សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នៅព្រឹកថ្ងៃអង្គារ ទី១១ ខែតុលា ឆ្នាំ២០២២ លោក វង្ស ផាណាត ប្រធានក្រុមប្រឹក្សាខេត្ត លោក គួច ចំរើន អភិបាល នៃគណៈអភិបាលខេត្តព្រះសីហនុ និងលោកស្រី សមាជិក សមាជិកាក្រុមប្រឹក្សាខេត្ត លោក លោកស្រីអភិបាលរងខេត្ត អភិបាលក្រុង ស្រុក លោកឧកញ៉ា ប្រធានមន្ទីរ អង្គភាពពាក់ព័ន្ធ មន្ត្រីរាជការ និងសប្បុរសជនក្នុងខេត្តព្រះសីហនុ បានដង្ហែអង្គកឋិនទានសាមគ្គីទៅកាន់វត្តគិរីជលសារ កោះរ៉ុង ស្ថិតនៅភូមិព្រែកស្វាយ សង្កាត់កោះរ៉ុង ក្រុងកោះរ៉ុង ខេត្តព្រះសីហនុ។
លោក គួច ចំរើន អភិបាលខេត្តព្រះសីហនុ បានឱ្យដឹងថា ការផ្តួចផ្តើមបុណ្យអង្គកឋិនទានសាមគ្គីនេះ ដើម្បីប្រមូលបច្ច័យដង្ហែវេរប្រគេនព្រះសង្ឃដែលគង់ចាំព្រះវស្សាអស់កាលត្រីមាសក្នុងពុទ្ធសីមា វត្តគិរីជលសារ កោះរ៉ុង ក្រុងកោះរ៉ុង ខេត្តព្រះសីហនុ ហើយបច្ច័យដែលប្រមូលបានពីអង្គកឋិនទានយកទៅកសាងព្រះវិហារ និងសមិទ្ធផលនានាក្នុងវត្តគិរីជលសារ កោះរ៉ុងផងដែរ។
បុណ្យកឋិនទាន គឺជាបុណ្យប្រពៃណីខ្មែរដែលមានកាលវេលាច្បាស់លាស់មិនមែនចេះតែធ្វើបានគ្រប់ពេលវេលានោះទេ បុណ្យកឋិនទានក្នុងន័យជួយផ្គត់ផ្គង់ដល់ព្រះសង្ឃដែលគង់ចាំព្រះវស្សាអស់កាលត្រីមាសក្នុងពុទ្ធសីមាវត្តនីមួយៗ ហើយក្នុងមួយវត្តអាចដង្ហែបុណ្យអង្គកឋិនទានចូលបានតែម្តងប៉ុណ្ណោះក្នុងមួយរដូវកាល។
សូមបញ្ជាក់ថា បច្ច័យដែលទទួលបានពីអង្គកឋិនទានរបស់រដ្ឋបាលខេត្តព្រះសីហនុ មានចំនួន ៣៤៣.៣៨៤.៥០០រៀល និង ៥១៦.០៩២ដុល្លារអាមេរិក សរុបជាលុយដុល្លាទាំងអស់ស្មើនឹង ៥៩៩.៨៦៨ដុល្លារអាមេរិក ៕
ដោយ ៖ សហការី
