សារព័ត៌មាន នគរវត្ត តែងតែនាំមុខគេជានិច្ច
ការប្រកួតវគ្គផ្តាច់ព្រ័ត្រ World Cup បានបញ្ចប់ជាង១សប្តាហ៍មុន ប៉ុន្តែរឿងរ៉ាវជុំវិញវានៅតែបន្ត ខណៈដែលអាជ្ញាកណ្តាលនៃការប្រកួតបានបង្ហាញរូបថតនៅលើទូរស័ព្ទរបស់គាត់ក្នុងអំឡុងពេលសន្និសីទសារព័ត៌មានដើម្បីឆ្លើយតបទៅនឹងការអះអាងថា គ្រាប់បាល់ម៉ោងបន្ថែមរបស់ Lionel Messi មិនគួរឲ្យនោះទេ។
អាហ្សង់ទីនបានឈ្នះការប្រកួតវគ្គផ្តាច់ព្រ័ត្រនៅទីក្រុង Lusail ប្រទេសកាតា ៤–២ ដោយការស៊ុតបាល់ប៉េណាល់ទីបន្ទាប់ពីការប្រកួតបានបញ្ចប់ ៣–៣ បន្ទាប់ពីសកម្មភាពប្រកួត១២០នាទីដោយ Messi ស៊ុតបញ្ចូលទី២គ្រាប់ និង Kylian Mbappe រកបាន៣គ្រាប់សម្រាប់បារាំង។
លោក Szymon Marciniak ដែលជាអាជ្ញាកណ្តាលដំបូងពីប្រទេសប៉ូឡូញដើម្បីដឹកនាំការប្រកួតវគ្គផ្តាច់ព្រ័ត្រ World Cup បានប្រឈមមុខនឹងការរិះគន់ពីប្រព័ន្ធផ្សព្វផ្សាយបារាំងថា គាត់គួរតែបានទាត់ចោលគ្រាប់បាល់ក្រៅម៉ោងរបស់ Messi ដោយសារតែកីឡាករបម្រុងអាហ្សង់ទីន២នាក់បានចូលទីលានមុនពេលបាល់ចូលទៅក្នុងសំណាញ់។
កាសែតបារាំង L’Equipe បានលើកឡើងពីច្បាប់៣ កថាខណ្ឌទី៩ របស់ក្រុមប្រឹក្សាភិបាលសមាគមកីឡាបាល់ទាត់អន្តរជាតិ ដែលរួមមានអាជ្ញាកណ្តាលត្រូវតែមិនអនុញ្ញាតឲ្យស៊ុតបញ្ចូលទី ប្រសិនបើកីឡាករដែលប្តូរចូលទីលានប្រកួតនៅពេលស៊ុតបញ្ចូលទី។ លោក Marciniak បានឆ្លើយតបទៅនឹងការរិះគន់នេះក្នុងលក្ខណៈពិសេសមួយ។
គាត់បានទាញរូបថតអេក្រង់នៅលើទូរស័ព្ទរបស់គាត់ដែលបង្ហាញពីកីឡាករបម្រុងជនជាតិបារាំង៧នាក់បានចូលទីលាន ខណៈដែលពួកគេកំពុងអបអរគ្រាប់បាល់មួយក្នុងចំណោមគ្រាប់បាល់របស់ Mbappe ។លោក Marciniak បាននិយាយនៅពេលគាត់លើកទូរស័ព្ទពេលនិយាយទៅកាន់អ្នកសារព័ត៌មានថា “ជនជាតិបារាំងមិនបាននិយាយពីរូបថតនេះទេ ដែលអ្នកអាចមើលឃើញពីរបៀបដែលមានកីឡាករបារាំង៧នាក់នៅលើទីលាននៅពេលដែល Mbappe រកបាន១គ្រាប់”។
ការអត្ថាធិប្បាយរបស់លោក Marciniak បានកើតឡើងបន្ទាប់ពីញត្តិមួយ ដោយស្នើឱ្យការប្រកួតវគ្គផ្តាច់ព្រ័ត្រត្រូវបានចាក់ឡើងវិញដោយសារតែកំហុសរបស់មន្ត្រីត្រូវបានចាប់ផ្តើម។ រហូតមកដល់ពេលនេះញត្តិមានហត្ថលេខាជាង២២០,០០០ ៕
ដោយ៖ ភារៈ(រូបភាព ៖ Reuters/CNA)
