សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ លោក ញឹម ពិសាល ចៅក្រមស៊ើបសួរសាលា ដំបូងរាជធានីភ្នំពេញ នារសៀលថ្ងៃទី២២ ខែវិច្ឆិកា ឆ្នាំ២០២២ បានចេញដីកា(ដល់ទៅ៤ដីកា ក្នុងថ្ងៃតែមួយ)សម្រេចឃុំខ្លួនស្ត្រីអ្នកជំនួញហាយសូរ ដាក់ពន្ធនាគារPJជាបណ្តោះអាសន្ន ក្រោមការចោទប្រកាន់ពីបទ.មិនបំពេញកាតព្វកិច្ចចំពោះឧបករណ៍អាចជួញដូរបាន ។ ការសម្រេចឃុំខ្លួនរបស់ចៅក្រមស៊ើប គឺយោងទៅលើការចោទប្រកាន់ជាផ្លូវការពីស្ថាប័នអយ្យការអមសាលាដំបូងរាជធានីភ្នំពេញដែរ ។
សូមជម្រាបថា លោក សេង ហៀង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ កាលពីរសៀលថ្ងៃទី១៩ ខែវិច្ឆិកា ឆ្នាំ២០២២ បានបើកការស៊ើបសួរលើអ្នកជំនួញហាយសូរម្នាក់ពាក់ពន្ធពីបទ.មិនបំពេញកាតព្វកិច្ចចំពោះឧបករណ៍អាចជួញ ដូរបាន (ឆបោក) លើទឹកប្រាក់រាប់លានដុល្លារអាមេរិក ។
ក្រោយពីសាកសួរអស់រយៈពេលច្រើនម៉ោង ក៏ផុតម៉ោងការងាររដ្ឋបាលតំណាងអយ្យការបានផ្ញើជនសង្ស័យទៅសមត្តកិច្ចវិញ និងតម្រូវឲ្យនាំមកសាកសួរនៅថ្ងៃបន្តបន្ទាប់ទៀត ដែលលោកព្រះរាជ អាជ្ញារងបានកាន់សំណុំរឿងមួយ ។
ពេលលោក សេង ហៀង សួរចប់ ជនសង្ស័យត្រូវបានប្រគល់ជូនទៅលោក ច្រឹង ខ្មៅ ព្រះរាជអាជ្ញា នៃអយ្យការអមសាលាដំបូង បន្តបើកការស៊ើបសួរសំណុំ រឿងថ្មីមួយទៀត ទើបលោកព្រះរាជអាជ្ញា បានចោទប្រកាន់ជន សង្ស័យជាផ្លូវការ ទើបសំណុំរឿងបានចាត់បញ្ជូនទៅខាងចៅក្រមស៊ើបសួរ ដើម្បីសម្រេចឃុំខ្លួនឬមិនឃុំខ្លួន នោះជាឆ័ន្ទានុសិទ្ធិរបស់លោកចៅក្រម ។
ប៉ុន្តែរហូតមកដល់រសៀលថ្ងៃដដែលនេះជន សង្ស័យមិនទាន់ត្រូវបានសមត្តកិច្ចនាំទៅឃុំខ្លួនទេ ពោលគឺមានសំណុំរឿង២ទៀត ស្ថិតក្នុងដៃស្ថាប័នអយ្យការបន្តបើកការស៊ើបសួរ ក្នុងនោះមានសំណុំរឿងមួយស្ថិតនៅលោក វង្ស សាវ៉ាត ព្រះរាជអាជ្ញារង និង សំណុំរឿងមួយទៀតស្ថិតនៅលោកស្រី សុង ឆវ័ន្ត ព្រះរាជអាជ្ញារងអមសាលាដំបូងរាជធានីភ្នំពេញ បន្តការស៊ើបសួរ ។ ដូច្នោះវាសនាស្ត្រីអ្នកជំនួញហាយសូររូបនេះ ទំនងនិងត្រូវនាំទៅពន្ធនាគារនៅថ្ងៃបន្ទាប់ ដោយមិនអាចគេចផុតពីការឃុំខ្លួននោះឡើយ ។
