🔴Breaking News ៖ ជនរងគ្រោះជាលោកអធិការរង នគរបាលខណ្ឌច្បារអំពៅ អះអាងថា, គាត់គ្មានប៉ះអីបន្តិចជាមួយជនបង្ក ហេតុអីក៏មានការបកស្រាយខុសពីការពិតទៅ អ្នកនាំពាក្យស្នងការ ឬតំណាងអយ្យការ !

ភ្នំពេញ ៖ មុននេះបន្តិច ! នៅព្រលប់ថ្ងៃទី១០ ខែធ្នូ ឆ្នាំ២០២២ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានចេញសេចក្ដីបកស្រាយបំភ្លឺ ករណីទាក់ទងទៅនឹងចុះផ្សាយរបស់លោកវរសេនីយ៍ទោ ហេង សុវណ្ណដារ៉ា អធិការរងនគរបាលខណ្ឌច្បារអំពៅ ថាមានភាពអយុត្តិធម៌ ចំពោះករណីបង្កហិង្សាមកលេីរូបគាត់ សំដៅថា, លោកអធិការរង បានទាញកអាវប្រតាយប្រតប់គ្នា រួចឈ្មោះ ប៉ែន ផល្លា វាយឈ្មោះ ហេង សុវណ្ណដារ៉ា របួសក្បាល១កន្លែង និងបែកមាត់ ចំណែក ឈ្មោះ ប៉ែន ផល្លា របួសកំភួនដៃខាងស្តាំ ។ ពាក់ព័ន្ធករណីនេះ ហេង សុវណ្ណដារ៉ា អធិការរង មានជំហរដដែល ដោយបញ្ជាក់ប្រាប់ អង្គភាពមជ្ឈមណ្ឌលព័ត៌មាន”នគរវត្ត”ទាំងយប់ថា, លោកមិនបានប្រើហិង្សាតដៃ ឬប៉ះទៅលើលោក  ប៉ែន ផល្លា ទាល់តែសោះ ! លោកលើកឡើងថា, អ្នកណារាយការណ៍បែបនេះ ? ទៅអ្នកនាំពាក្យស្នងការ ឬរាយការណ៍ទៅតំណាងអយ្យការ ខុសពីការពិត ! ។ លោកថា, យកចម្លើយជនបង្ក ឬរបាយការណ៍លោកអធិការខណ្ឌ ព្រោះលោកអត់ប្រព្រឹត្តបែបហ្នឹងផង។ 

អង្គភាពមជ្ឈមណ្ឌលព័ត៌មាន”នគរវត្ត” សូមលើកយកសេចក្តីបកស្រាយបំភ្លឺរបស់ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ ទាំងស្រុងមកបញ្ជាក់ជូន សំខាន់ លោកអធិការរង ជាជនរងគ្រោះ គាត់ថា គាត់គ្មានតបតសោះជាមួយជនបង្ក !

ខាងក្រោមនេះការបំភ្លឺរបស់ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ ៖

សេចក្តីបកស្រាយបំភ្លឺរបស់ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ ទាក់ទងទៅនឹងចុះផ្សាយរបស់លោកវរសេនីយ៍ទោ ហេង សុវណ្ណដារ៉ា អធិការរងនគរបាលខណ្ឌច្បារអំពៅ ថាមានភាពអយុត្តិធម៌ ចំពោះករណីបង្កហិង្សាមកលេីរូបគាត់ ដែលកេីតឡេីងបន្ទាប់ពីមានករណីគ្រោះថ្នាក់ចរាចរណ៍រវាងរថយន្តម៉ាក Hyundai និងម៉ូតូម៉ាក Hondaមានសណ្តោងរ៉ឺម៉ក នៅចំណុចមុខហាងលក់សម្ភារៈយីហោ “២៥០០” ផ្លូវ៣៥១ ភូមិតាងៅ សង្កាត់និរោធ ខណ្ឌច្បារអំពៅ រាជធានីភ្នំពេញ កាលពីថ្ងៃទី០៩ ខែធ្នូ ឆ្នាំ ២០២២ ម៉ោង១៦:៣០នាទី។

  កាលពីថ្ងៃទី០៩ ខែធ្នូ ឆ្នាំ២០២២ ម៉ោង១៦:៣០នាទី មានគ្រោះថ្នាក់ចរាចរណ៍កើតឡើងរវាងរថយន្តម៉ាក Hyundai ពណ៌ខៀវ ផ្លាកលេខ ភ្នំពេញ ២X-៥៧០៤ (អ្នកបើកបរ ឈ្មោះ គីម ហេង ជនជាតិ វៀតណាម) ជាមួយម៉ូតូម៉ាក Honda ពណ៌ខ្មៅ គ្មានផ្លាកលេខ មានសណ្តោងរ៉ឺម៉ក (អ្នកបើកបរ ឈ្មោះ ឌី ជនជាតិ ខ្មែរ ជាកម្មករ) នៅចំណុចមុខហាងលក់សម្ភារៈយីហោ “២៥០០” ផ្លូវ៣៥១ ភូមិតាងៅ សង្កាត់និរោធ ខណ្ឌច្បារអំពៅ បណ្តាលឲ្យរថយន្តបែកស្តុបក្រោយខាងឆ្វេង និងកំពិតទ្វារខាងឆ្វេង រួចឈ្មោះ ប៉ែន ផល្លា (ជាម្ចាស់ម៉ូតូ) បានចេញមុខធ្វើការដោះស្រាយសងការខូចខាតជាមួយម្ចាស់រថយន្តឈ្មោះ គីម ហេង ជំនួសឈ្មោះ ឌី រួចហើយ។

