សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បណ្ដាជនដែលរស់រានមានជីវិតពីការជួញដូរមនុស្ស ទាសភាព និងការរំលោភបំពានផ្សេងៗ ជាង ៤ពាន់នាក់ ត្រូវបានជួយសង្រ្គោះឱ្យមានជីវភាព និងជីវិតល្អប្រសើរឡើងវិញ បន្ទាប់ពីជនរងគ្រោះទាំងនេះត្រូវបានបាត់បង់ក្តីសង្ឃឹម អស់ទំនុកចិត្ត និងគុណតម្លៃជីវិតរបស់ពួកគេ។
បើយោងតាមសេចក្តីប្រកាសព័ត៌មានរបស់អង្គការហាការ ដែលបានផ្តល់ជូនក្នុងកម្មវិធីសិក្ខាសាលាមួយ ក្រោមអធិបតីភាព លោកស្រី ជូ ប៊ុនអេង រដ្ឋលេខាធិការក្រសួង មហាផ្ទៃ និងជាអនុប្រធានអចិន្ត្រៃយ៍គណៈកម្មា ធិការជាតិប្រយុទ្ធប្រឆាំងការជួញដូរមនុស្ស នាថ្ងៃទី២៣ ខែវិច្ឆិកា ឆ្នាំ២០២២នេះ បានឱ្យដឹងថា ជនរងគ្រោះទាំង ប្រុសទាំងស្រីជាង៤ពាន់នាក់ដែលត្រូវបានជួញដូរ និងរំលោភបំពាន ត្រូវបានអង្គការហាការ សហការជាមួយរាជរដ្ឋាភិបាល អង្គការក្រៅរដ្ឋាភិបាលរួមទាំងប្រទេសម្ចាស់ជំនួយបានផ្តល់ក្តីសង្ឃឹមដល់ពួកគេឡើងវិញ ហើយការផ្តល់ក្តីសង្ឃឹមឡើងវិញនេះ មិនត្រឹមតែមាន ស្មារតីល្អនោះទេ ថែមទាំងមានជីវភាពល្អប្រសើរ នៅក្នុងសហគមន៍ថែមទៀតផងដែរ។
សេចក្តីប្រកាសព័ត៌មាន បានបង្ហាញទៀតថា«យើងបានរួមគ្នាជួយជីវិតជនងាយរងគ្រោះ និងអ្នករស់រានមាន ជីវិតជាច្រើននាក់ ដែលបាត់បង់ក្តីសង្ឃឹម ទំនុកចិត្ត និងគុណតម្លៃជីវិត ទៅកាន់ជីវិតថ្មីដែល ពោរពេញដោយក្តីសង្ឃឹម និងសុភមង្គល ក៏ដូចជាការរួមចំណែកដល់សង្គមជាដើម»។
ប្រភពបាន បញ្ជាក់បន្ថែមទៀតថា ចាប់តាំងពីពេលដែលអង្គការ និងដៃគូទទួលយកជនរងគ្រោះមកថែទាំគឺក្រុម ការងារបានធ្វើការជាមួយពួកគេ ដើម្បីវាយតម្លៃពីតម្រូវ ការរបស់ពួកគេ ហើយផ្តល់ជូននូវសេវាកម្មដែលមានលក្ខណៈបុគ្គលពេញលេញ និងចាំបាច់បំផុត។
ក្រុមការងារបានកសាងទំនុកចិត្តនិងភាពជាសះស្បើយ ឡើងវិញ។ អង្គការសង្គមស៊ីវិល និងដៃគូបានផ្តល់ជូនកន្លែងរស់នៅប្រកបដោយសុវត្ថិភាព ការផ្តល់ប្រឹក្សា សេវាកម្មគ្រប់ករណី ជំនួយផ្នែកច្បាប់ ការអប់រំ សុវត្ថិភាព និងផ្តល់សេវារៀបចំការរៀបចំការ ងារដល់ពួកគេផងដែរ។
ក្រុមការងារបានបង្កើតឱកាសដើម្បីធានាថា ពួកគេម្នាក់ៗនោះមិនគ្រាន់តែរស់រានមានជីវិតតែប៉ុណ្ណោះទេ ប៉ុន្តែត្រូវប្រាកដថាពួកគេម្នាក់ៗនឹងក្លាយជាជើងឯកសម្រាប់ការផ្លាស់ប្តូរក្នុងជីវិតរបស់ពួកគេ និងនៅក្នុងសហគមន៍ជាដើម៕
ដោយ៖ សូរិយា
