ព័ត៌មានទាន់ហេតុការណ៍៖

ស្លាប់ម្នាក់រងរបួសស្រាលម្នាក់ខណៈពួកគេជិះម៉ូតូធ្លាក់ជង្ហុកហើយរថយន្តមកកិន

ចែករំលែក៖

ខេត្តកំពង់ស្ពឺ ៖ សមត្ថកិច្ចខេត្តកំពង់ស្ពឺបានឱ្យ

អង្គភាពយើងដឹងនៅព្រឹកថ្ងៃទី២២ខែវិច្ឆិកាឆ្នាំ២០២២នេះថាយ៉ាងហោចណាស់មានមនុស្សម្នាក់បានស្លាប់ភ្លាមៗនៅនឹងកន្លែងនិងម្នាក់ទៀតបានរងរបួសស្រាលខណៈពួកគេបានជិះម៉ូតូធ្លាក់ជង្ហុកដួលហើយត្រូវរថយន្តបើកមកកិនតែម្តង។

គ្រោះថ្នាក់ចរាចរណ៍នេះបានកើតឡើងកាលពីល្ងាចថ្ងៃទី២១ខែវិច្ឆិកាឆ្នាំ២០២២នៅតាមបណ្តោយផ្លូវជាតិលេខ៤ចន្លោះគីឡូម៉ែត្រលេខ៤០-៤១ស្ថិតភូមិវល្លិសរ ឃុំវល្លិសរ ស្រុកសំរោងទង ខេត្តកំពង់ស្ពឺ។

នគរបាលមូលដ្ឋានបានឲ្យដឹងថាជនរងគ្រោះមានឈ្មោះមឿង ស៊ីនឿន ភេទប្រុសអាយុ២០ឆ្នាំស្លាប់ភ្លាមៗនៅនឹងកន្លែង ស្នាក់នៅភូមិក្រាំងស្វាយ ឃុំរលាំងគ្រើល ស្រុកសំរោងទង។

បើកបរម៉ូតូមួយគ្រឿងម៉ាកហុងដា ពណ៌ខ្មៅ ពាក់ស្លាកលេខភ្នំពេញ1JO-5072 ឌុបមនុស្ស ម្នាក់ឈ្មោះ យួស វិបុល ភេទប្រុស អាយុ១៧ឆ្នាំ រងរបួសស្រាលរស់នៅភូមិសុបិន ឃុំត្រពាំងគង ស្រុកសំរោងទង បើកបរពីទិសខាងលិចទៅទិសខាងកើត។

លុះមកដល់ចំណុចខាងលើម៉ូតូបានធ្លាក់ជង្ហុកដួលដោយខ្លួនឯង រួចមានរថយន្ដមួយគ្រឿងមិនស្គាល់ម៉ាកបើកបរស្របទិសគ្នាចាប់ហ្រ្វ័ងមិនទាន់ក៏កិនអ្នកបើកបរម៉ូតូបណ្តាលឲ្យស្លាប់ម្នាក់និងរងរបួសស្រាលម្នាក់។

ក្រោយកើតហេតុមន្ត្រីជំនាញបានធ្វើការវាស់វែងនិងប្រគល់សពជនរងគ្រោះឲ្យក្រុមគ្រួសារយកទៅធ្វើបុណ្យតាមប្រពៃណី ចំពោះវត្ថុតាងម៉ូតូរក្សាទុកនៅប៉ុស្តិ៍នគរបាលរដ្ឋបាលវល្លិស ចំណែករថយន្ដកំពុងស្រាវជ្រាវនិងកសាងសំណុំរឿងចាត់ការតាមនីតិវិធី៕

ដោយ៖ចន្ទ លីហ្សា


ចែករំលែក៖