សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ ៖ រដ្ឋបាលខេត្តបន្ទាយមានជ័យនៅព្រឹកថ្ងៃទី៤ខែធ្នូឆ្នាំ២០២២បានបើកកិច្ចប្រជុំការងារសន្តិសុខ សណ្តាប់ធ្នាប់ និងបច្ចេកទេស ដល់ប្រធាន អនុប្រធាន មណ្ឌលសំណេរ ត្រៀមសម្រាប់ថ្ងៃប្រឡង មធ្យមសិក្សាទុតិយភូមិ (បាក់ឌុប) ។
លោក ឱម សិទ្ធី អគ្គនាយករង នៃអគ្គនាយកដ្ឋានអប់រំ លោក ហ៊ឹល រ៉ាយ៉ា អភិបាលរងខេត្ត និង តំណាងអង្គភាពប្រឆាំងអំពើពុករលួយ (ACU) អញ្ជើញជាអធិបតីភាព កិច្ចប្រជុំការងារសន្តិសុខ សណ្តាប់ធ្នាប់ និងបច្ចេកទេស ដល់ប្រធាន អនុប្រធាន មណ្ឌលសំណេរ ត្រៀមសម្រាប់ថ្ងៃប្រឡង មធ្យមសិក្សាទុតិយភូមិ (បាក់ឌុប) ដែលនឹងប្រព្រឹត្តទៅនៅថ្ងៃទី៥-៦ ខែធ្នូខាងមុខនេះ។
កិច្ចប្រជុំខាងលើក៏មានការចូលរួមពីសំណាក់គណៈមេប្រយោគ កងកម្លាំង មន្ទីរ អង្គភាព ស្ថាប័នពាក់ព័ន្ធបានចូលរួមផងដែរ នៅសាលប្រជុំ មន្ទីរអប់រំ យុវជន និងកីឡាខេត្ត នាថ្ងៃទី៣ ខែធ្នូ ឆ្នាំ២០២២ម្សិលមិញ ។
ថ្លែងនៅក្នុងកិច្ចប្រជុំនោះលោក ឱម សិទ្ធី ក៏បានណែនាំដល់ប្រធាន អនុប្រធានមណ្ឌល ទាំងអស់ត្រូវអនុវត្តនូវច្បាប់វិន័យរបស់នៃការប្រឡងឱ្យបានខ្ជាប់ខ្ជួន ដោយមិនត្រូវអនុញ្ញាតឲ្យបេក្ខជន មានយកសំណៅឯកសារណាមួយចូលទៅក្នុងបន្ទប់ប្រឡងឡើយ។
លោក ឈូ ប៊ុនរឿង ប្រធានមន្ទីអប់រំ យុវជន និងកីឡាខេត្តបន្ទាយមានជ័យ បានឱ្យដឹងថា ៖ ការប្រឡង មធ្យមសិក្សាទុតិយភូមិ (បាក់ឌុប) ឆ្នាំ២០២២ នៅខេត្តបន្ទាយមានជ័យ មានមណ្ឌលប្រឡង ចំនួន៧ មណ្ឌល (ថ្នាក់វិទ្យាសាស្រ្ត និង ថ្នាក់វិទ្យាសាស្រ្ត សង្គម ) រួមមាន ៖ ថ្នាក់វិទ្យាសាស្រ្ត (វិទ្យាល័យ សម្តេចឪ, សាលាបឋមសិក្សា ហ៊ុន សែន សូភី, វិទ្យាល័យ ហ៊ុន សែន ខ្លាកូន) ថ្នាក់វិទ្យាសាស្រ្ត សង្គម ( វិទ្យាល័យ សិរីសោភ័ណ, សាកលវិទ្យាល័យ គ្រប់គ្រង និងសេដ្ឋកិច្ច UME, វិទ្យាល័យ អូរអំបិល និងសាកលវិទ្យាល័យជាតិ មានជ័យ NCU។
លោកប្រធានមន្ទីរអប់រំ បញ្ជាក់ថា នៅក្នុងឆ្នាំ២០២២នេះ បេក្ខជនដែលមានឈ្មោះប្រឡងចំនួន ៥,៧៦០នាក់/ស្រី៣,១៥៨នាក់ ៕
ដោយ ៖ វណ្ណា
