សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះវិហារ៖ លោកមេបញ្ជាការតំបន់ប្រតិបត្តិសឹករងព្រះវិហារបានដាក់ចេញនូវបទបញ្ជា ក៏ដូចជាការផ្តាំផ្ញេី ដល់តាមបណ្ដាអង្គភាពនៅតាមព្រំដែន កម្ពុជា-ថៃ-ឡាវ ត្រូវយកចិត្តទុកដាក់ការពារបូរណភាពទឹកដី ជាពិសេសបទល្មេីសឆ្លងដែនខុសច្បាប់ផ្សេងៗ តាមច្រក ឬតាមចំណុចដែលអង្គភាពទទួលខុសត្រូវ ជាពិសេសបញ្ហាគ្រឿងញៀន និងធ្វេីការទំនាក់ទំនងឱ្យបានល្អជាមួយមិត្តជិតខាង។ នេះបេីយោងតាមប្រភពព័ត៍មានពីផេកហ្វេសប៊ុកផ្លូវការរបស់កងព័ទជេីងគោក នៃកងយោធពលខេមរភូមិន្ទ បានឱ្យដឹងនៅរសៀលថ្ងៃអង្គារទី១៨ ខែតុលា ឆ្នាំ២០២២។
លោកមេបញ្ជាការ ក៏សូមអំពាវនាវឱ្យគ្រប់បណ្តាកងឯកភាពត្រូវបន្តយកចិត្តទុកដាក់ហ្វឹកហ្វឺនបន្ថែមនូវជំនាញផ្សេងៗ នៅអង្គភាពរបស់ខ្លួន ជាពិសេសការងារអប់រំចិត្តសាស្ត្រ អប់រំសតិអារម្មណ៍ ដល់យោធិនក្រោមឱវាទ ក៏ដូចជាការងារបំផុសចលនាប្រឡងប្រណាំងទៅតាមបណ្តាអង្គភាព ការងារដាំដុះ និងចញ្ចឹមសត្វ សម្រាប់បំពេញបន្ថែមលេីគោលរបបប្រចាំថ្ងៃដែលថ្នាក់លេីផ្តល់ជូន ក៏ដូចជាការកសាងជុំរុំជំរកស្នាក់នៅឱ្យបានល្អ ជាពិសេសបញ្ហាសុខភាពរបស់បងប្អូនកូនចៅរបស់ខ្លួន ព្រោះរដូវនេះជារដូវវស្សា យ៉ាងណាមិញត្រូវសាមគ្គីភាពផ្ទៃក្នុងអង្គភាពឱ្យបានល្អ ។
លោកបញ្ជាការ បានស្នើឱ្យអង្គភាពទាំងអស់ ត្រូវសហការជាមួយអាជ្ញាធរមូលដ្ឋានក្តាប់ឱ្យជាប់អំពីបញ្ហាជំនន់ទឹកភ្លៀងនៅតាមបណ្តាស្រុក ក្រុងមួយចំនួនដែលលិចលង់ដេីម្បីត្រៀមខ្លួនជួយសង្គ្រោះ និងជំលៀសបងប្អូនប្រជាពលរដ្ឋមកកាន់ទីទួលសុវត្ថិភាព៕
ដោយ៖សហការី
