ជនសង្ស័យ៤នាក់ចូលលួចក្រមាមេភូមិចំនួន៧០០ក្រមា ត្រូវកម្លាំងសមត្ថកិច្ចប៉ុស្តិ៍នគរបាលស្ទឹងមានជ័យទី៣ ស្រាវជ្រាវឃាត់ខ្លួនបានម្នាក់ និងគេចខ្លួន៣នាក់

ចែករំលែក៖

ភ្នំពេញ ៖ កម្លាំងនគរបាលប៉ុស្ដិ៍រដ្ឋបាលស្ទឹងមានជ័យទី៣ នៃអធិការដ្ឋាននគរបាលខណ្ឌមានជ័យបានស្រាវជ្រាវឃាត់ខ្លួនជនសង្ស័យម្នាក់ក្នុងចំណោមបក្សពួកចំនួន៤នាក់ បន្ទាប់ពីជនទាំងនេះគាស់បន្ទប់លោកមេភូមិម្នាក់លួចយកក្រមាដែលទុកធ្វើជាកាដូអនុស្សាវរីយ៍នៅថ្ងៃការចៅដោយយកទៅលាក់ទុកនៅផ្ទះម៉ែក្មេក ។

ប្រតិបត្តិការឃាត់ខ្លួនជនសង្ស័យខាងលេីនេះ បានធ្វើឡេីងនៅវេលាម៉ោង៩និង៤០នាទី ថ្ងៃទី២ ខែធ្នូ ឆ្នាំ២០២២ នៅចំណុចផ្លូវលំ ភូមិដំណាក់ធំ២ សង្កាត់ស្ទឹងមានជ័យទី៣ ខណ្ឌមានជ័យ ។

សមត្ថកិច្ចបានឱ្យដឹងថា ជនសង្ស័យម្នាក់ដែលសមត្ថកិច្ចឃាត់ខ្លួនបានមានឈ្មោះ ខែ តារ៉ា ភេទប្រុស អាយុ៤០ឆ្នាំ មុខរបរ និងស្នាក់នៅមិនពិតប្រាកដ (មានផ្ទុកសារធាតុញៀន) ។ ដោយឡែកបក្សពួកបីនាក់ទៀត ដែលកំពុងគេចខ្លួន មានឈ្មោះ ទី១-ឡាង ភេទប្រុស អាយុ២៦ឆ្នាំ ទី២-ឈ្មោះ ធា ភេទប្រុស អាយុ១៧ឆ្នាំ ទី៣-ឈ្មោះ គ័ង ភេទប្រុសអាយុ២៦ឆ្នាំ អ្នកទាំងបីមានមុខរបរនិងស្នាក់នៅមិនពិតប្រាកដដូចគ្នា ។ ពេលឃាត់ខ្លួនជនសង្ស័យសមត្ថកិច្ចបានដកហូតវត្ថុតាង ក្រមាខ្មែរចំនួន៧០០ក្រមាដែលជារបស់ជនរងគ្រោះផងដែរ ។

ចំណែកជនរងគ្រោះវិញ មានឈ្មោះ សៀង សារុន ភេទប្រុស អាយុ៦២ឆ្នាំ មុខរបរមេភូមិស្នាក់នៅផ្ទះលេខ ៩៦៨ ផ្លូវបេតុង ភូមិដំណាក់ធំ២ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ។

លោក ឯម ភារី នាយប៉ុស្តិ៍នគរបាលរដ្ឋបាលស្ទឹងមានជ័យទី៣បានឱ្យដឹងថា មុននឹងឈានទៅដល់ការឃាត់ខ្លួនជនសង្ស័យខាងលើបានកាលពីយប់ថ្ងៃទី២ ខែធ្នូ ឆ្នាំ២០២២ វេលាម៉ោង២និង១០នាទី ជនរងគ្រោះបានទិញក្រមាចំនួន៧០០ក្រមាដេីម្បីយកមកទុកធ្វើជាកាដូអនុស្សាវរីយ៍ក្នុងថ្ងៃមង្គលការចៅ ហើយក៏យកក្រមាទៅទុកក្នុងបន្ទប់ផ្ទះខាងក្រោម រួចហើយរូបគាត់បានទៅសម្រាកនៅបន្ទប់ខាងមុខលង់លក់ដូចសព្វដងបាត់ទៅ។

ប្រភពដដែលបានបន្តទៀតថា លុះដល់ជនរងគ្រោះភ្ញាក់ដឹងខ្លួនពីដំណេកវិញក៏

បានដេីរចូលទៅមេីលក្នុងបន្ទប់ខាងក្រោយក៏ស្រាប់តែឃេីញបន្ទប់ត្រូវបានជនសង្ស័យគាស់ទម្លុះទម្លាយ ហើយយកក្រមាទៅបាត់អស់តែម្ដងទេីបបានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលស្ទឹងមានជ័យទី៣ ដេីម្បីឱ្យសមត្ថកិច្ច ជួយស្រាវជ្រាវរកជនសង្ស័យយកមកចាត់ការតាមច្បាប់។

ក្នុងករណីនេះដែរ បន្ទាប់ទទួលបានពាក្យបណ្ដឹងពីជនរងគ្រោះរួចហើយ និងមានការចង្អុលបង្ហាញពីលោកវរសេនីយទោ អ៊ុក បូនិន អធិការនគរបាលខណ្ឌមានជ័យ បានបញ្ជាឱ្យកម្លាំងសមត្ថកិច្ចប៉ុស្តិ៍នគរបាលរដ្ឋបាលស្ទឹងមានជ័យទី៣ ដោយមានការចុះដឹកនាំផ្ទាល់ដោយលោក ឯម ភារី នាយប៉ុស្តិ៍នគរបាលស្ទឹងមានជ័យទី៣ បានធ្វើការស្រាវជ្រាវតាមជំនាញរហូតដល់ឃាត់ខ្លួនជនសង្ស័យម្នាក់ ឈ្មោះ ខៃ តារ៉ា ហៅស័រ នៅចំណុចផ្លូវបេតុង ភូមិដំណាក់ធំ២ សង្កាត់ស្ទឹងមានជ័យទី៣ យកទៅសាកសួរនៅប៉ុស្តិ៍។

ចំពោះការសាកសួរ ជនសង្ស័យបានសារភាពថា រូបគេរួមជាមួយបក្ស៣នាក់ទៀតបានធ្វើសកម្មភាពគាស់ទម្លុះទម្លាយ យកក្រមារបស់ជនរងគ្រោះពិតប្រាកដមែន ហើយពេលយកបានហេីយ ជនសង្ស័យបានយកក្រមានោះទៅផ្ញើនៅ អតីតផ្ទះម៉ែក្មេក ទេីបសមត្ថកិច្ចនាំជនសង្ស័យទៅយកក្រមាដែលជារបស់ជនរងគ្រោះបានទាំងអស់មកវិញ ។

ក្រោយពេលសាកសួររួចហើយ ជនសង្ស័យត្រូវបានសមត្ថកិច្ចកសាងសំណុំរឿងបញ្ជូនខ្លួនទៅផ្នែកជំនាញនៃអធិការដ្ឋាននគរបាលខណ្ឌមានជ័យដេីម្បីចាត់ការបន្តតាមនិតិវិធី ចំណែកជនសង្ស័យ៣នាក់ទៀតដែលកំពុងរត់គេចខ្លួន សមត្ថកិច្ចនិងធ្វើការស្រាវជ្រាវដេីម្បីយកមកចាត់ការបន្តតាមច្បាប់ផងដែរ ៕