សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់ បានបើករថយន្តស៊េរីទំនើបមួយគ្រឿងម៉ាកBMW បត់ឆ្លងផ្លូវក្នុងល្បឿនលឿនជ្រុលទៅបុកជាមួយម៉ូតូម៉ាកXR មួយគ្រឿង បណ្ដាលឲ្យបុរសពីរនាក់រងរបួសធ្ងន់ ចំណែករថយន្តបង្កបានបើករត់ចូលក្នុងខុនដូ មួយកន្លែង ត្រូវបានសមត្ថកិច្ចដេញឃាត់ជាប់ កាលពីវេលាម៉ោង០៩យប់ ថ្ងៃទី០៧ ខែតុលា ឆ្នាំ២០២២ នៅត្រង់ចំណុចស្តុបណតប្រ៊ីត តាមបណ្ដោយផ្លូវ ២០០៤ កែង និងផ្លូវណតប្រ៊ីត ស្ថិតក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញបុរសម្នាក់បើករថយន្តស៊េរីទំនើបម៉ាកBMW មួយគ្រឿង ពណ៌ខ្មៅ ពាក់ស្លាកលេខ ភ្នំពេញ 2AQ-6819 ធ្វើដំណើរតាមបណ្ដោយផ្លូវណតប្រ៊ីត ទិសដៅពីជើងទៅត្បូង លុះមកដល់ត្រង់ចំណុចកើតហេតុខាងលើ បានបត់ឆ្វេងដៃឆ្លងផ្លូវ ក្នុងល្បឿនលឿន បានជ្រុលទៅបុកជាមួយម៉ូតូមួយគ្រឿងម៉ាកXR ពណ៌ក្រហម ពាក់ស្លាកលេខភ្នំពេញ1 GU-3710ជិះដោយបុរសពីរនាក់ធ្វើដំណើរបញ្ច្រាសទិសដៅគ្នាពីត្បូងទៅជើង ចំពីចំហៀងពេញទំហឹងបណ្ដាលឲ្យភាគីខាងម៉ូតូរងរបួសធ្ងន់ទាំងពីរនាក់ ដោយមានម្នាក់បាក់ជើងម្ខាង។
ចំណែករថយន្តមិនបានឈប់នៅកន្លែងកើតហេតុនោះទេ បានព្យាយាមបើករត់ចូលក្នុងខុនដូ មួយកន្លែងក្បែរកន្លែងកើតហេតុខាងលើ ត្រូវបានកម្លាំងសមត្ថកិច្ចប្រចាំការនៅគោលដៅស្តុបណតប្រ៊ីតដេញឃាត់ជាប់។
ក្រោយកើតហេតុ សមត្ថកិច្ចមូលដ្ឋានបានទំនាក់ទំនងហៅរថយន្តសាមុយមកដឹកជនរងគ្រោះទៅសង្គ្រោះនៅមន្ទីរពេទ្យភ្លាមៗ ។ ចំណែករថយន្តនិងម៉ូតូ ត្រូវបានសមត្ថកិច្ចជំនាញធ្វើការវាស់វែងយកទៅរក្សាទុករង់ចាំធ្វើការដោះស្រាយគ្នានៅពេលក្រោយ៕
ដោយ ៖ ភារ៉ា ដង្កោ