ពេលនោះ ឈ្មោះ ប៉ែន ផល្លា ក៏អូសរ៉ឺម៉កចូលខាង ស្រាប់តែឈ្មោះ ហេង សុវណ្ណដារ៉ា (អធិការរងខណ្ឌច្បារអំពៅ) ស្លៀកពាក់ស៊ីវិលជិះម៉ូតូមកដល់ស្គាល់ម្ចាស់រថយន្តក៏សួរនាំ រួចឈ្មោះ គីម ហេង ប្រាប់ថាមានបុរសម្នាក់បើកម៉ូតូសណ្តោងរ៉ឺម៉កបុករថយន្តរបស់ឈ្មោះ ឌី រួចឈ្មោះ ហេង សុវណ្ណដារ៉ា ពុំបានសួរនាំរឿងហេតុដឹងសព្វគ្រប់អស់ទេ ក៏ទៅចាប់ទាញដៃឈ្មោះ ប៉ែន ផល្លា មិនឲ្យអូសម៉ូតូចេញទៅណា ហើយក៏ឈ្លោះប្រកែកគ្នា រួចឈ្មោះ ហេង សុវណ្ណដារ៉ា ក៏ជេរឈ្មោះ ប៉ែន ផល្លា ថាអាចុយម្រាយ ថែមទាំងទាញកអាវប្រតាយប្រតប់គ្នា រួចឈ្មោះ ប៉ែន ផល្លា វាយឈ្មោះ ហេង សុវណ្ណដារ៉ា របួសក្បាល១កន្លែង និងបែកមាត់ ចំណែក ឈ្មោះ ប៉ែន ផល្លា របួសកំភួនដៃខាងស្តាំ។

បន្ទាប់ពីកើតហេតុភ្លាម សមត្ថកិច្ចចុះអន្តរាមន៍ហៅឈ្មោះ ហេង សុវណ្ណដារ៉ា និងឈ្មោះ ប៉ែន ផល្លា មកទីស្នាក់ការប៉ុស្តិ៍នគរបាលរដ្ឋបាលនិរោធន៍ ដើម្បីធ្វើការសាកសួរ រួចបញ្ជូនមកអធិការដ្ឋាននគរបាលខណ្ឌច្បារអំពៅ។

ក្រោយពីធ្វើការសាកសួររួច សមត្ថកិច្ចបានសុំគោលការណ៍ពីលោក ហេង ផេង ព្រះរាជអាជ្ញារង នៃ អយ្យការអមសាលាដំបូងរាជធានីភ្នំពេញ និងលោក ហេង ផេង ព្រះរាជអាជ្ញារង ដើម្បីឃាត់ខ្លួនឈ្មោះ ប៉ែន ផល្លា នៅអធិការដ្ឋាននគរបាលខណ្ឌច្បារអំពៅ។ ប្រហែល១ម៉ោងក្រោយមកលោកព្រះរាជអាជ្ញារង ក៏ទាក់ទងមកអធិការនគរបាលខណ្ឌច្បារអំពៅ ដើម្បីធានា និងធ្វើកិច្ចសន្យាឈ្មោះ ប៉ែន ផល្លា ឲ្យត្រលប់ទៅលំនៅដ្ឋានវិញជាបណ្តោះអាសន្ន។ 

បច្ចុប្បន្នសមត្ថកិច្ចបានកំពុងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដេីម្បីចាត់ការបន្តតាមនីតិវិធីច្បាប់ ។ 

ជាក់ស្តែងសំណុំរឿងត្រូវបានបញ្ជូនទៅសាលាដំបូងរាជធានីភ្នំពេញ ចំណាត់ការបន្តផ្នែកច្បាប់នឹងត្រូវអនុវត្ត ចំពោះការអនុញ្ញាតឲ្យជនបង្កដែលមានអ្នកធានា និងធ្វេីកិច្ចសន្យាឲ្យត្រឡប់ទៅគេហដ្ឋានវិញជាបណ្តោះអាសន្ន ជាការអនុញ្ញាតរបស់លោកព្រះរាជអជ្ញាររង ។

អង្គភាព មជ្ឈមណ្ឌលព័ត៌មាន”នគរវត្ត” នឹងរង់ចាំការបកស្រាយគ្រប់ភាគី ឈរលើមូលដ្ឋានជាក់លាក់ នូវការបង្ហាញការពិត ពីជនបង្ក ជនរងគ្រោះ , អធិការ , អ្នកនាំពាក្យ , លោកស្នងការ, តំណាងអយ្យការ ដើម្បីឱ្យមានតម្លាភាព ខណៈប្រទេសជាតិយើង គ្រប់គ្រងដោយច្បាប់ ទាំងមន្ត្រីនគរបាលយុត្តិធម៌ ទាំងតំណាងអយ្យការ ទាំងជនរងគ្រោះ ទាំងជនបង្ក មានអំណះអំណាង ដូចៗគ្នា ពិសេសតំណាងអយ្យការ គាត់មានការ ថ្លឹងថ្លែងច្បាស់ ៕ 

ដោយ ៖ សុខ ខេមរា