សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បើយោងតាមការបញ្ជាក់ពីលោកឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិ បានឱ្យដឹងនៅព្រលប់ថ្ងៃអាទិត្យទី០៦ ខែវិច្ឆិកា ឆ្នាំ២០២២នេះថា៖ កម្លាំងនគរបាលទូទាំងប្រទេសត្រួតពិនិត្យ និងផាកពិន័យយានយន្តសរុបចំនួន ១៣៦គ្រឿង នាថ្ងៃទី០៦ ខែវិច្ឆិកានេះ។ ក្នុងនោះមានម៉ូតូ ១២៦គ្រឿង និងរថយន្ត ១០គ្រឿង។
លោកឧត្តមសេនីយ៍ឯក ឆាយ គឹមខឿន បានគូសបញ្ជាក់ថា គិតថ្ងៃទី០៦ ខែវិច្ឆិកា ក្នុងឆ្នាំ២០២២នេះ នគរបាលចរាចរណ៍ទូទាំងប្រទេសបានត្រួតពិនិត្យ និងផាកពិន័យយានយន្តសរុបចំនួន ១៣៥,៦៥៨គ្រឿង ក្នុងនោះមានម៉ូតូ ១០៨,៩៥២គ្រឿង និងរថយន្តគ្រប់ប្រភេទ ២៦,៧០៦គ្រឿង។
បទល្មើសដែលត្រូវបានកត់សម្គាល់សម្រាប់ម៉ូតូរួមមាន៖ មួក ល្មើសសញ្ញា ទូរស័ព្ទ និងអត់ស្លាកលេខជាដើម។ ដោយឡែករថយន្តរួមមាន៖ ល្មើសសញ្ញា អត់ប័ណ្ណបើកបរ ខ្សែក្រវ៉ាត់ អាជីវកម្ម ល្មើសល្បឿន ទូរស័ព្ទ និងអត់ស្លាកលេខជាដើម។
ដោយឡែក នៅថ្ងៃទី០៦ ខែវិច្ឆិកានេះដែរ ករណីគ្រោះថ្នាក់ចរាចរណ៍នៅទូទាំងប្រទេសកម្ពុជាក៏បានកើតឡើងចំនួន ០៧លើក ក្នុងនោះស្លាប់ចំនួន ០៥នាក់ របួសចំនួន ០៥នាក់ (របួសធ្ងន់ ចំនួន ០៤នាក់)។ រយៈពេល៣១០ថ្ងៃមានករណីគ្រោះថ្នាក់ចរាចរណ៍ចំនួន ២,៥៣៤លើក បណ្ដាលឱ្យមនុស្សស្លាប់ ១,៤៧៣នាក់ របួស ៣,៤៧៤នាក់ (របួសធ្ងន់ ២,២០០នាក់)។
ជាមួយគ្នានោះ លោកឧត្តមសេនីយ៍ឯក ឆាយ គឹមខឿន ក៏បានថ្លែងអំណរគុណ និងកោតសរសើរដល់ជនរួមជាតិជាអ្នកប្រើប្រាស់ផ្លូវទាំងអស់ ដែលបានចូលរួមគោរពច្បាប់ចរាចរណ៍យ៉ាងល្អប្រសើររយៈពេលកន្លងមកនេះ ជាពិសេសកោតសរសើរ និងអរគុណដល់នគរបាលចរាចរណ៍ដែលបានលះបង់ និងខិតខំប្រឹងប្រែងជំរុញការរឹតបន្តឹងចរាចរណ៍ប្រកបដោយស្មារតី ទទួលខុសត្រូវខ្ពស់បំផុត៕
ដោយ៖សហការី(រូបភាព៖ ឯកសារ)
