បុរសម្នាក់បើករថយន្តលឿនពេកជ្រុលទៅបុករថយន្តចតនៅលើចិញ្ចើមផ្លូវបណ្តាលឱ្យខូចខាតផ្នែកខាងមុខយ៉ាងដំណំ

   ភ្នំពេញ ៖ បុរសម្នាក់បានបើករថយន្តក្នុងល្បឿនលឿនខ្វះការប្រុងប្រយ័ត្នធ្វើឱ្យរេចង្កូតមកខាងស្តាំដៃជ្រុលទៅបុករថយន្តចតស្ងៀមនៅចិញ្ចើមផ្លូវចំពីចំហៀងខាងស្តាំផ្នែកខាងក្រោយបណ្តាលឱ្យខូចខាត ចំណែករថយន្តបង្កខូចខាតមួយកំណាត់មុខទាំងស្រុង។

    ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង ១១និង៣០នាទីយប់ថ្ងៃទី១៧ ខែធ្នូ ឆ្នាំ២០២២ ស្ថិតនៅតាមបណ្តោយផ្លូវបុរីអង្គរ ទល់មុខភោជនីយដ្ឋានទ្រខ្មែរ ក្នុងសង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ។

    ប្រភពព័ត៌មាននៅកន្លែងកើតហេតុ បានឱ្យដឹងថា មុនពេលកើតហេតុគេឃើញរថយន្តម៉ាក RAM ពណ៌សមួយគ្រឿងពាក់ស្លាកលេខ ខេមរភូមិន្ទ02 2.0988 បានចតនៅប្របចិញ្ចើមផ្លូវមុខភោជនីយដ្ឋានទ្រខ្មែរ ចំណែកឯម្ចាស់បានចូលទៅខាងក្នុងហាង។  លុះមួយសន្ទុះក្រោយមក ស្រាប់តែមានរថយន្តម៉ាកFord Raptor ពណ៌ខ្មៅពាក់ស្លាកលេខ កម្ពុជា X.STR.01 បើកបរដោយបុរសម្នាក់ធ្វើដំណើរចេញពីបណ្តោយផ្លូវបុរីអង្គរ ក្នុងទិសដៅពីជើងទៅត្បូងក្នុងល្បឿនលឿន ខណៈមកដល់ចំណុចកើតហេតុបានរេចង្កូតមកខាងស្តាំដៃ ជ្រុលទៅបុកពីចំហៀងខាងស្តាំផ្នែកខាងក្រោយរថយន្តស៊េរីទំនើបម៉ាកRAM បណ្តាលឱ្យរងការខូចខាត ចំណែករថយន្តបង្កហេតុវិញខូចខាតផ្នែកខាងមុខស្ទើរតែទាំងស្រុង ប៉ុន្តែសំណាងដែរដែលនៅក្នុងហេតុការណ៍គ្រោះថ្នាក់ចរាចរណ៍នេះមិនបណ្តាលឱ្យមានអ្នករងរបួស។

បន្ទាប់ពីកើតហេតុសមត្ថកិច្ចមូលដ្ឋាន ប៉ុស្ដិ៍នគរបាលរដ្ឋបាលសង្កាត់ទួលសង្កែទី ២បានចុះមកដល់ រួចឱ្យភាគីទាំងសងខាងសម្របសម្រួលគ្នា ដោយភាគីរថយន្តបង្កព្រមចេញសំណងជួសជុលរថយន្តរងគ្រោះដើម្បីបញ្ចប់រឿងនៅនឹងកន្លែងកើតហេតុ៕

ដោយ៖ ជ្រោយពេជ្រ