សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ក្នុងជំនួប បើកឆាកពូល A នៃពានរង្វាន់បាល់ទាត់ជើងឯកអាស៊ីអាគ្នេយ៍ AFF Mitsubishi Electric Cup 2022 ក្រុមជម្រើសជាតិកម្ពុជា បានទទួល ៣ពិន្ទុពេញ ក្រោយយកឈ្នះក្រុមភ្ញៀវហ្វីលីពីន ៣-២ នៅពហុកីឡដ្ឋានជាតិមរតកតេជោ ។
សូមបញ្ជាក់ថា, ជំនួបបើកឆាកពានរង្វាន់ប្រចាំតំបន់នេះ ២០នាទីដំបូង ក្រុមគោព្រៃកម្ពុជា បាននាំមុខហ្វីលីពីន ២គ្រាប់ ដែលធ្វើសម្រេចដោយកីឡាករ រ៉ឹង ប៊ុនហៀង នៅនាទី១៦ និងកីឡាករ អ៊ន ចាន់ប៉ូលីន នៅនាទី២០ មុនកីឡាករហ្វីលីពីន Kenshiro Michael Lontok Daniels រកបាន ១គ្រាប់វិញ នៅនាទី៤១ ។ ចប់តង់ទី១ ក្នុង៤៥នាទី ថែម នាទី គឺកម្ពុជា នាំមុខហ្វីលីពីន ក្នុងលទ្ធផល២-១។
បន្ទាប់មកចូលវគ្គទី២ ខ្សែប្រយុទ្ធវ័យ ២៧ឆ្នាំរបស់ហ្វីលីពីនដដែល Kenshiro Michael Lontok Daniels បានធ្វើសម្រេចគ្រាប់តាមស្មើក្រុមម្ចាស់ផ្ទះ ២-២ វិញ នៅនាទី៥៥ ។ ប៉ុន្ដែកីឡាករ រ៉ឹង ប៊ុនហៀង បានបន្ថែមគ្រាប់នាំមុខជាថ្មីឲ្យកម្ពុជាវិញ នៅនាទី៥៩ ហើយក៏ជាគ្រាប់បាល់ជ័យជម្នះក្នុងការប្រកួតនេះផងដែរ បន្ទាប់ពីអាជ្ញាកណ្ដាលផ្លុំកញ្ចែបញ្ចប់ការប្រកួតពេញម៉ោង ដោយកម្ពុជា បានយកឈ្នះហ្វីលីពីន ៣-២ នៅនាទី៩០ ថែម ៤នាទី។
ជ័យជម្នះនេះ បានធ្វើឲ្យក្រុមជម្រើសជាតិកម្ពុជា ឈរកំពូលតារាងពូល A បណ្ដោះអាសន្ន មុនធ្វើដំណើរទៅប្រទេសឥណ្ឌូនេស៊ី ដើម្បីតតាំងជាមួយក្រុមម្ចាស់ផ្ទះឥណ្ឌូនេស៊ី នាថ្ងៃទី២៣ ខែធ្នូខាងមុខ ។ បន្ទាប់មកទើបកម្ពុជាត្រូវបើកទ្វារផ្ទះជាថ្មី ទទួលក្រុមជម្រើសជាតិប្រ៊ុយណេវិញ នាថ្ងៃទី២៩ ខែធ្នូ មុនការប្រកួតបញ្ចប់ពូល ជាមួយក្រុមម្ចាស់ផ្ទះថៃ នាថ្ងៃទី០២ ខែមករា ឆ្នាំ២០២៣ ខាងមុខ ។
សារជាច្រើនបានពន្លឺឡើងថា, អបអរសាទរ ក្រុមជម្រើសជាតិបាល់ទាត់កម្ពុជា ទទួលបានជ័យជម្នះ ៣-២ លើក្រុមជម្រើសជាតិបាល់ទាត់ហ្វីលីពីន ក្នុងជំនួបបើកឆាកពូល A នៃពានរង្វាន់ AFF Mitsubishi Electric Cup 2022 #កីឡារស់ក្នុងសន្ដិភាព ។