សូមជម្រាបទៀតថា ជនសង្ស័យឈ្មោះ ពេជ្រ ស្រីមុំ ភេទស្រី អាយុ៣៥ឆ្នាំ ជនជាតិខ្មែរ មុខរបរ ពាណិជ្ជករ ស្នាក់នៅផ្ទះលេខ២៥២ ផ្លូវផ្លាទីនឹម សង្កាត់និរោធ ខណ្ឌច្បារអំពៅ រាជធានីភ្នំពេញ ។ ស្ត្រីអ្នកជំនួញហាយសូររូបនេះ ត្រូវបានកម្លាំងកងរាជអាវុធហត្ថរាជធានីភ្នំពេញ ចុះទៅឃាត់ខ្លួនកាលពីវេលាម៉ោង១១និង៣០នាទីព្រឹកថ្ងៃទី១៧ ខែវិច្ឆិកា ឆ្នាំ២០២២ នៅចំណុចផ្ទះលេខ៤ដេ ផ្លូវដាវីន បុរី វរជន ក្នុងកោះពេជ្រ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ដែលស្ត្រីអ្នកជំនួញល្បីខាងឆបោកមនុស្សជាច្រើននាក់ មានទំហំទឹកប្រាក់រាប់លានដុល្លារអាមេរិក ហើយការឃាត់ខ្លួននោះគឹធ្វើឡើងតាមដីកាបញ្ជាឲ្យចូលខ្លួនរបស់លោក ច្រឹង ខ្មៅ ព្រះរាជអាជ្ញា នៃអយ្យកាអមសាលាដំបូងរាជធានីភ្នំពេញ ក្រោមការដឹក នាំអនុវត្ត និងសម្របសម្រួលដោយលោក គឹម ហុងសាន ព្រះរាជ អាជ្ញារង ។
អ្នកតាមប្រមាញ់ព័ត៌មានបានសង្កេតឃើញថានារសៀលថ្ងៃទី១៩ ខែវិច្ឆិកា កម្លាំងកងអាវុធហត្ថបានដឹកអ្នកជំនួញហា យសូរ តាមរថយន្តមួយគ្រឿងបំពាក់ដោយសារ៉ែន ចូលដល់ក្នុងបរិវេណសាលាដំបូងរាជធានីភ្នំពេញតែម្តង មិនបានដាក់ឲ្យចុះដើរពីក្រៅដូចជនសង្ស័យពាក់ព័ន្ធលួចឆក់ប្លន់ឬគ្រឿងញៀននោះទេ ដែលអ្នកមាត់ដាចខ្លះនិយាយថា ជនសង្ស័យជាអ្នកមានធនធានចង់ទិញយក្សជិះលេងក៏បានដែរ ។ នៅសាលាដំបូងរាជធានីភ្នំពេញបន្ទាប់ពីសមត្តកិច្ចកងរាជអាវុធហត្ថបញ្ជូនជនសង្ស័យទៅដល់ គេបានសង្កេតឃើញមេធាវីការពារក្តីឲ្យដើមបណ្តឹង២.៣ នាក់ ខ្លះកាន់ពាក្យបណ្តឹងដើម្បីដាក់ចូលបន្ថែម ខ្លះកាន់ដីកាបញ្ជាឲ្យចូល ខ្លួន ដែលតំណាងអយ្យការទើបនិងចេញថ្មីៗ តាមឃ្លាំមើលចំណាត់ការរបស់អយ្យការក្នុងដំណាក់ការស៊ើបសួរ ។ បើតាមមេធាវី២. ៣នាក់នោះនិយាយថា សំណុំរឿងស្រ្តីអ្នកជំនួញហាយសូរ(ពេជ្រ ស្រីមុំ)មាន៥ករណី សុទ្ធតែរឿងព្រហ្មទណ្ឌ ឆបោក ចេញមូលប្បទានប័តអត់សាច់ប្រាក់(សែកស្អុយ)រាប់លានដុល្លារអាមេរិក