សារព័ត៌មាន នគរវត្ត តែងតែនាំមុខគេជានិច្ច
ក្រុមមាន់ខ្នាយមាស Tottenham បានឆ្លងផុតវគ្គជម្រុះតាមពូល ឡើងទៅកាន់១៦ក្រុមចុងក្រោយ Champions League ក្នុងនាមជាក្រុមឈ្នះក្នុងពូល D បន្ទាប់ពីស៊ុតបញ្ចូលទីក្នុងម៉ោងបន្ថែមដើម្បីផ្តួលក្រុមម្ចាស់ផ្ទះMarseille កាលពីរាត្រីថ្ងៃអង្គារ ដ៏គួរឱ្យភ្ញាក់ផ្អើលក្នុងប្រទេសបារាំង។
កីឡាករ Pierre-Emile Hojbjerg បានរកគ្រាប់បាល់បញ្ចូលទីនៅនាទីទី៩០+៥ក្នុងម៉ោងបន្ថែម ដើម្បីធានាឱ្យក្រុម Tottenham ឈានទៅវគ្គ១៦ក្រុមចុងក្រោយនៅយប់មួយ ដែលពួកគេបានធ្វើដំណើរប្រកួតក្រៅទឹកដី។ Spurs ត្រូវការស្មើដើម្បីឡើងទៅវគ្គចែកពូល ប៉ុន្តែក្រុម Marseille បាននាំមុខ១គ្រាប់មុនដោយខ្សែការពារ Chancel Mbemba នៅក្នុងតង់ទី១។ នោះមានន័យថា Spurs បានធ្លាក់ទៅចំណាត់ថ្នាក់លេខ៣ក្នុងពូល ដោយឆ្ពោះទៅកាន់ក្របខ័ណ្ឌ Europa League មុនពេលកីឡាករ Clement Lenglet តាមស្មើនៅដើមតង់ទី២។
ក្រុម Tottenham កំពុងបន្តដំណើរទៅមុខយ៉ាងអស់សង្ឃឹម ប៉ុន្តែនៅពេលដែលក្រុម Marseille មិនអាចរារាំងនៅចុងម៉ោង ហើយកីឡាករHojbjerg បានរក១គ្រាប់ដែលជាគ្រាប់ជ័យជម្នះសម្រាប់ Spurs។ វាជារាត្រីដ៏អស្ចារ្យ ដោយសារលទ្ធផលនៅពូល D មានភាពល្អប្រសើររបស់ក្រុម Tottenham ក្នុងការប្រកួតប្រជែង និងធ្វើឱ្យមានការមើលយ៉ាងអន្ទះសា។
ការបរាជ័យក្នុងផ្ទះ ២–១ របស់ Sporting Lisbon ដោយក្រុម Frankfurt មានន័យថា Spurs នៅទីបំផុតបានបញ្ចប់នៅលើកំពូលតារាង ប៉ុន្តែនៅចំណុចមួយ ពួកគេបានធ្លាក់ទៅលេខ៣ក្នុងពូល ធ្វើដំណើរចេញពីការប្រកួត ហើយទីតាំងរបស់ពួកគេបានផ្លាស់ប្តូរចំនួន៦ដងក្នុងអំឡុងពេលប្រកួតជាមួយនឹងក្រុមចំនួន៣ផ្សេងគ្នានៅលើកំពូលតារាង។
កីឡាករដែលរកបានគ្រាប់បាល់នៅចុងម៉ោង Hojbjerg ធ្វើឲ្យក្រុមMarseille បញ្ចប់នៅបាតតារាង ដែលមានន័យថា ពួកគេខកខានក្នុងការប្រកួត Europa League ក៏ដូចជាការបរាជ័យក្នុងការឈានទៅវគ្គបន្តនៃក្របខ័ណ្ឌ Champions League ។
ក្នុងការប្រកួតនោះក្រុម Spurs គ្មានអ្នកចាត់ការលោក Antonio Conte ទេ ខណៈដែលគាត់បានរងបម្រាមលើបន្ទាត់ប៉ះបន្ទាប់ពីស្មើជាមួយ Sporting Lisbon ប៉ុន្តែពួកគេដឹងថា មានចំណុចមួយនឹងឃើញពួកគេឈានទៅវគ្គបន្ត។ជំនួយការរបស់ក្រុម Tottenham លោក Cristian Stellini ដែលឈរនៅជំនួសលោក Conte បាននិយាយថា “ខ្ញុំរីករាយនឹងវានៅពេលដែលយើងឈ្នះ។ ខ្ញុំបាននិយាយជាមួយ Antonio គាត់ហត់នឿយណាស់ ព្រោះការមើលពីហ្វូងមនុស្សគឺមិនធម្មតាទេ ដែលជាអ្នកគាំទ្រក្រុមម្ចាស់ផ្ទះផង”។
ក្រុម Spurs មិនដែលយកឈ្នះក្រុមបារាំងនៅក្រៅទឹកដីទេ ក្នុងការប្រកួតពានរង្វាន់លីគកំពូលៗនៅ អឺរ៉ុប ប៉ុន្តែនៅពេលនេះក្រុមមាន់ខ្នាយមាសធ្វើបានល្អ ដោយមានឱកាសឡើងទៅកាន់វគ្គ១៦ក្រុមនៅ Champions League។រហូតមកដល់ពេលនេះក្រុមនៅអង់គ្លេសទាំង៤បានឡើងទៅកាន់វគ្គ១៦ក្រុមទាំងអស់រួមមាន Liverpool, Chelsea, Manchester City និងក្រុម Tottenham ៕
ដោយ៖ ភារៈ(រូបភាព ៖ BBC Sport)