ចំណាប់អារម្មណ៍របស់លោក Ryu Hirose គ្រូបង្វឹករបស់ក្រុមជម្រើសជាតិកម្ពុជា ក្នុងសន្និសីទសារព័ត៌មានមុនការប្រកួតពានរង្វាន់ AFF Mitsubishi Electric Cup 2022 នឹងក្រុមជម្រើសជាតិហ្វីលីពីន នៅថ្ងៃទី២០ខែធ្នូ ឆ្នាំ២០២២នេះ លោកបាននិយាយថា, ដូចដែលអ្នកទាំងអស់គ្នាបានដឹងរួចមកហើយថា ពួកយើងមានការប្រកួតមិត្តភាព ជាមួយក្រុមជម្រើសជាតិម៉ាឡេស៊ី ប៉ុន្តែយើងមានកាលវិភាគដ៏តានតឹង ព្រោះរដូវ- កាលរបស់លីគកំពូលកម្ពុជាទើបតែបញ្ចប់ ហើយយើងមានពេលត្រឹម ២ថ្ងៃសម្រាប់ ត្រៀមប្រកួត ប៉ុន្ដែពួកយើងបានព្យាយាមយ៉ាងខ្លាំង និងប្រើប្រាស់កីឡាករថ្មីៗជាមួយ ទម្រង់លេងជាច្រើន ដើម្បីប្រកួតជាមួយម៉ាឡេស៊ី តែលទ្ឋផលគឺមិនសូវល្អសម្រាប់ ពួកយើងទេ។ ចំពោះ AFF Mitsubishi Electric Cup នេះវិញ ការរៀបចំរបស់ ពួកយើងគឺដំណើរការបានប្រសើរ ដោយយើងមានពេលវេលាសមរម្យ ក្នុងការធ្វើ ការងារជាមួយកីឡាករ ហើយសម្រាប់ការប្រកួតទល់នឹងហ្វីលីពីននៅថ្ងៃនេះ យើងនឹងប្រឹងប្រែងអនុវត្តទៅតាមផែនការនៃការហ្វឹកហាត់របស់យើងនាពេលកន្លង- មកឲ្យបានល្អ។
ដោយឡែកលោកបណ្ឌិត ហ៊ុន ម៉ាណែត បានបង្ហោះសារយ៉ាងខ្លីថា, អបអរសាទរក្រុមបាល់ទាត់ជ្រេីសជាតិកម្ពុជាបានយកឈ្នះក្រុមបាល់ទាត់ជម្រេីសជាតិហ្វីលីពីន ដោយលទ្ធផល ៣-២ #Hunmanet #Cambodia។
លោក ស សុខា រដ្ឋលេខាធិការ ក្រសួង អប់រំយុវជននិងកីឡា ដែលមានវត្តមាន អញ្ជើញទស្សនាក្នុងការប្រកួតនេះក៏បានសរសេរសារ ថា, អបអរសាទរក្រុមបាល់ទាត់ជម្រើសជាតិកម្ពុជា រកបានជ័យជម្នះជាប្រវត្តិសាស្ត្រក្នុងការប្រកួតបើកឆាក នៃវគ្គជម្រុះតាមពូល ពានរង្វាន់បាល់ទាត់បុរសធំប្រចាំតំបន់អាស៊ាន 2022 AFF Championship (AFF Mitsubishi Electric Cup 2022) ពោលគឺយកឈ្នះលើក្រុមជម្រើសជាតិហ្វីលីពីន ដោយលទ្ធផល ៣-២ លើទីលានពហុកីឡដ្ឋានជាតិមរតកតេជោ ក្នុងរាជធានីភ្នំពេញ នៅល្ងាចថ្ងៃទី២០ ខែធ្នូ ឆ្នាំ២០២២ នេះ។
ក្នុងនាមក្រុមគ្រួសារនៃបាល់ទាត់កម្ពុជា ខ្ញុំសូមជូនពរឱ្យក្រុមគោព្រៃកម្ពុជា ទទួលបានលទ្ធផលជាផ្លែផ្កានៅក្នុងប្រកួតជាបន្តបន្ទាប់ ដែលនៅសល់ក្នុងពូល A នេះ៕
ដោយ ៖ សិលា
