរាចរណ៍ចំនួន ២,២៨៨លើក បណ្ដាលឱ្យមនុស្សស្លាប់ ១,៣៤២នាក់ របួស ៣,១៧៣នាក់ (របួសធ្ងន់ ២,០០៤នាក់)

បន្ថែមពីនេះ​ លោកអ្នកនាំពាក្យ​ ក៏បានថ្លែងអំណរគុណ និងកោតសរសើរដល់ជនរួមជាតិជាអ្នកប្រើប្រាស់ផ្លូវទាំងអស់ ដែលបានចូលរួមគោរពច្បាប់ចរាចរណ៍យ៉ាងល្អប្រសើររយៈពេលកន្លងមកនេះ ជាពិសេសកោតសរសើរ និងអរគុណដល់នគរបាលចរាចរណ៍ដែលបានលះបង់ និងខិតខំប្រឹងប្រែងជំរុញការរឹតបន្តឹងចរាចរណ៍ប្រកបដោយស្មារតី ទទួលខុសត្រូវខ្ពស់បំផុត៕

ដោយ​៖សហការី​(រូបភាព៖ ឯកសារ)


ចែករំលែក៖