សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង ៖ នៅព្រឹកថ្ងៃសៅរ៍ ទី០៣ ខែធ្នូ ឆ្នាំ២០២២ លោកឧត្តមសេនីយ៍ត្រី ហេង ប៊ុនទី មេបញ្ជាការ កងរាជអាវុធហត្ថខេត្តព្រះសីហនុ បានចាត់តំណាងឲ្យ លោកឧត្តមសេនីយ៍ត្រី ខៀវ សំណាង មេបញ្ជាការរង កងរាជអាវុធហត្ថខេត្តព្រះសីហនុ អញ្ជើញជួបសំណេះសំណាល លើកទឹកចិត្ត និងនាំយកនូវអំណោយឧបត្ថម្ភរួមមាន គ្រឿងឧបភោគ បរិភោគ និងថវិកាមួយចំនួន ប្រគល់ជូនដល់ក្រុមកីឡាករអ៊ុំទូក មានឈ្មោះ ” បារមីព្រះថោងនាងនាគខេត្តព្រះសីហនុ “ របស់បញ្ជាការដ្ឋានកងរាជអាវុធហត្ថខេត្តព្រះសីហនុ ក្រោមការដឹកនាំផ្តួចផ្តើមឧបត្ថម្ភគាំទ្រពីលោកឧត្តមសេនីយ៍ត្រី ហេង ប៊ុនទី មេបញ្ជាការ កងរាជអាវុធហត្ថខេត្តព្រះសីហនុ ដែលត្រូវចូលរួមក្នុងពិធីប្រឡងប្រណាំងទូក ទូក ង ទូក មួង និងទូកប្រពៃណី ខ្នាតអន្ដរជាតិ នៅដងទន្លេសាប ផ្សារក្រោម ខេត្តកំពង់ឆ្នាំង។
ក្នុងឱកាសនេះ លោកឧត្តមសេនីយ៍ត្រី មេបញ្ជាការរង បានធ្វើការណែនាំ និងពាំនាំនូវការផ្តាំផ្ញើពីសំណាក់លោកឧត្តមសេនីយ៍ត្រី មេបញ្ជាការ ដល់ក្រុមកីឡាករអ៊ុំទូកទាំងអស់ ត្រូវចូលរួមគោរពវិន័យ ច្បាប់លក្ខន្តិក:ទូទៅរបស់គណ:កម្មការរៀបចំ ការប្រឡងប្រណាំងទូក មានក្រមសីលធម៌ សុជីវភាពល្អ សាមគ្គីភាពផ្ទៃក្នុងរឹងមាំជាថ្លុងតែមួយ ខិតខំប្រឹងប្រែងបញ្ចេញអស់សមត្ថភាពជំនាញដែលខ្លួនមាន ដើម្បីឈានទៅយកជ័យជម្នះក្នុងការប្រកួតប្រជែង និងទទួលបាននូវជ័យលាភី ៕
ដោយ : សិលា
