សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តស៊េរីទំនេីបម៉ាក Rolls Royce Cullinan តម្លៃខ្ទង់លានដុល្លារ បានបេីកឆ្លងផ្លូវបំបែកជាបួន ត្រូវរថយន្ត HighLander មួយគ្រឿងទៀតបេីកបុកពីចំហៀង បណ្ដាលឲ្យរងការខូចខាត បង្កការភ្ញាក់ផ្អេីលដល់អ្នកដំណេីរកាលពីវេលាម៉ោង១០ និង១០នាទីយប់ ថ្ងៃទី៣០ ខែតុលា ឆ្នាំ២០២២ នៅក្បែរផ្សារ៧មករា តាមបណ្ដោយផ្លូវលេខ៦១៤ កែងផ្លូវលេខ២៨៧ ក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ ។
តាមប្រភពព័ត៌មានពីកន្លែងកេីតហេតុបានឲ្យដឹងថា នៅពេលកេីតហេតុនោះ គេឃេីញរថយន្តស៊េរីទំនេីបម៉ាក Rolls Royce Cullinan ពណ៌ខ្មៅ ពាក់ស្លាកលេខ កម្ពុជា TS-5666 ដែលគេដឹងថាមានតម្លៃជាង២លានដុល្លារអាមេរិក បានធ្វេីដំណេីរតាមបណ្ដោយផ្លូវលេខ៦១៤ ទិសដៅពីកេីតមកលិច ខណ:មកដល់ចំណុចកេីតហេតុក៏ឆ្លងផ្លូវបំបែកបានពាក់កណ្ដាល ក៏ត្រូវរថយន្តម៉ាក Toyota HighLander ពណ៌ទឹកប្រាក់ ពាក់ស្លាកលេខភ្នំពេញ 2BL-0693 បានធ្វេីដំណេីរតាមបណ្ដោយផ្លូវ២៨៧ ទិសដៅពីជេីងមកត្បូង មកបុករថយន្តទំនេីប Rolls Royce ពីចំហៀងខាងស្ដាំ បណ្ដាលឲ្យកំពិតទ្វារ រងការខូចខាតច្រេីនគួរសម្យ ឯរថយន្ត HighLander ក៏រងការខូចខាតស្តុបនិងកាងច្រេីនគួរសម្យដូចគ្នា ។
ក្នុងករណីគ្រោះថ្នាក់ចរាចរណ៍នេះ មិនបណ្ដាលឲ្យមនុស្សណាម្នាក់រងរបួសនោះទេ ហេីយភ្លាមៗ ភាគីរថយន្តទំនេីប Rolls Royce មានប្រុសស្រីចុះចេញពីកន្លែងកេីតហេតុបាត់ បន្សល់រថយន្តនៅកន្លែងកេីតហេតុ ។
បន្ទាប់មក សមត្ថកិច្ចមូលដ្ឋានបានចុះមកដល់ ឃេីញថា ភាគីទាំងសងខាងមិនមានការចចារគ្នា ក៏ទំនាក់ទំនងទៅសមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ធ្វេីការវាស់វែងយករថយន្តទាំងពីរគ្រឿងទៅរក្សាទុក រង់ចាំភាគីទាំងពីរចូលខ្លួនដោះស្រាយតាមក្រោយ ៕
ដោយ ៖ ភារ៉ា ដង្កោ
