រដ្ឋមន្រ្តីក្រសួងកសិកម្ម៖ កិច្ចសហការរវាងក្រុមហ៊ុន និងសមាគមចិញ្ចឹមសត្វ មានភាពចាំបាច់ណាស់ ដេីម្បីវាយតម្លៃទីផ្សារ និងរៀបចំផែនការផលិត ទាំងតម្រូវការ និងការផ្គត់ផ្គង់សាច់សត្វនៅលើទីផ្សារ

ចែករំលែក៖

ភ្នំពេញ៖ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែងឱ្យដឹងតាមរយៈបណ្ដាញសង្គមហ្វេសប៊ុកផ្លូវការរបស់លោក នៅព្រឹកថ្ងៃទី២៤ ខែវិច្ឆិកា ឆ្នាំ២០២២នេះយ៉ាងដូចនេះថា៖ កិច្ចសហការរវាងក្រុមហ៊ុន និងសមាគមចិញ្ចឹមសត្វ មានភាពចាំបាច់ណាស់ ដេីម្បីវាយតម្លៃទីផ្សារ និងរៀបចំផែនការផលិត ទាំងតម្រូវការ និងការផ្គត់ផ្គង់សាច់សត្វនៅលើទីផ្សារ។

លោក ឌិត ទីណា បានគូសបញ្ជាក់ថា កាលពីថ្ងៃទី២៣ ខែវិច្ឆិកា ឆ្នាំ២០២២ បន្ទាប់ពីបានទស្សនា និងស្តាប់ការបង្ហាញរបស់ក្រុមហ៊ុន CP Cambodia ខ្ញុំបានឱ្យក្រុមហ៊ុនផ្សព្វផ្សាយដល់កសិដ្ឋានចិញ្ចឹមជ្រូក និងមាន់ទាំងអស់ អំពីគោលនយោបាយអនុគ្រោះថ្លៃភ្លេីងសម្រាប់ការងារកសិកម្ម និងការប្រេីប្រាស់ភ្លេីងពេលយប់។

អគ្គនាយកដ្ឋានសុខភាពសត្វ និងផលិតកម្មសត្វ នឹងចូលរួមពិនិត្យមើលលើការងារនេះ។ ក្នុងស្ថានភាពបច្ចុប្បន្ន ក្រុមហ៊ុនគួរណែនាំដល់កសិដ្ឋានដែលបានធ្វេីកិច្ចសន្យាចិញ្ចឹមជាមួយ កុំទាន់ឱ្យបង្កេីនរោងថ្មី ដើម្បីបញ្ចៀសឱ្យបាននូវការផ្គត់ផ្គង់លេីសតម្រូវការ។

ទាក់ទងនឹងសាច់ជ្រូក ដែលចេញពីទីសត្តឃាតរបស់ក្រុមហ៊ុន ក្រុមហ៊ុនគួរតែទំនាក់ទំនងជាមួយផ្សារទំនេីប ភោជនីយដ្ឋាន ដេីម្បីធានានូវទីផ្សារផ្គត់ផ្គង់ដែលមាននិរន្ដរភាព។

សូមជម្រាបដែរថា នៅរសៀលថ្ងៃទី២៣ ខែវិច្ឆិកាម្សិលមិញនេះដែរ លោករដ្ឋមន្រ្តីកសិកម្ម បានឱ្យដឹងដែរថា៖ ដើម្បីកាត់បន្ថយការចំណាយក្នុងការទិញចូលស្ពែមគោ (ពូជគោប្រាម៉ាន់) កសិដ្ឋានគួរតែសិក្សាពីការចំណាយលើការទិញទឹកស្ពែម ថាតើថ្លៃទិញពីក្រៅប្រទេស និងការផលិតក្នុងស្រុកមួយណាចំណាយច្រើនជាង។ ប្រសិនបើការផលិតក្នុងស្រុកចំណាយតិចជាងកសិដ្ឋានគួរតែសហការជាមួយមន្ត្រីជំនាញរបស់អគ្គនាយកដ្ឋានសុខភាពសត្វ និងផលិតកម្មសត្វ ដើម្បីផលិតទឹកស្ពែមនេះ ដែលមានភាពងាយស្រួលក្នុងការពង្រីក និងផ្សព្វផ្សាយបានលឿន ចំណេញពេលវេលា និងថវិកា។

លោករដ្ឋមន្ត្រី បន្តថា ម្យ៉ាងទៀតដើម្បីឱ្យមានភាពទាក់ទាញនៅក្នុងកសិដ្ឋានយើងគួរតែរៀបចំនូវព្រឹត្តិការណ៍ប្រលងប្រណាំង លក្ខណសម្បត្តិ គោ ដោយមានការចូលរួមពីកសិដ្ឋានមកពីតំបន់ផ្សេងៗ៕