សារព័ត៌មាន នគរវត្ត តែងតែនាំមុខគេជានិច្ច
ខេត្តឧត្តរមានជ័យ ៖ ហេតុការណ៍ករណីគ្រោះថ្នាក់ចរាចរណ៍មួយបង្កឡើងដោយខ្លួនឯង ដោយរថយន្តកែច្នៃមួយគ្រឿងបើករេចង្កូតទៅបុកដើមស្នាយពេញ ទំហឹង បណ្ដាលឲ្យរងរបួសធ្ងន់២នាក់ កាលពីវេលាម៉ោង១១និង៤៥នាទីថ្ងៃទី២៧ ខែធ្នូ ឆ្នាំ២០២២ ស្ថិតនៅត្រង់ចំណុចភូមិអន្លង់វែង សង្កាត់កូនក្រៀល ក្រុងសំរោង ខេត្តឧត្តរមានជ័យ។
អ្នកឃើញហេតុការណ៍នៅកន្លែងកើតហេតុបានបញ្ជាក់ប្រាប់ឲ្យដឹងថា បើតាមដឹងអ្នកបើកបរសង្ស័យតែ ងងុយដេក ។ ប្រភពខាងលើបន្ថែមថា ចំពោះឡាននេះដែរគឺបើកបរទិសដៅពីជើងទៅត្បូង លុះមកដល់ចំណុចខាងលើ ក៏រេចង្កូតទៅបុកដើមស្នាយតែម្តង។
ប្រភពពីកន្លែងកើតហេតុបានឲ្យដឹងថា បើតាមការឲ្យដឹងនៅពេលគាត់សាកសួរអ្នកបើកបរ អ្នកបើកបររថយន្តប្រាប់ថា គាត់ងងុយដេក។ រថយន្តខាងលើនេះដែរ គឺជាប្រភេទរថយន្តម៉ាកតូយ៉ូតា កាមរីចង្កូតស្ដាំ គ្មានស្លាកលេខពណ៌ស្ពៃជ្រក់ជាប្រភេទឡានកែច្នៃដឹកទំនិញករណីនេះគឺ មិនបង្កគ្រោះថ្នាក់ដល់អ្នកដទៃនោះទេដោយក្នុងហេតុការណ៍នេះអ្នកបើកបររថយន្តធ្វើដំណើរជិះគ្នាពីរនាក់រងរបួសធ្ងន់ រីឯរថយន្តរងការខូចខាតយ៉ាងដំណំទៅមុខលែងរួច។
ក្រោយកើតហេតុម្ចាស់រថយន្តនាំគ្នាមកប្រមូលសាងអីវ៉ាន់ចេញពីរថយន្តនិងបានហៅឡានស្ទូចទៅស្ទូចយករថយន្តនោះដើម្បីយកទៅជួសជុលនៅថ្ងៃ ដដែលនេះផងដែរ។
សូមបញ្ជាក់ថា ករណីខាងលើនេះក្រុមការងារព័ត៌មានយើងមិនអាចសុំការបញ្ជាក់ពីអត្តសញ្ញាណឈ្មោះអ្នកបើកបរបានទេក្រោយកើតហេតុអ្នកបើកបរនិងអ្នកធ្វើដំណើរជាមួយគឺបានដឹកទៅសង្គ្រោះបន្ទាន់នៅមន្ទីរពេទ្យបង្អែកខេត្តឧត្តរមានជ័យបាត់ទៅហើយ៕
ដោយ៖ សូរិយា
