សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានជិះម៉ូតូមួយគ្រឿងតាមដងផ្លូវ៦០ម៉ែត្រ (វិថីសម្ដេចតេជោ) ស្រាប់តែរថយន្តមួយគ្រឿងមិនស្គាល់ម៉ាកបេីកមកកៀរឱ្យដួលបោកក្បាលនឹងថ្នល់ស្លាប់ក្នុងថ្លុកឈាមយ៉ាងអាណោចអាធ័ម រីឯរថយន្តបង្កហេតុបេីកគេចខ្លួនបាត់ស្រមោល ។
ករណីគ្រោះថ្នាក់ចរាចរណ៍នេះបានកើតឡើងកាលវេលាម៉ោង២និង១០នាទីរសៀលថ្ងៃសុក្រ ទី១៦ ខែធ្នូ ឆ្នាំ ២០២២ នៅតាមបណ្ដោយផ្លូវ៦០ម៉ែត្រ (វិថីសម្ដេចតេជោ)ស្ថិតក្នុងភូមិទួលរកា៣ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។
សពជនរងគ្រោះមានឈ្មោះ វៀង យុាំងហុីវ ភេទប្រុស អាយុ២៤ឆ្នាំ ជនជាតិវៀតណាម ស្នាក់នៅភូមិដើមមៀន សង្កាត់ដើមមៀន ក្រុងតាខ្មៅ ខេត្តកណ្តាលជិះម៉ូតូម៉ាកហុងដាឌ្រីម ស៊េរីឆ្នាំ២០០៧ ពណ៌ខ្មៅ ពាក់ផ្លាកលេខភ្នំពេញ1AF-1837 ។
តាមប្រភពព័ត៌មានពីកន្លែងកេីតហេតុបានឱ្យដឹងថា មុនកើតហេតុគេឃេីញជនរងគ្រោះជិះម៉ូតូមួយគ្រឿងតែម្នាក់ឯង តាមបណ្ដោយផ្លូវ៦០ម៉ែត្រ ក្នុងទិសដៅពីជើងទៅត្បូង ខណៈមកដល់ចំណុចកេីតហេតុស្រាប់តែមានរថយន្តមួយគ្រឿងមិនស្គាល់ម៉ាកនិងផ្លាកលេខធ្វេីដំណេីរ
ស្របទិសគ្នាយ៉ាងលឿន ហេីយបានកៀរម៉ូតូជនរងគ្រោះបណ្ដាលឱ្យដួលនិងធ្វេីឱ្យជនរងគ្រោះបោកក្បាលនឹងថ្នល់ស្លាប់ក្នុងថ្លុកឈាមយ៉ាងអាណោចអាធ័ម ភ្លាមៗនោះដែររថយន្តបង្កហេតុបានបន្ថែមល្បឿនបេីករត់បាត់ស្រមោលទៅ។
ក្រោយកេីតហេតុ សមត្ថកិច្ចមូលដ្ឋានបានចុះមកដល់ និងបានសហការជាមួយជំនាញចរាចរណ៍ធ្វេីការវាស់វែងយកម៉ូតូជនរងគ្រោះទៅរក្សាទុកនៅអធិការដ្ឋាននគរបាលខណ្ឌមានជ័យ ជាបណ្ដោះអាសន្ន ។ ចំណែកសពត្រូវបានសមត្ថកិច្ចធ្វេីកំណត់ហេតុប្រគល់ឱ្យសាច់ញាតិយកទៅធ្វេីបុណ្យតាមប្រពៃណី ៕
ដោយ ៖ ភារ៉ា ដង្កោ
