សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល ៖ ប្រជាពលរដ្ឋបានប្រទះឃើញសាកសពស្ត្រីចំណាស់ម្នាក់ ស្លាប់ក្បែរមាត់ទឹកអូរ សង្ស័យជាករណីខ្យល់គរ នៅថ្ងៃទី០៩ ខែវិច្ឆិកាឆ្នាំ២០២២ វេលាម៉ោង៦និង៣០នាទីព្រឹកចំណុចមាត់ទឹកអូរមុខសាលាបឋមសិក្សាពោធិធំ ភូមិពោធិធំ ឃុំអរិយក្សត្រ ស្រុកល្វាឯម ខេត្តកណ្ដាល ។
មម្ត្រីនគរបាលស្រុកល្វាឯមបានឲ្យដឹងថា សាកសពជនរងគ្រោះមិនស្គាល់អត្តសញ្ញាណ ភេទស្រី អាយុប្រហែល ៦០ឆ្នាំ សម្បុរស សក់រួញ កាត់ខ្លីត្រឹមក។
ប្រភពដដែលបន្តថា យោងតាមការបំភ្លឺរបស់ប្រជាពលរដ្ឋថា ជនរងគ្រោះមានលក្ខណៈសតិមិនគ្រប់ ស្ពាយកាបូប ពណ៌ខ្មៅហើយបានដើរទៅមកក្នុងភូមិអរិយក្សត្រប្រហែលជាពីរថ្ងៃមកហើយនិងបានសុំបាយសុំទឹកប្រជាពលរដ្ឋតាមភូមិហូប ហើយជាប់ខ្លួនជនរងគ្រោះមានធំក្លិនស្រា។លុះនៅថ្ងៃទី ០៩ ខែវិច្ឆិកា ឆ្នាំ២០២២ វេលាម៉ោ០៦និង៣០នាទីព្រឹក ប្រជាពលរដ្ឋបានដើរហាត់ប្រាណតាមមុខសាលាបឋមសិក្សាពោធិធំ បានប្រទះឃើញសាកសពជនរងគ្រោះនៅក្បែរមាត់ទឹកក៏រាយការណ៍មកសមត្ថកិច្ច ប៉ុស្តិ៍នគរបាលរដ្ឋបាលអរិក្សត្រ ។
ទទួលបានព័ត៌មានកម្លាំងផ្នែកជំនាញសហការជាមួយ អាជ្ញាធរភូមិ ឃុំ ពេទ្យនិងកម្លាំងប៉ុស្តិ៍នគរបាលរដ្ឋបាលអរិក្សត្រ ចុះទៅពិនិត្យកន្លែងកើតហេតុនិងពិនិត្យសាកសព។
ការពិនិត្យសាកសព: សាកសពអាក្រាតកាយ ចុងជើងជាប់មាត់ទឹក ក្បាលបែរទៅទិសខាងលិច នៅចម្ងាយពីសាកសព ប្រវែង ៥០ម៉ែត្រមានបន្សល់ទុកកាបូបពណ៌ខ្មៅចំនួន០១ ភ្ជួរនិងរបងសាលា និងសម្លៀកបំពាក់មួយចំនួននៅលើស្មៅនិងប្រវែង៥ម៉ែត្រពីសាកសពនៅលើកំប្លោកក្នុងទឹក មានអាវយឺតពណ៌ទឹកក្រូចចំនួន ០១ និងអាវទ្រនាប់ ពណ៌ផ្កាឈូកចំនួន០១ គូទសាកសពមានស្នាមរលាត់ថ្មីសង្ស័យពេលចុះទឹក អង្គុយរំកិលគូទចុះ លើខ្លួនសាកសពក្រៅពីគូទពុំមានស្លាកស្នាមអ្វីគួរឲ្យកត់សម្គាល់ឡើយ ។
ការសន្និដ្ឋាន ៖ ជនរងគ្រោះស្លាប់ដោយសារខ្យល់គរ ។
ក្រោយពិនិត្យរួចបានយកសាកសព ទៅកប់រក្សាទុកនៅទីបញ្ចុះសពក្រោយវត្តបន្ទាយរង់ចាំស្វែងរកសាច់ញាតិ ៕
ដោយ៖ ស្អាងជ័យ