ហើយសំណុំរឿងនីមួយៗមិនស្ថិតនៅព្រះរាជអាជ្ញា ឬព្រះរាជអាជ្ញារងណាម្នាក់នោះទេ គឺមានព្រះរាជអាជ្ញា និងព្រះរាជអាជ្ញារង៤ នាក់កាន់រឿងក្តីផ្សេងៗគ្នា ដែលការស៊ើបសួរនិងត្រូវចំណាយពេលសួរបន្តបន្ទាប់គ្នាដែរ ។ បានសង្កេតឃើញទៀតថា អ្នកជំនួញហាយសូរ(ពេជ្រ ស្រីមុំ)មិនមែនសមត្តកិច្ចទើបនិងចាប់ខ្លួនមួយករណី នេះទេ គឺចាប់ខ្លួន៣លើកមកហើយ ជាក់ស្តែងលើកទី១.កាលពីថ្ងៃទី៤ ខែឧសភា ឆ្នាំ២០២២ កម្លាំងការិយាល័យនគរបាលព្រហ្ម ទណ្ឌកំរិតធ្ងន់ នៃស្នងការដ្ឋាននគរបាលរាជធានីភ្នំពេញ ឃាត់ខ្លួននៅចំណុចមុខអគារ Rise Commercial Buil ding នៅខណ្ឌបឹងកេងកង តាមដីកាបញ្ជាឲ្យចូលខ្លួនរបស់លោក ច្រឹង ខ្មៅ ព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ ពាក់ព័ន្ធករណីមិនបំពេញកាតព្វកិច្ច ចំពោះឧបករណ៍អាចជួញដូរបាន ដែលមានទឹកប្រាក់ចំនួន ៧៧៦.០០០ ដុល្លារ អាមេរិក តាមពាក្យបណ្តឹងរបស់ឈ្មោះ លឹម ហ៊ួរនីតូ ភេទប្រុស អាយុ៣៤ឆ្នាំ មុខរបរ ពាណិជ្ជករ ។ លើកទី២.រំលងបានប្រហែល១ខែ កម្លាំងសមត្តកិច្ចនគរបាលការិយាល័យព្រហ្មទណ្ឌកម្រិតធ្ងន់រាជធានីភ្នំពេញឃាត់ខ្លួន ពាក់ព័ន្ធពីបទ.មិនបំពេញកាតព្វកិច្ចចំពោះឧបករណ៍អាចជួញដូរបាន(សែកស្អុយ)ដដែល ពេលនោះជនសង្ស័យបានដាក់ប្រាក់តម្កល់ដើម្បីធានាខ្លួន ទើបតំណាងអយ្យការអនុញ្ញាតឲ្យវិលទៅផ្ទះវិញ ។ ហើយលើកទី៣.នេះជនសង្ស័យត្រូវបានកម្លាំងសមត្តកិច្ចកងរាជអាវុធហត្ថឃាត់ខ្លួនម្តង និងកំពុងបន្តនីតិវិធី ។ បើតាមមេធាវីម្នាក់ការពារក្តីឲ្យក្រុមមួយបានឲ្យដឹងថា លោកក៏ត្រូវបានម្ចាស់ក្រុមហ៊ុនមួយពឹងពាក់តាមផ្លូវច្បាប់ ឲ្យរៀបចំដាក់ពាក្យបណ្តឹងប្តឹងឈ្មោះ ពេជ្រ ស្រីមុំ ដែរ ពាក់ព័ន្ធពីបទ.ឆបោកលើទឹកប្រាក់ប្រមាណ ៩៣៤ ៩៦០ ដុល្លារអាមេរិក ដែលជនសង្ស័យបានប្រើប្រាស់ មូលប្បទានប័តអត់សាច់ប្រាក់ចំនួន៩សន្លឹក ជា(សែកស្អុយ)ទាំងអស់ ។ សូមជួយតាមដានតទៅទៀត និងរង់ចាំមើលលើកនេះតើស្រ្តីអ្នកជំនួញហាយសូរ ពេជ្រ ស្រីមុំ មានវាសនាបែបណា ? ៕
ដោយ ៖ រ៉ារ៉ា
