សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសជាជនជាតិចិនម្នាក់បានបេីករថយន្តស៊េរីទំនេីបម៉ាក PORSCHE CAYENNE យ៉ាងលឿនរេចង្កូតជ្រុលទៅបុករថយន្តរបស់តារាចម្រៀង គង់ កែវមរកត ដែលកំពុងតែបេីកបរតាមផ្លូវពីក្រោយយ៉ាងពេញទំហឹង និងមិនទាន់អស់ល្បឿនក៏ជ្រុលទៅបុកម៉ូតូមួយគ្រឿងទៀតបណ្ដាលឱ្យខូចខាតយ៉ាងដំណំ ។ ហេតុការណ៍នេះបានបង្កឱ្យមានការភ្ញាក់ផ្អើលឡើងកាលពីវេលាម៉ោង១២និង៥០នាទីរំលងអធ្រាត្រឈានចូលថ្ងៃពុធទី២១ ខែធ្នូ ឆ្នាំ២០២២ នៅត្រង់ចំណុចភ្លើងស្តុបសេះមាស តាមបណ្ដោយផ្លូវ៣០ម៉ែត្រកែងនឹងមហាវិថីចោមចៅ ស្ថិតក្នុងសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។
តាមប្រភពព័ត៌មានពីប្រជាពលរដ្ឋដែលឃើញហេតុការណ៍ខាងលេីបានប្រាប់ឱ្យដឹងថា មុនកេីតហេតុគេឃើញរថយន្ត Toyota Prius ពណ៌ទឹកប្រាក់ ស៊េរីឆ្នាំ២០០៧ ពាក់ផ្លាកលេខភ្នំពេញ2BF-3943បើកបរដោយតារាចម្រៀង គង់ កែវមរកត និងរួមដំណើរដោយនារីម្នាក់ទៀតធ្វេីដំណេីរតាមបណ្ដោយផ្លូវ៣០ម៉ែត្រក្នុងទិសដៅពីជើងទៅត្បូង ខណៈមកដល់ចំណុចកើតហេតុខាងលើក៏ស្រាប់តែមានរថយន្តម៉ាកPORSCHE CAYENNE ស៊េរីឆ្នាំ២០១៥ ពាក់ផ្លាកលេខភ្នំពេញ2AX-0299 បើកបរដោយជនជាតិចិនម្នាក់ធ្វេីដំណេីរស្របទិសគ្នាយ៉ាងលឿនមកបុករថយន្តព្រូស ពីក្រោយពេញទំហឹង និងជ្រុលចង្កូតទៅបុកម៉ូតូម៉ាកហុងដាឌ្រីម C125 ស៊េរីឆ្នាំ2022 ពាក់ផ្លាកលេខភ្នំពេញ1JF-8918ដែលចតលើចិញ្ចើមផ្លូវពេញទំហឹងរុញផ្ទប់នឹងរបងដីឡូត៍មួយកន្លែង ធ្វើឱ្យម៉ូតូនិងរថយន្តទាំងបីគ្រឿងខូចខាតយ៉ាងដំណំ តែសំណាងល្អក្នុងគ្រោះថ្នាក់ចរាចរណ៍នេះមិនបណ្ដាលឱ្យនរណាម្នាក់រងរបួសនោះឡេីយ ។
ក្រោយកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ និងបានឱ្យភាគីទាំងបីសម្របសម្រួលគ្នាមួយជំហានសិន ។ មួយសន្ទុះធំក្រោយមកភាគីខាងរថយន្តបង្កបើកបរដោយជនជាតិចិនបានចេញសំណងដោយទិញយករថយន្តToyota Priusក្នុងតម្លៃ14,800 ដុល្លារនិងម៉ូតូចំនួន 2,750 ដុល្លារ ដើម្បីបញ្ចប់រឿងនៅនឹងកន្លែងកើតហេតុ៕
ដោយ ៖ ភារ៉ា ដង្កោ
